John 3
1ဒီးပှၤကညီတဂၤဘၣ်ဃးဒီးပှၤဖၤရံၤၡဲအကျါ,အမံၤစီၤနံၤကဒ့မူး,ပှၤယူဒၤဖိအပဒိၣ်,အိၣ်ဝဲတဂၤလီၤ.
2အဝဲဒၣ်ဟဲဆူယ့ၣ်ရှူးအအိၣ်လၢမုၢ်နၤဒီးစံးဘၣ်အီၤ,ရၤဘံဧၢ,ပသ့ၣ်ညါလၢနမ့ၢ်သရၣ်လၢအဟဲလီၤလၢယွၤအအိၣ်လီၤ.အဂ့ၢ်ဒ်အံၤ,တၢ်လီၤလးလၢနမၤန့ၣ်,ယွၤမ့ၢ်တအိၣ်ဘၣ်ဒီးအီၤဘၣ်ဒီး,ပှၤမၤတသ့ဘၣ်နီတဂၤဘၣ်.
3ယ့ၣ်ရှူးကတိၤဆၢတၢ်ဒီးစံးဘၣ်အီၤ,ယစံးဘၣ်တဲဘၣ်နၤတီတီလိၤလိၤ,ပှၤမ့ၢ်တအိၣ်ဖျဲၣ်ကဒီးတစုဘၣ်ဒီး,ထံၣ်ယွၤအဘီအမုၢ်တသ့ဘၣ်.
4စီၤနံၤကဒ့မူးစံးဘၣ်အီၤ,ပှၤလၢအသးပှၢ်တ့ၢ်န့ၣ်,အိၣ်ဖျဲၣ်ကသ့ဒ်လဲၣ်.နုာ်ဝဲလၢအမိၢ်အဟၢဖၢပူၤခံစုတစု,ဒီးအိၣ်ဖျဲၣ်ဘၣ်ကသ့ဧါ.
5ယ့ၣ်ရှူးကတိၤဆၢဝဲ,ယစံးဘၣ်တဲဘၣ်နၤတီတီလိၤလိၤ,ပှၤမ့ၢ်တအိၣ်ဖျဲၣ်ဘၣ်လၢထံဒီးသးန့ၣ်ဘၣ်ဒီး,လဲၤနုာ်ဆူယွၤအဘီအမုၢ်တသ့ဘၣ်.
6တၢ်အိၣ်ဖျဲၣ်လၢတၢ်ညၣ်,မ့ၢ်တၢ်ညၣ်,ဒီးတၢ်အိၣ်ဖျဲၣ်လၢသးမ့ၢ်သးလီၤ.
7မ့ၢ်ယစံးဘၣ်နၤလၢသုဘၣ်အိၣ်ဖျဲၣ်ကဒီးတစုဒီး,သုတကမၢကမၣ်တဂ့ၤ.
8ကလံၤန့ၣ်,ဖဲဒၣ်အသးဒီး,အူဝဲတပူၤပူၤ,ဒီးနနၢ်ဟူအသီၣ်,မ့မ့ၢ်အဟဲလၢလဲၣ်လၢလဲၣ်,ဒီးအလဲၤဆူလဲၣ်ဆူလဲၣ်န့ၣ်,နတသ့ၣ်ညါဘၣ်.ကယဲၢ်ပှၤအိၣ်ဖျဲၣ်ဝဲလၢသးန့ၣ်,မၤအသးဒ်န့ၣ်အသိးကိးဂၤဒဲးလီၤ.
9စီၤနံၤကဒ့မူးကတိၤဆၢတၢ်ဒီးစံးဘၣ်အီၤ,တၢ်န့ၣ်တဖၣ်မၤအသးကသ့ဒ်လဲၣ်.
10ယ့ၣ်ရှူးကတိၤဆၢတၢ်ဒီးစံးဘၣ်အီၤ,နဲဒၣ်အံၤ,နမ့ၢ်မးသရၣ်လၢအံၣ်စရ့လးအပူၤဒီး,တၢ်တဖၣ်အံၤနတသ့ၣ်ညါဘၣ်ဧါ.
11ယစံးဘၣ်တဲဘၣ်နၤတီတီလိၤလိၤ,ပကတိၤတၢ်လၢပသ့ၣ်ညါ,ဒီးပအုၣ်ပသးလၢတၢ်လၢပထံၣ်,ဒီးသုတဟံးန့ၢ်ဘၣ်ပတၢ်အုၣ်ပသးန့ၣ်ဘၣ်.
12တၢ်အိၣ်လၢဟီၣ်ခိၣ်ယစံးဘၣ်သုဒီး,သုမ့ၢ်တနာ်ဘၣ်ဒီး,တၢ်အိၣ်လၢမူခိၣ်န့ၣ်,ယမ့ၢ်စံးဘၣ်သုဒီး,သုကနာ်ဒ်လဲၣ်.
