John 16
1ဒ်သိးသုသုတဘၣ်တၢ်လီၤကမၣ်အလီၢ်တဂ့ၤဒီး,ယစံးဘၣ်တဲဘၣ်လံသုလၢတၢ်တဖၣ်န့ၣ်လံ.
2ပှၤကဟီထီၣ်ကွံာ်သုလၢဘူၣ်ဘျီၣ်ပူၤ,ဒီးအဆၢအကတီၢ်ကဘၣ်ဝဲလၢကယဲၢ်ပှၤလၢအမၤသံသုန့ၣ်,ကဆိကမိၣ်လၢအမၤယွၤအတၢ်လီၤ.
3မ့ၢ်အတသ့ၣ်ညါဘၣ်ပၢ်မ့ၢ်ဂ့ၤ,ယၤမ့ၢ်ဂ့ၤ,အဃိဒီး,ကမၤတၢ်န့ၣ်တဖၣ်လီၤ.
4မ့မ့ၢ်တၢ်န့ၣ်တဖၣ်ယစံးဘၣ်သု,ဒ်သိးတုၤမ့ၢ်အနၣ်ရံၣ်ဘၣ်ဒီး,သုကသ့ၣ်နီၣ်ထီၣ်က့ၤအီၤ,လၢယစံးဘၣ်တဲဘၣ်တ့ၢ်သုလီၤ.တၢ်န့ၣ်တဖၣ်ယတစံးဘၣ်သုလၢအခီၣ်ထံးဘၣ်.အဂ့ၢ်ဒ်အံၤ,မ့ၢ်ယအိၣ်ဒံးဒီးသုလီၤ.
5မ့မ့ၢ်ခဲကနံၣ်အံၤ,ယကက့ၤဆူပှၤလၢအမၢလီၤယၤတဂၤအအိၣ်,ဒီးသုတသံကွၢ်ဘၣ်ယၤလၢနကလဲၤဆူလဲၣ်ဆူလဲၣ်န့ၣ်နီတဂၤဘၣ်.
6ဘၣ်ဆၣ်ဒီးမ့ၢ်ယစံးဘၣ်သုလၢတၢ်န့ၣ်တဖၣ်အဃိဒီး,သုသးအုးပှဲၤဆၢၣ်ကလာ်လီၤ.
7ဘၣ်ဆၣ်ဒီးယစံးဘၣ်သုလၢတၢ်မ့ၢ်တၢ်တီ,ယလဲၤတၢ်န့ၣ်,မ့ၢ်အဂ့ၤဒၣ်တၢ်လၢသုဂီၢ်လီၤ.အဂ့ၢ်ဒ်အံၤ,ယမ့ၢ်တလဲၤဘၣ်ဒီး,ပှၤမၤစၢၤတၢ်တဂၤ,တဟဲဘၣ်ဆူသုအိၣ်ဘၣ်.မ့မ့ၢ်ယမ့ၢ်လဲၤဒီး,ယကမၢအဟဲလီၤဆူသုအိၣ်လီၤ.
8ဒီးတုၤအဟဲဝဲဒီး,ကသိၣ်ဃီၣ်ဟီၣ်ခိၣ်လၢတၢ်ဒဲးဘးအဂ့ၢ်,ဒီးလၢတၢ်တီတၢ်လိၤအဂ့ၢ်,ဒီးလၢတၢ်စံၣ်ညီၣ်အဂ့ၢ်လီၤ.
9လၢတၢ်ဒဲးဘးအဂ့ၢ်လၢအတစူၢ်တနာ်ဘၣ်ယၤအဃိ,
10လၢတၢ်တီတၢ်လိၤအဂ့ၢ်လၢယလဲၤထီၣ်ဆူပၢ်အအိၣ်ဒီးသုတထံၣ်လၢၤဘၣ်ယၤအဃိ,
11ဒီးလၢတၢ်စံၣ်ညီၣ်အဂ့ၢ်,လၢဟီၣ်ခိၣ်အခိၣ်ဘၣ်တၢ်စံၣ်ညီၣ်အီၤအဃိလီၤ.
12ယကတိၤတၢ်ဒီးသုအလီၢ်အိၣ်ဒံးလၢအအါ,ဘၣ်ဆၣ်ဒီးခဲကနံၣ်အံၤသုဒိးန့ၢ်တကဲဘၣ်.
13မ့မ့ၢ်သးလၢအဘၣ်ဃးဒီးတၢ်မ့ၢ်တၢ်တီန့ၣ်,တုၤအဟဲဝဲဒီး,ကဆှၢသုဆူတၢ်မ့ၢ်တၢ်တီခဲလၢာ်အပူၤလီၤ.အဂ့ၢ်ဒ်အံၤ,တကတိၤဘၣ်လၢအဂ့ၢ်ဒၣ်ဝဲဘၣ်.မ့မ့ၢ်ဖဲဒၣ်အနၢ်ဟူတၢ်ဒီး,ကကတိၤဝဲဒီးကစံၣ်တဲၤတဲလီၤသုတၢ်လၢအကဟဲတဖၣ်န့ၣ်လီၤ.
