John 11
1ဒီးမတၤတဂၤ,စီၤလါစရူး,ဘၣ်ဃးဒီးဘ့ၤသနံ,လၢအမ့ၢ်နီၢ်မၤရံဒီးအဒီပုၢ်ဝဲၢ်မုၣ်နီၢ်မၢ်သၤအသဝီန့ၣ်,ဘၣ်တၢ်ဆါအီၤလီၤ.
2ဒီးနီၢ်မၤရံ,လၢအဒီပုၢ်ဝဲၢ်စီၤလါစရူးဘၣ်တၢ်ဆါအီၤန့ၣ်,မ့ၢ်ပှၤလၢအဖှူကစၢ်လၢသိနၢမူဒီးတြူၢ်ဝဲအခီၣ်လၢအခိၣ်သူလီၤ.
3မၤသးဒ်န့ၣ်ဒီးအဒီပုၢ်ဝဲၢ်မုၣ်တဖၣ်မၢပှၤလဲၤဆူအအိၣ်ဒီးစံးဝဲဒၣ်,ကစၢ်ဧၢ,ကွၢ်ကွၢ်,ပှၤလၢနအဲၣ်အီၤတဂၤန့ၣ်ဘၣ်တၢ်ဆါအီၤလီၤ.
4ဒီးယ့ၣ်ရှူးနၢ်ဟူဒီးစံးဝဲဒၣ်,တၢ်ဆါန့ၣ်တမ့ၢ်ဘၣ်တၢ်ဆါတုၤအသံဘၣ်.မ့ၢ်လၢယွၤအလၤကပီၤအဂီၢ်,ဒ်သိးယွၤအဖိခွါအလၤကပီၤကအိၣ်ဖျါထီၣ်လၢအဃိလီၤ.
5ဒီးယ့ၣ်ရှူးအဲၣ်နီၢ်မၢ်သၤဒီးအဒီပုၢ်ဝဲၢ်မုၣ်,ဒီးစီၤလါစရူးလီၤ.
6မၤသးဒ်န့ၣ်ဒီးတုၤအနၢ်ဟူဝဲလၢအဘၣ်တၢ်ဆူးတၢ်ဆါဒီး,အိၣ်ဝဲဖဲအလီၢ်လီၢ်န့ၣ်ခံနံၤလီၤ.
7လၢခံက့ၤဒီးစံးဘၣ်အပျဲၢ်အဘီၣ်,မ်ပကလဲၤကဒီးဆူကီၢ်ယူဒၤတက့ၢ်.
8ဒီးအပျဲၢ်အဘီၣ်စံးဘၣ်အီၤ,ရၤဘံဧၢ,ခဲကနံၣ်အံၤဒၣ်လဲာ်ပှၤယူဒၤဖိဃုကွံာ်နၤလၢလၢၢ်,ဒီးနကလဲၤကဒီးဆူန့ၣ်ဧါ.
9ဒီးယ့ၣ်ရှူးစံးဆၢဝဲဒၣ်,တၢ်လၢမုၢ်ဆါခီန့ၣ်,အိၣ်တဆံခံနၣ်ရံၣ်,တမ့ၢ်ဘၣ်ဧါ.ပှၤမ့ၢ်ဟးလၢမုၢ်ဆါခီဒီး,တဘၣ်ဒိဘၣ်ထံးဘၣ်.အဂ့ၢ်ဒ်အံၤ,မ့ၢ်အထံၣ်ဟီၣ်ခိၣ်အံၤအတၢ်ကပီၤလီၤ.
10မ့မ့ၢ်ပှၤမ့ၢ်လဲၤတၢ်လၢမုၢ်နၤဒီး,ဘၣ်ဒိဘၣ်ထံးလီၤ.အဂ့ၢ်ဒ်အံၤ,တၢ်ကပီၤတအိၣ်ဘၣ်လၢအပူၤဘၣ်.
11ကတိၤတၢ်န့ၣ်တဖၣ်ဝံၤဒီးစံးဘၣ်အီၤ,ပတခွါစီၤလါစရူးမံသပ့ၤဝဲ,မ့မ့ၢ်ယလဲၤဒ်သိးကထိၣ်ဂဲၤထီၣ်အီၤလီၤ.
12မၤသးဒ်န့ၣ်ဒီးအပျဲၢ်အဘီၣ်စံးဝဲဒၣ်,ကစၢ်ဧၢ,မ့ၢ်မံသပ့ၤဒီး,ကကိညၢ်ဝဲလီၤ.