13ဒီးပှၤတလဲၤထီၣ်ဘၣ်ဆူမူခိၣ်နီတဂၤဘၣ်,လဲၤထီၣ်ထဲပှၤလၢအဟဲလီၤလၢမူခိၣ်,ပှၤကညီဖိခွါလၢအအိၣ်ဝဲလၢမူခိၣ်တဂၤအံၤလီၤ.
14ဒီးဒ်စီၤမိၤရှ့ယူာ်ထီၣ်ဂုၢ်လၢပှၢ်မုၢ်ကနၢအသိးန့ၣ်,ပှၤကညီဖိခွါအံၤကဘၣ်တၢ်ယူာ်ထီၣ်အီၤဒ်န့ၣ်အသိး,
15ဒ်သိးကယဲၢ်ပှၤလၢအစူၢ်က့ၤနာ်က့ၤအီၤတဂၤလၢ်လၢ်န့ၣ်,ကန့ၢ်ဘၣ်တၢ်မူလီၤထူလီၤယိာ်လၢအီၤလီၤ.
16အဂ့ၢ်ဒ်အံၤ,ယွၤအဲၣ်ဟီၣ်ခိၣ်ဖိတုၤအဟ့ၣ်လီၤကွံာ်အဖိခွါအိၣ်တဂၤဃီ,ဒ်သိးကယဲၢ်ပှၤလၢအစူၢ်က့ၤနာ်က့ၤအီၤတဂၤလၢ်လၢ်န့ၣ်,အသုတဟးဂီၤတဂ့ၤဒီး,ကန့ၢ်ဘၣ်တၢ်မူအထူအယိာ်လီၤ.
17အဂ့ၢ်ဒ်အံၤ,တမ့ၢ်ဘၣ်ယွၤမၢလီၤအဖိခွါဆူဟီၣ်ခိၣ်အံၤဒ်သိးအကစံၣ်ညီၣ်ဟီၣ်ခိၣ်ဖိဘၣ်.မ့ၢ်ဒ်သိးဟီၣ်ခိၣ်ဖိကဘၣ်တၢ်အုၣ်က့ၤခီၣ်က့ၤလၢအီၤလီၤ.
18ပှၤလၢအစူၢ်က့ၤနာ်က့ၤအီၤန့ၣ်,တဘၣ်ဘၣ်တၢ်စံၣ်ညီၣ်ဘၣ်.မ့မ့ၢ်ပှၤလၢအတစူၢ်တနာ်အီၤန့ၣ်,ဘၣ်တၢ်စံၣ်ညီၣ်ခဲကနံၣ်အံၤလီၤ.အဂ့ၢ်ဒ်အံၤ,တနာ်ဘၣ်ယွၤအဖိခွါတဂၤဃီအမံၤဘၣ်လီၤ.
19ဒီးတၢ်စံၣ်ညီၣ်မ့ၢ်အအံၤ,တၢ်ကပီၤဟဲလီၤလၢဟီၣ်ခိၣ်,ဒီးပှၤကညီအဲၣ်တၢ်ခံးအါန့ၢ်တၢ်ကပီၤတက့ၢ်လီၤ.အဂ့ၢ်ဒ်အံၤ,အတၢ်မၤမ့ၢ်အအၢအသီလီၤ.
20အဂ့ၢ်ဒ်အံၤ,ကယဲၢ်ပှၤလၢအမၤတၢ်အၢတၢ်သီတဂၤလၢ်လၢ်န့ၣ်,သးဟ့တၢ်ကပီၤ,ဒီးဒ်သိးအတၢ်မၤသုတဘၣ်တၢ်သိၣ်ဃီၣ်တဂ့ၤဒီး,တဟဲဘၣ်ဆူတၢ်ကပီၤအအိၣ်ဘၣ်.
21မ့မ့ၢ်ပှၤလၢအမၤတၢ်မ့ၢ်တၢ်တီန့ၣ်,ဒ်သိးအတၢ်ကမၤကအိၣ်ဖျါလၢအမၤဝဲလၢယွၤအပူၤဒီး,ဟဲဝဲဆူတၢ်ကပီၤအအိၣ်လီၤ.
22တၢ်န့ၣ်တဖၣ်အလီၢ်ခံဒီး,ယ့ၣ်ရှူးလဲၤဒီးအပျဲၢ်အဘီၣ်ဆူယူဒၤအကီၢ်ပူၤ,ဒီးအိၣ်ဝဲဒီးအီၤဖဲန့ၣ်,ဒီးဘျၢတၢ်လီၤ.
23ဒီးစီၤယိၤဟၣ်ဘျၢတၢ်လၢအဲၤနိၣ်ဘူးဒီးၡၤလ့ၣ်လီၤ.အဂ့ၢ်ဒ်အံၤ,ထံအါဖဲန့ၣ်လီၤ.ဒီးပှၤဟဲဒီးဒိးဘျၢအသးလီၤ.
24အဂ့ၢ်ဒ်အံၤ,စီၤယိၤဟၣ်တဘၣ်ဒံးဘၣ်တၢ်တ့ၢ်လီၤအီၤဆူဃိာ်ပူၤဘၣ်.