14အဝဲဒၣ်ကမၤဖျါထီၣ်ယလၤယကပီၤလီၤ.အဂ့ၢ်ဒ်အံၤ,ကဟံးန့ၢ်တၢ်ဘၣ်ဃးဒီးယၤ,ဒီးကစံၣ်တဲၤတဲလီၤသုလီၤ.
15ကယဲၢ်ပၢ်အတၢ်တမံၤလၢ်လၢ်န့ၣ်,မ့ၢ်ယတၢ်လီၤ.မ်ဒ်န့ၣ်ဒီး,ယစံးဘၣ်တဲဘၣ်သုလၢအကဟံးန့ၢ်ယတၢ်ဒီးယကစံၣ်တဲၤတဲလီၤသုလီၤ.
16တစိၢ်ဖိဒီး,သုတထံၣ်ဘၣ်ယၤဘၣ်.မၤကဒီးတစိၢ်ဖိဒီး,သုကထံၣ်ယၤလီၤ.အဂ့ၢ်ဒ်အံၤ,ယလဲၤထီၣ်ဆူယပၢ်အအိၣ်လီၤ.
17မၤသးဒ်န့ၣ်ဒီးအပျဲၢ်အဘီၣ်တနီၤနီၤစံးလိာ်အသး,တၢ်လၢအစံးဝဲ,တစိၢ်ဖိဒီးသုတထံၣ်ဘၣ်ယၤဘၣ်,မၤကဒီးတစိၢ်ဖိဒီးသုကထံၣ်ဘၣ်ယၤလီၤ.ဒီးအဂ့ၢ်ဒ်အံၤ,ယလဲၤထီၣ်ဆူယပၢ်အအိၣ်န့ၣ်,မ့ၢ်အစံးတၢ်မနုၤလဲၣ်.
18မၤသးဒ်န့ၣ်ဒီးအဝဲသ့ၣ်စံးဝဲ,တၢ်လၢအစံး,တၢ်တစိၢ်ဖိအံၤ,မ့ၢ်မနုၤလဲၣ်.မ့ၢ်အစံးမနုၤမနုၤပတသ့ၣ်ညါဘၣ်.
19မၤသးဒ်န့ၣ်ဒီးယ့ၣ်ရှူးသ့ၣ်ညါဝဲလၢအဝဲသ့ၣ်တၢ်မိၣ်သံကွၢ်အသးလၢအီၤဒီး,စံးဘၣ်အီၤ,ယစံးဘၣ်တဲဘၣ်သု,တစိၢ်ဖိဒီးသုတထံၣ်ဘၣ်ယၤဘၣ်,ဒီးမၤကဒီးတစိၢ်ဖိဒီးသုကထံၣ်ဘၣ်ယၤအဂ့ၢ်န့ၣ်,မ့ၢ်သုသံကွၢ်လိာ်သုသးဧါ.
20ယစံးဘၣ်တဲဘၣ်သုတီတီလိၤလိၤ,လၢသုမဲာ်ထံကလီၤ,ဒီးသုကဟီၣ်ကယၢၤလီၤ.မ့မ့ၢ်ဟီၣ်ခိၣ်န့ၣ်ကသးခုလီၤ.ဒီးသုဝဲဒၣ်အံၤ,သုကသူၣ်အုးသးအုး,ဘၣ်ဆၣ်ဒီးသုတၢ်သးအုးန့ၣ်ကကဲကဒါက့ၤလၢတၢ်သးခုလီၤ.ပိာ်မုၣ်တုၤအဆံးစၢ်အဖိဒီး,သူၣ်အုးသးအုးလီၤ.
21အဂ့ၢ်ဒ်အံၤ,အမုၢ်အလါဘၣ်လံ.မ့မ့ၢ်တုၤဖိသၣ်အိၣ်ဖျဲၣ်ဝဲဒီး,သးခုဝဲလၢပှၤကညီတဂၤအိၣ်ဖျဲၣ်လၢဟီၣ်ခိၣ်ချၢသတးဒီး,တသ့ၣ်နီၣ်ထီၣ်က့ၤလၢၤဘၣ်အတၢ်နးတၢ်ဖှီၣ်ဘၣ်.
22မၤသးဒ်န့ၣ်ဒီး,ခဲကနံၣ်အံၤ,သုသူၣ်အုးသးအုးဘၣ်ဆၣ်ဒီး,ယကထံၣ်က့ၤကဒီးသု,ဒီးသုကသူၣ်ခုသးခု,ဒီးသုတၢ်သးခုန့ၣ်,ပှၤတဟံးထီၣ်ကွံာ်လၢသုနီတဂၤဘၣ်.