13ဒီးယ့ၣ်ရှူးကတိၤတၢ်လၢအသံဝဲအဂ့ၢ်ဘၣ်ဆၣ်ဒီး,အဝဲသ့ၣ်ဆိကမိၣ်လၢအစံးလၢအမံအိၣ်ဘှံးဝဲအဂ့ၢ်လီၤ.
14တုၤနုၤတစုယ့ၣ်ရှူးစံးဘၣ်အီၤလိၤလိၤ,စီၤလါစရူးသံလံဝဲလံ.
15ဒီးယတအိၣ်ဘၣ်ဖဲန့ၣ်ဒီးယသးခုလၢသုဂီၢ်ဒ်သိးသုကနာ်တၢ်လီၤ.ဘၣ်ဆၣ်မ်ပလဲၤဆူအအိၣ်တက့ၢ်.
16မၤသးဒ်န့ၣ်ဒီး,စီၤသိၤမါကိးဝဲစီၤဒံဒူၤမူးတဂၤစံးဘၣ်အပျဲၢ်အဘီၣ်သကိးဒီးအီၤတဖၣ်န့ၣ်,မ်ပလဲၤစ့ၢ်ကီးဒီးပဝဲဒ်သိးပကသံဃုာ်ဒီးအီၤတက့ၢ်.
17မၤသးဒ်န့ၣ်ဒီးယ့ၣ်ရှူးလဲၤတုၤဝဲဒီး,ထံၣ်န့ၢ်လၢအအိၣ်တ့ၢ်လံလၢတၢ်သွၣ်ခိၣ်အပူၤန့ၣ်လွံၢ်နံၤလံ.
18ဒီးဘ့ၤသနံအိၣ်ယံၤဒီးယရူၤၡလ့ၣ်တဆံယဲၢ်စတၤဒံအူၢ်ဃၣ်ဃၣ်,
19ဒီးပှၤယူဒၤဖိအါဂၤဟဲဒ်သိးအကကတိၤမုာ်ထီၣ်က့ၤနီၢ်မၢ်သၤဒီးနီၢ်မၤရံအသးလၢအဒီပုၢ်ဝဲၢ်အဂ့ၢ်လီၤ.
20မၤသးဒ်န့ၣ်ဒီးတုၤနီၢ်မၢ်သၤနၢ်ဟူလၢယ့ၣ်ရှူးဟဲဝဲန့ၣ်ဒီး,လဲၤထီၣ်သဂၢၢ်အီၤလီၤ.မ့မ့ၢ်နီၢ်မၤရံတဂၤန့ၣ်,ဆ့ၣ်နီၤအိၣ်ဒၣ်တၢ်လၢဟံၣ်ပူၤလီၤ.
21မၤသးဒ်န့ၣ်ဒီးနီၢ်မၢ်သၤစံးဘၣ်ယ့ၣ်ရှူး,ကစၢ်ဧၢ,နမ့ၢ်အိၣ်တ့ၢ်ဖဲအံၤဒီး,ယဒီပုၢ်ဝဲၢ်ခွါတသံဘၣ်ဝဲဘၣ်.
22ဘၣ်ဆၣ်ခဲကနံၣ်အံၤဒၣ်လဲာ်,ယသ့ၣ်ညါလၢဖဲဒၣ်နဃ့တၢ်လၢယွၤတဖၣ်န့ၣ်,ယွၤကဟ့ၣ်နၤလီၤ.
23ယ့ၣ်ရှူးစံးဘၣ်အီၤ,နဒီပုၢ်ဝဲၢ်ခွါကဂဲၤဆၢထၢၣ်က့ၤလီၤ.
24နီၢ်မၢ်သၤစံးဘၣ်အီၤ,ကဂဲၤဆၢထၢၣ်က့ၤဝဲလၢမုၢ်နံၤကတၢၢ်အတၢ်ဂဲၤဆၢထၢၣ်က့ၤန့ၣ်,ယသ့ၣ်ညါလီၤ.
25ယ့ၣ်ရှူးစံးဘၣ်အီၤ,ယဲဒၣ်အံၤယမ့ၢ်တၢ်ဂဲၤဆၢထၢၣ်က့ၤဒီးတၢ်မူလီၤ.ပှၤလၢအစူၢ်က့ၤနာ်က့ၤယၤန့ၣ်,မ့ၢ်သံဘၣ်ဆၣ်ဒီး,ကမူထီၣ်ဝဲလီၤ.