25မၤသးဒ်န့ၣ်ဒီးစီၤယိၤဟၣ်အပျဲၢ်အဘီၣ်ဒီးပှၤယူဒၤဖိတဂၤတဲးလိာ်ဃိလိာ်အသးလၢတၢ်မၤကဆှီအလုၢ်အလၢ်အဂ့ၢ်န့ၣ်လီၤ.
26ဒီးဟဲဝဲဆူစီၤယိၤဟၣ်အအိၣ်ဒီးစံးဘၣ်အီၤ,ရၤဘံဧၢ,ကွၢ်ကွၢ်,ပှၤအိၣ်ဒီးနၤလၢယၢ်ဒ့ၣ်ဝၢ်ဘးခီ,လၢနအုၣ်နသးလၢအဂ့ၢ်တဂၤန့ၣ်,ဘျၢတၢ်,ဒီးပှၤခဲလၢာ်ဟဲဆူအအိၣ်လီၤ.
27ဒီးစီၤယိၤဟၣ်ကတိၤဆၢတၢ်ဒီးစံးဝဲဒၣ်,တၢ်မ့ၢ်တဟ့ၣ်လီၤအတၢ်လၢမူခိၣ်ဘၣ်ဒီး,ပှၤကညီန့ၢ်ဘၣ်တၢ်တသ့နီတမံၤဘၣ်,
28သုကအုၣ်သုးသးလၢသုကစၢ်ဒၣ်သုဝဲလၢယစံး,ယဲဒၣ်အံၤ,ယတမ့ၢ်ဘၣ်ခရံာ်ဘၣ်.မ့ၢ်လၢတၢ်မၢယဟဲလၢအမဲာ်ညါလီၤ.
29ပှၤလၢအအိၣ်ဒီးတလးမူးပိာ်မုၣ်န့ၣ်,မ့ၢ်တလးမူးပိာ်ခွါလီၤ.ဘၣ်ဆၣ်ဒီးတလးမူးပိာ်ခွါအတံၤအသကိးလၢအဆၢထၢၣ်,ဒီးနၢ်ဟူတလးမူးပိာ်ခွါအကလုၢ်န့ၣ်,သးခုဒိၣ်မးလီၤ.မၤသးဒ်န့ၣ်ဒီးယတၢ်သးခုအံၤလၢထီၣ်ပှဲၤထီၣ်လီၤ.
30အဝဲဒၣ်န့ၣ်ဘၣ်အါထီၣ်လီၤ.မ့မ့ၢ်ယဲဒၣ်အံၤ,ယဘၣ်စှၤလီၤလီၤ.
31ပှၤဟဲလီၤဝဲလၢထးန့ၣ်,အိၣ်လၢတၢ်ခဲလၢာ်အဖီခိၣ်လီၤ.ပှၤဟဲလၢဟီၣ်ခိၣ်,မ့ၢ်အဘၣ်ဃးဒီးဟီၣ်ခိၣ်,ဒီးကတိၤတၢ်ဘၣ်ဃးဒီးဟီၣ်ခိၣ်လီၤ.ပှၤဟဲလီၤဝဲလၢမူခိၣ်,အိၣ်ဝဲလၢတၢ်ခဲလၢာ်အဖီခိၣ်လီၤ.
32ဒီးဖဲဒၣ်အထံၣ်ဒီးနၢ်ဟူဝဲန့ၣ်,မ့ၢ်အအုၣ်အသးလၢအဂ့ၢ်,ဒီးအတၢ်အုၣ်အသးန့ၣ်,ပှၤတတူၢ်လိာ်ဘၣ်နီတဂၤဘၣ်.
33ပှၤလၢအတူၢ်လိာ်အတၢ်အုၣ်အသးန့ၣ်,မ့ၢ်အစဲပနီၣ်ဃာ်ဝဲလၢယွၤမ့ၢ်အမ့ၢ်အတီလီၤ.
34အဂ့ၢ်ဒ်အံၤ,ပှၤလၢယွၤမၢလီၤအီၤတဂၤန့ၣ်,စံၣ်တဲၤတဲလီၤယွၤအကလုၢ်အကထါလီၤ.အဂ့ၢ်ဒ်အံၤ,ယွၤဟ့ၣ်လီၤအီၤလၢသးန့ၣ်ဒီးတဃီၣ်နီၣ်ဘၣ်ဝဲဘၣ်.
35ပၢ်အဲၣ်ဖိခွါ,ဒီးဟ့ၣ်လီၤလံတၢ်ခဲလၢာ်လၢအစုပူၤလံ.
36ပှၤလၢအစူၢ်က့ၤနာ်က့ၤဖိခွါန့ၣ်,အိၣ်ဒီးတၢ်မူအထူအယိာ်လီၤ.မ့မ့ၢ်ပှၤလၢအတစူၢ်တနာ်ဘၣ်န့ၣ်,တထံၣ်ဘၣ်တၢ်မူဘၣ်.မ့ၢ်ယွၤအတၢ်သးဒိၣ်န့ၣ်အိၣ်ဝဲဆိးဝဲလၢအလိၤလီၤ.