23တၢ်လၢမုၢ်တနံၤန့ၣ်,သုတသံကွၢ်ယၤလၢတၢ်နီတမံၤဘၣ်.ယစံးဘၣ်တဲဘၣ်သုတီတီလိၤလိၤ,ဖဲဒၣ်သုဃ့တၢ်လၢယမံၤလၢပၢ်န့ၣ်,ကဟ့ၣ်ဝဲလၢသုလီၤ.
24တုၤလီၤခဲကနံၣ်အံၤ,သုတဃ့ဒံးဘၣ်တၢ်လၢယမံၤနီတမံၤဘၣ်.ဃ့တၢ်တက့ၢ်,ဒီးသုကန့ၢ်တၢ်,ဒ်သိးသုတၢ်သးခုကလၢထီၣ်ပှဲၤထီၣ်လီၤ.
25တၢ်တဖၣ်န့ၣ်ယစံးဘၣ်တဲဘၣ်သုလံ.လၢတၢ်ကတိၤအဒိလံ.မ့မ့ၢ်တၢ်အဆၢအကတီၢ်ကဘၣ်ဝဲ,လၢယတစံးဘၣ်တဲဘၣ်လၢၤဘၣ်သုလၢတၢ်ကတိၤအဒိဘၣ်.မ့ၢ်ယကစံးဘၣ်တဲဘၣ်သုလၢပၢ်အဂ့ၢ်အကျိၤစၢၢ်ဆၢပံာ်ကလာ်လီၤ.
26လၢမုၢ်တနံၤန့ၣ်,သုကဃ့တၢ်လၢယမံၤ,ဒီးယတစံးဘၣ်တဲဘၣ်သုလၢယကဃ့န့ၢ်သုဂီၢ်လၢပၢ်န့ၣ်ဘၣ်.
27အဂ့ၢ်ဒ်အံၤ,ပၢ်အကစၢ်ဒၣ်ဝဲအဲၣ်သုလၢသုအဲၣ်ယၤ,ဒီးလၢသုနာ်လၢယဟဲလၢယွၤအအိၣ်အဃိလီၤ.
28ယဟဲထီၣ်လၢပၢ်အအိၣ်,ဒီးယဟဲလီၤဆူဟီၣ်ခိၣ်ချၢအံၤလီၤ.မၤကဒီးတစု,ယကဟးထီၣ်ကွံာ်လၢဟီၣ်ခိၣ်,ဒီးယကလဲၤထီၣ်က့ၤဆူပၢ်အအိၣ်လီၤ.
29အပျဲၢ်အဘီၣ်စံးဘၣ်အီၤ,ကွၢ်ကွၢ်,ခဲကနံၣ်အံၤနကတိၤတၢ်စၢၢ်ဆၢပံာ်ကလာ်,ဒီးနတကတိၤဘၣ်လၢတၢ်ကတိၤအဒိဘၣ်.
30ခဲကနံၣ်အံၤ,ပသ့ၣ်ညါလၢနသ့ၣ်ညါတၢ်ခဲလၢာ်,ဒီးပှၤတဂၤဂၤသံကွၢ်နၤအလီၢ်တအိၣ်ဘၣ်.လၢတၢ်အံၤအဃိ,ပနာ်လၢနဟဲလၢယွၤအအိၣ်လီၤ.
31ယ့ၣ်ရှူးစံးဆၢအီၤ,မ့ၢ်သုနာ်တၢ်ခဲကနံၣ်အံၤဧါ.
32ကွၢ်ကွၢ်,တၢ်အဆၢအကတီၢ်ကဘၣ်,ဒီးဘၣ်ခဲကနံၣ်အံၤ,လၢသုကလီၤပြံလီၤပြါ,တဂၤဆူအလီၢ်ဒၣ်ဝဲ,တဂၤဆူအလီၢ်ဒၣ်ဝဲ,ဒီးသုကလဲၤသဒၣ်ယၤ,ဒီးသုကပာ်လီၤတဲာ်ယၤတဂၤဃီလီၤ.ဘၣ်ဆၣ်ဒီးယတအိၣ်ဘၣ်တဂၤဃီဘၣ်.အဂ့ၢ်ဒ်အံၤ,ပၢ်အိၣ်ဒီးယၤလီၤ.
33ယစံးဘၣ်သုလၢတၢ်န့ၣ်တဖၣ်,ဒ်သိးသုကအိၣ်ဒီးတၢ်ဃူတၢ်ဖိးလၢယပူၤလီၤ.လၢဟီၣ်ခိၣ်အံၤ,သုကဘၣ်တၢ်ဖှီၣ်လီၤ.ဘၣ်ဆၣ်ဒီးပာ်သုသးခူတလ့ၢ်တက့ၢ်.ယမၤနၢၤလံဟီၣ်ခိၣ်လံ.