26ဒီးကယဲၢ်ပှၤလၢအမူဝဲ,ဒီးစူၢ်က့ၤနာ်က့ၤယၤတဂၤလၢ်လၢ်န့ၣ်,တသံဘၣ်ဝဲနီတခီၣ်ဘၣ်.တၢ်န့ၣ်နနာ်စ့ၢ်ကီးဧါ.
27ဒီးစံးဘၣ်အီၤ,ယနာ်လီၤ,ကစၢ်ဧၢ.ယနာ်လၢနမ့ၢ်ပှၤဟဲလီၤဆူဟီၣ်ခိၣ်ချၢ,ယွၤအဖိခွါ,ခရံာ်န့ၣ်လီၤ.
28ကတိၤတၢ်ဒ်န့ၣ်ဒီး,လဲၤကိးန့ၢ်အဒီပုၢ်ဝဲၢ်နီၢ်မၤရံကသွံဒံ,ဒီးစံးဝဲဒၣ်,သရၣ်ဟဲတုၤလံ,ဒီးကိးနၤလီၤ.
29ဒီးတုၤအနၢ်ဟူဝဲဒီး,ဂဲၤဆၢထၢၣ်ချ့သဒံးဒီးလဲၤဝဲဆူအအိၣ်လီၤ.
30ဒီးယ့ၣ်ရှူးတဟဲနုာ်ဒံးဘၣ်ဆူသဝီပူၤဘၣ်.မ့ၢ်အအိၣ်ဝဲဖဲနီၢ်မၢ်သၤဟဲသဂၢၢ်အီၤအလီၢ်လီၤ.
31မၤသးဒ်န့ၣ်ဒီးပှၤယူဒၤဖိလၢအကတိၤမုာ်ထီၣ်က့ၤအီၤဒီးအိၣ်ဒီးအီၤလၢဟံၣ်ပူၤတဖၣ်န့ၣ်,ထံၣ်ဝဲလၢနီၢ်မၤရံဂဲၤဆၢထၢၣ်ချ့သဒံး,ဒီးဟးထီၣ်ဝဲဒီး,ပိာ်ထီၣ်အခံဒီးစံးဝဲလၢအလဲၤဆူတၢ်သွၣ်ခိၣ်ဒ်သိးအကဟီၣ်ဝဲဖဲန့ၣ်လီၤ.
32မၤသးဒ်န့ၣ်ဒီးတုၤနီၢ်မၤရံလဲၤတုၤဝဲဖဲယ့ၣ်ရှူးအအိၣ်ဒီးထံၣ်အီၤဒီး,တီၤလီၤကဒွံကျိာ်လၢအခီၣ်ထံး,ဒီးစံးဘၣ်အီၤ,ကစၢ်ဧၢ,နမ့ၢ်အိၣ်တ့ၢ်ဖဲအံၤဒီး,ယဒီပုၢ်ဝဲၢ်ခွါတသံဘၣ်ဝဲဘၣ်.
33မၤသးဒ်န့ၣ်ဒီးယ့ၣ်ရှူးထံၣ်အီၤလၢအဟီၣ်ဝဲ,ဒီးပှၤယူဒၤဖိဟဲဒီးအီၤလၢအဟီၣ်ဝဲသတးဒီး,ကအုကစွါထီၣ်လၢအသးကံၢ်ပူၤ,ဒီးအသူၣ်ကိၢ်အသးဂီၤ,
34ဒီးစံးဝဲဒၣ်,သုပာ်အီၤဖဲလဲၣ်ပူၤလဲၣ်.ဒီးအဝဲသ့ၣ်စံးဘၣ်အီၤ,ကစၢ်ဧၢ,ဟဲကွၢ်တက့ၢ်.
35ဒီးယ့ၣ်ရှူးအမဲာ်ထံလီၤဝဲလီၤ.
36မၤသးဒ်န့ၣ်ဒီးပှၤယူဒၤဖိစံးဝဲဒၣ်,ကွၢ်ကွၢ်,မ့ၢ်အအဲၣ်အီၤဆံးဒိၣ်လဲၣ်.
37ဒီးပှၤလၢအကျါတနီၤနီၤစံးဝဲဒၣ်,ပှၤလၢအဒုးထံၣ်ထီၣ်က့ၤပှၤမဲာ်ဘျီၣ်တဂၤန့ၣ်,ဒ်သိးပှၤအံၤသုတသံတဂ့ၤဒီး,မၤဝဲတသ့ဘၣ်ဧါ.
