Song of Solomon 2
1ယမ့ၢ်ၡၤရိၣ်အဖီဝံဒံၣ်,တၢ်ကစၢၢ်ကဆူးအဖီဒ့ၣ်ညါလီၤ.
2ဒ်ဖီဒ့ၣ်ညါလၢတၤဆှုၣ်ကျါအသိးန့ၣ်ယပှၤသးဘိတဂၤမ့ၢ်တၢ်ဒ်န့ၣ်သိးလၢပှၤဖိမုၣ်အကျါလီၤ.
3ဒ်သ့ၣ်ပြၢးတးပူာ်လၢသ့ၣ်တဖုအကျါအသိးန့ၣ်ပှၤလၢယအဲၣ်အီၤမ့ၢ်တၢ်ဒ်န့ၣ်သိးလၢပှၤဖိခွါအကျါလီၤ.ယဆ့ၣ်နီၤလၢအကဒုကျါန့ၣ်ဘၣ်ယသးလီၤ.ဒီးအတၤသၣ်န့ၣ်ဆၢဝဲလၢယကိာ်ပူၤလီၤ.
4ဆှၢယၤဆူအတၢ်အီၣ်တၢ်အီအဟံၣ်,ဒီးအသုးဖိအလၣ်အိၣ်လၢယဖီခိၣ်န့ၣ်မ့ၢ်တၢ်အဲၣ်လီၤ.
5ဒုးဆူၣ်ထီၣ်ယၤလၢစပံးသၣ်ဃ့,မၤကျၢၤထီၣ်ယသးလၢပြၢးတးပူာ်အသၣ်တက့ၢ်.အဂ့ၢ်ဒ်အံၤ,ယဆါလၢတၢ်အဲၣ်အဃိလီၤ.
6အစုစ့ၣ်အိၣ်ဝဲလၢယခိၣ်အဖီလာ်,ဒီးအစုထွဲဖိးယၤလီၤ.
7ယရူၤၡလ့ၣ်အဖိမုၣ်သ့ၣ်ဧၢ,ယဒုးဆိၣ်သုလၢတၤဟိစဘံ,ဒီးတၤဟိမိၢ်လၢပှၢ်လၢ်ကျါအမဲာ်ညါ,လၢသုသုတထိၣ်ဂဲၤ,ဒီးလၢအတချုးဘၣ်ဒံးဘၣ်အသးဘၣ်ဒီး,လၢသုသုတမၤဖုသံနီၣ်ထီၣ်ပှၤလၢယအဲၣ်အီၤတဂ့ၤ.
8ပှၤလၢယအဲၣ်အီၤအကလုၢ်သီၣ်ထီၣ်လီၤ.ကွၢ်ကွၢ်,ဟဲစံၣ်ထီၣ်လၢကစၢၢ်လိၤ,စံၣ်တတီၤတတီၤလၢတၢ်စိခိၣ်အလိၤလီၤ.
9ပှၤလၢယအဲၣ်အီၤတဂၤန့ၣ်မၤသးဒ်တၤဟိစဘံ,မၤသးဒ်တၤဟိဖိအဖါအသိးန့ၣ်လီၤ.ကွၢ်ကွၢ်,ဆၢထၢၣ်ဝဲလၢပဒူၣ်အချၢဃံ,ကွၢ်ထီၣ်ဝဲလၢတၢ်ထူၣ်ဖျိ,ကွၢ်ဝဲတဘျီတဘျီလၢတၢ်ထူၣ်ဖျိအကဘျံးလီၤ.
10ပှၤလၢယအဲၣ်အီၤကတိၤတၢ်,ဒီးစံးဘၣ်ယၤ,ယပှၤသးဘိဧၢ,ဂဲၤဆၢထၢၣ်,ယပှၤအဃံအလၤဧၢ,ဟဲက့ၤထီၣ်တက့ၢ်.
11အဂ့ၢ်ဒ်အံၤ,တၢ်ဂိၢ်အကတီၢ်ပူၤကွံာ်လံ,တၢ်ဟဲစူၤပူၤကွံာ်,ဒီးလၢာ်လံ,
12ဖီအိၣ်ဖျါထီၣ်လၢဟီၣ်ခိၣ်ချၢ,ထိၣ်ပှ့ၤထီၣ်အကတီၢ်ဘၣ်လံ,ဒီးပနၢ်ဟူထိၣ်လွံၢ်အသီၣ်လၢပကီၢ်ပူၤလံ,
13ချၢၣ်ဒၢသၣ်ထီၣ်အချၢၣ်ဒၢသၣ်သံကစဲာ်,ဒီးစပံးမုၢ်ဆှိးထီၣ်,ဒီးနၢမူထီၣ်လီၤ.ဂဲၤဆၢထၢၣ်ယပှၤသးဘိတဂၤ,ယပှၤအဃံအလၤတဂၤဧၢ,ဒီးဟဲက့ၤထီၣ်တက့ၢ်.
14ယထိၣ်လွံၢ်အိၣ်လၢလၢၢ်အအိပူၤ,လၢအလီၢ်အိၣ်တဒၢလၢလ့လိၤဧၢ,ဟ့ၣ်ကွၢ်ယၤလၢနမဲာ်,ဒုးနၢ်ဟူယၤလၢနကလုၢ်တက့ၢ်.အဂ့ၢ်ဒ်အံၤ,နကလုၢ်မုာ်ဝဲ,ဒီးနမဲာ်တက့ၢ်အဂီၤဂ့ၤဝဲလီၤ.
15ဖီၣ်န့ၢ်ပှၤလၢထွံၣ်ဟီၣ်ခိၣ်,ထွံၣ်ဟီၣ်ခိၣ်အဖိလၢအမၤဟးဂီၤစပံးမုၢ်တက့ၢ်.အဂ့ၢ်ဒ်အံၤ,ပစပံးမုၢ်ဆှိးထီၣ်လီၤ.
16ပှၤလၢယအဲၣ်အီၤန့ၣ်မ့ၢ်ယတၢ်,ဒီးယဲဒၣ်ယမ့ၢ်အတၢ်လီၤ.ဒုးအီၣ်တၢ်အဆၣ်လၢဖီဒ့ၣ်ညါအကျါလီၤ.
17တုၤမုၢ်ခုၣ်လီၤ,ဒီးတၢ်အကဒုဃ့ၢ်ကွံာ်ဒီး,ပှၤလၢယအဲၣ်အီၤဧၢ,ဟဲက့ၤကဒီး,မၤနသးဒ်တၤဟိစဘံ,ဒ်တၤဟိဖိအဖါလၢကစၢၢ်လၢၢ်မုၢ်အလိၤတက့ၢ်.