38မၤသးဒ်န့ၣ်ဒီးယ့ၣ်ရှူးကအုကစွါကဒီးလၢအသးကံၢ်ပူၤ,ဒီးဟဲပၢၢ်လၢတၢ်သွၣ်ခိၣ်အလီၢ်,ဒီးမ့ၢ်ဟီၣ်ခိၣ်အအိပူၤလီၤ.ဒီးကျၢၢ်ဘၢအသးလၢလၢၢ်လီၤ.
39ယ့ၣ်ရှူးစံးဝဲဒၣ်,ဟံးထီၣ်ကွံာ်လၢၢ်န့ၣ်တက့ၢ်.ဒီးပှၤလၢအသံအဒီပုၢ်ဝဲၢ်မုၣ်,နီၢ်မၢ်သၤတဂၤ,စံးဘၣ်အီၤ,ကစၢ်ဧၢ,ခဲကနံၣ်အံၤအိၣ်တ့ၢ်လံလွံၢ်နံၤလံ.ဒီးကနၢအုၣ်လီၤ.
40ဒီးယ့ၣ်ရှူးစံးဘၣ်အီၤ,ယစံးဘၣ်တဲဘၣ်နၤလၢနမ့ၢ်နာ်တၢ်ဒီး,နကထံၣ်ဘၣ်ယွၤအလၤအကပီၤ,တမ့ၢ်ဘၣ်ဧါ.
41မၤသးဒ်န့ၣ်ဒီးပှၤတဖၣ်ဟံးထီၣ်ကွံာ်လၢၢ်န့ၣ်လီၤ.ဒီးယ့ၣ်ရှူးကျ့ထီၣ်အမဲာ်ဒီးစံးဝဲဒၣ်,ပၢ်ဧၢ,ယစံးထီၣ်ပတြၢၤနဘျုးနဖှိၣ်,လၢနကနၣ်ယကလုၢ်လီၤ.
42ဒီးယသ့ၣ်ညါလၢနကနၣ်ဒၣ်ယကလုၢ်တဘိယူၢ်ဃီလီၤ.မ့မ့ၢ်ဒ်သိးပှၤဂီၢ်မုၢ်အိၣ်ဝးတရံးယၤအံၤ,ကနာ်ဝဲလၢနမၢလီၤယၤဒီး,ယစံးတၢ်လၢအဝဲသ့ၣ်အဂီၢ်လီၤ.
43ဒီးစံးတၢ်န့ၣ်တဖၣ်ဒီးကိးပသူထီၣ်လၢအကလုၢ်ဖးဒိၣ်,စီၤလါစရူးဧၢ,ဟဲက့ၤထီၣ်တက့ၢ်.
44ဒီးပှၤလၢအသံတ့ၢ်တဂၤန့ၣ်,ဟဲက့ၤထီၣ်ဒီးအစုအခီၣ်ဘိၣ်ဃာ်အသးလၢတၢ်ကံးညာ်,ဒီးအမဲာ်ကျၢၢ်ဘၢဃာ်အသးလၢတၢ်စှၢၤလီၤ.ဒီးယ့ၣ်ရှူးစံးဘၣ်အဝဲသ့ၣ်,ဃ့ၣ်လီၤကွံာ်အီၤ,ဒီးပျၢ်ကွံာ်အီၤတက့ၢ်.
45မၤသးဒ်န့ၣ်ဒီးပှၤယူဒၤဖိလၢအဟဲဆူနီၢ်မၤရံအအိၣ်ဒီးထံၣ်ယ့ၣ်ရှူးအမၤတၢ်ဒီး,နာ်အီၤအါဂၤလီၤ.
46မ့မ့ၢ်တနီၤနီၤလဲၤဝဲဆူပှၤဖၤရံၤၡဲအအိၣ်,ဒီးစံးဘၣ်တဲဘၣ်အီၤလၢတၢ်လၢယ့ၣ်ရှူးမၤဝဲန့ၣ်လီၤ.
47မၤသးဒ်န့ၣ်ဒီးပှၤလုၢ်တၢ်အခိၣ်ဒီးပှၤဖၤရံၤၡဲသ့ၣ်တဖၣ်န့ၣ်,ဒုးအိၣ်ဖှိၣ်ရိဖှိၣ်ပှၤကူၣ်လိာ်အသးဒီးစံးဝဲဒၣ်,မ့ၢ်ပကမၤဒ်လဲၣ်.အဂ့ၢ်ဒ်အံၤ,ပှၤတဂၤအံၤမၤတၢ်လီၤလးအါမးလီၤ.
48ပမ့ၢ်ပျဲမၤအီၤဒ်န့ၣ်ဒီး,ပှၤခဲလၢာ်ကစူၢ်က့ၤနာ်က့ၤအီၤ,ဒီးပှၤရိမ့ၤဖိကဟဲမၤဟးဂီၤကွံာ်ပလီၢ်,ဒီးပပှၤတကလုာ်အံၤလီၤ.
49ဒီးပှၤလၢအကျါ,စီၤကၤယါဖၤတဂၤ,လၢအမ့ၢ်ပှၤလုၢ်တၢ်အခိၣ်လၢနံၣ်တနံၣ်န့ၣ်,စံးဘၣ်အီၤ,သုဝဲသ့ၣ်အံၤ,သုတသ့ၣ်ညါဘၣ်တၢ်နီတမံၤဘၣ်.
50ဒီးလၢပှၤတဂၤသံဝဲလၢပှၤဂီၢ်မုၢ်အဂီၢ်,ဂ့ၤန့ၢ်ပှၤဒီကလုာ်ညါဟးဂီၤကွံာ်ဝဲန့ၣ်,သုတဆိကမိၣ်ဘၣ်.
51စံးတၢ်န့ၣ်,တမ့ၢ်ဘၣ်အစံးဒၣ်ဝဲဘၣ်.မ့ၢ်ဝဲလၢပှၤလုၢ်တၢ်အခိၣ်လၢနံၣ်တနံၣ်န့ၣ်သတးဒီး,ကတိၤတၢ်လၢဝံအကျိာ်,လၢယ့ၣ်ရှူးကသံလၢပှၤတကလုာ်န့ၣ်အဂီၢ်လီၤ.
52ဒီးတမ့ၢ်ဘၣ်ထဲပှၤတကလုာ်န့ၣ်ဧိၤအဂီၢ်ဘၣ်.မ့ၢ်ဒ်သိးယွၤအဖိလီၤမုၢ်လီၤဖးတဖၣ်န့ၣ်ကအိၣ်ဖှိၣ်ဝဲတမံၤဃီအဂီၢ်လီၤ.
53မၤသးဒ်န့ၣ်ဒီးလၢမုၢ်တနံၤန့ၣ်လံၤလံၤဒီး,အဝဲသ့ၣ်တဖၣ်န့ၣ်ကူၣ်လိာ်အသးဒ်သိးအကမၤသံအီၤလီၤ.
54မၤသးဒ်န့ၣ်ဒီးယ့ၣ်ရှူးတလဲၤအိၣ်ဖျါဘၣ်လၢပှၤယူဒၤဖိအကျါဘၣ်.မ့ၢ်အဟးထီၣ်ကွံာ်ဖဲန့ၣ်,ဒီးလဲၤဆူဝ့ၢ်လၢတၢ်ကိးဝဲလၢအ့ဖရဲၣ်လၢကီၢ်တဘ့ၣ်,ဘူးဒီးပှၢ်မုၢ်ကနၢ,ဒီးအိၣ်ဝဲဒီးအပျဲၢ်အဘီၣ်ဖဲန့ၣ်လီၤ.
55ဒီးပှၤယူဒၤဖိအဘူၣ်လဲၤကပာ်အိၣ်ဘူးထီၣ်,ဒီးဘူၣ်လဲၤကပာ်တချုးဘၣ်ဒံးဘၣ်ဒီး,ပှၤအါဂၤဒ်သိးအကမၤကဆှီအသးဒီး,လဲၤထီၣ်လၢကီၢ်န့ၣ်ဆူယရူၤၡလ့ၣ်လီၤ.
56မၤသးဒ်န့ၣ်ဒီးအဝဲသ့ၣ်ဃုယ့ၣ်ရှူး,ဒီးဆၢထၢၣ်လၢတၢ်လုၢ်အဟံၣ်ပူၤ,ဒီးကတိၤလိာ်အသး,သုဆိကမိၣ်ဒ်လဲၣ်.တဟဲဘၣ်ဆူဘူၣ်ပူၤအံၤဧါ.
57ဒီးပှၤလုၢ်တၢ်အဒိၣ်,ဒီးပှၤဖၤရံၤၡဲသ့ၣ်တဖၣ်န့ၣ်,ပာ်လီၤအကလုၢ်ဒ်သိးပှၤမ့ၢ်သ့ၣ်ညါအအိၣ်အလီၢ်တဂၤဂၤဒီး,ကဘၣ်ဒုးနဲၣ်ဝဲဒ်သိးအကဟံးဃာ်အီၤလီၤ.