Acts 13
1ဒီးဝံဒီးသရၣ်တနီၤနီၤ,ဒ်ပစံးတၢ်အသိး,စီၤဘၢ်နါဘၤ,ဒီးစီၤစူၤမ့းအိၣ်လၢပှၤကိးဝဲလၢစီၤနံက့ၢ်,ဒီးပှၤကူၤရ့ၤန့ဖိစီၤလူၤကံ,ဒီးစီၤမနၤအ့ၣ်လၢအဒိၣ်ထီၣ်ဃုာ်ဒီးပဒိၣ်ဟ့ၤရိာ်,ဒီးစီၤစီလူးသ့ၣ်တဖၣ်အိၣ်ဝဲလၢတၢ်အိၣ်ဖှိၣ်အပူၤလၢအၣ်တံၤအီာ်န့ၣ်လီၤ.
2ဒီးဖဲအမၤကစၢ်အတၢ်,ဒီးဒုၣ်တၢ်အီၣ်တၢ်အီအဖၢမုၢ်ဒီး,သးစီဆှံန့ၣ်စံးဝဲဒၣ်,နီၤဖးန့ၢ်ယၤလၢစီၤဘၢ်နါဘၤ,ဒီးစီၤစီလူးလၢတၢ်မၤလၢယကိးက့ၤအီၤအဂီၢ်တက့ၢ်.
3တုၤနုၤတစုဒုၣ်တၢ်အီၣ်တၢ်အီ,ဒီးဘါထုကဖၣ်တၢ်,ဒီးပာ်အစုလၢအလိၤဒီး,ပျၢ်အီၤလီၤ.
4မၤသးဒ်န့ၣ်ဒီး,အဝဲသ့ၣ်ဒိးမၢအသးလၢသးစီဆှံန့ၣ်ဒီး,လဲၤလီၤဝဲဆူစ့းလူကံၤလီၤ.ဒီးဟးဖးဖဲန့ၣ်ဒီး,ဒိးကဘီဆူကူပြူးလီၤ.
5ဒီးတုၤဝဲလၢစလၤမံအပူၤဒီး,စံၣ်တဲၤတဲလီၤယွၤအကလုၢ်အကထါလၢပှၤယူဒၤဖိအဘူၣ်ဘျီၣ်တဖၣ်အပူၤလီၤ.ဒီးအိၣ်ဝဲဒီးစီၤယိၤဟၣ်လၢပှၤမၤစၢၤအီၤလီၤ.
6ဒီးလဲၤခီဂာ်ကီးဒီကီးညါပၢၢ်လၢပါပူးဒီး,ထံၣ်ပှၤမၤကူးဖိ,ဝံအဘျၣ်,ပှၤယူဒၤဖိအမံၤစီၤဘၢ်ယ့ၣ်ရှူးတဂၤလီၤ.
7အဝဲန့ၣ်အိၣ်ဒီးကီးအပဒိၣ်,ပှၤအသူၣ်ဆးအသးဆးစီၤစ့ၢ်ကံပီလူးလီၤ.အဝဲဒၣ်တၢ်မိၣ်နၢ်ဟူအသးလၢယွၤအကလုၢ်အကထါ,ဒီးကိးက့ၤစီၤဘၢ်နါဘၤ,ဒီးစီၤစီလူးလီၤ.
8မ့မ့ၢ်စီၤအ့းလူမၤ,ပှၤမၤကူးဖိတဂၤ,(အဂ့ၢ်ဒ်အံၤ,အမံၤအခီပညီမ့ၢ်ဒ်န့ၣ်),ဃုမၤဃၣ်ကွံာ်ကီးအပဒိၣ်အသးလၢတၢ်စူၢ်တၢ်နာ်န့ၣ်လီၤ.
9ဒီးစီၤစီလူး,ဒ်ပစံးတၢ်အသိး,စီၤပီလူးတဂၤ,လၢထီၣ်ပှဲၤထီၣ်ဒီးသးစီဆှံ,ဒီးကွၢ်ထံအီၤ,
10ဒီးစံးဝဲဒၣ်,ပှၤလၢပှဲၤဒီးတၢ်လီတၢ်ဝ့ၤ,ဒီးတၢ်အၢတၢ်သီခဲလၢာ်,မုၣ်ကီၤလံၢ်အဖိခွါ,တၢ်တီတၢ်လိၤခဲလၢာ်အဒုၣ်အဒါတဂၤဧၢ,နဘိးကဒါကွံာ်ယွၤအကျဲတီကျဲလိၤန့ၣ်,နတအိၣ်ကတီၢ်ဘၣ်ဧါ.
11ဒီးကွၢ်ကွၢ်,ခဲကနံၣ်အံၤယွၤအစုအိၣ်လၢနလိၤ,ဒီးနကအိၣ်မဲာ်ဘျီၣ်,ဒီးနတထံၣ်ဘၣ်မုၢ်ဧိၤလါဧိၤတုၤအကတီၢ်ဘၣ်လီၤ.ဒီးတၢ်အၢၣ်,ဒီးတၢ်ခံးလီၤဘၣ်အီၤတကီၢ်ခါ,ဒီးဟးဝ့ၤဝီၤဃုပှၤဆှၢအီၤလၢအစုလီၤ.
12တုၤနုၤတဘျီကီးအပဒိၣ်ထံၣ်တၢ်မၤအသးဒီး,ပာ်အသးကမၢကမၣ်လၢကစၢ်အတၢ်သိၣ်တၢ်သီအဃိ,ဒီးစူၢ်က့ၤနာ်က့ၤဝဲလီၤ.
13ဒီးစီၤပီလူးဒီးပှၤအိၣ်ဒီးအီၤတဖၣ်ဟးထီၣ်ဝဲလၢပါပူး,ဒီးလဲၤဝဲဆူပ့ၢ်က့ၤလၢအဘၣ်ဃးဒီးပၣ်ဖူၤလံလီၤ.ဒီးစီၤယိၤဟၣ်ဟးဖးဒီးအီၤ,ဒီးက့ၤက့ၤဝဲဆူယရူၤၡလ့ၣ်လီၤ.
14ဒီးအဝဲသ့ၣ်ဟးထီၣ်လၢပ့ၢ်က့ၤဒီးလဲၤဝဲဆူအၣ်တံၤအီာ်လၢအဘၣ်ဃးဒီးကီၢ်ပံၤစံၤဒံ,ဒီးလၢမုၢ်အိၣ်ဘှံးအနံၤန့ၣ်,လဲၤနုာ်ဝဲဆူဘူၣ်ဘျီၣ်ပူၤဒီး,ဆ့ၣ်နီၤဝဲလီၤ.
15ဒီးပှၤဖးလံာ်တၢ်သိၣ်တၢ်သီဒီးဝံတဖၣ်အကလုၢ်အကထါဝံၤဒီး,ပှၤဘူၣ်ဘျီၣ်အခိၣ်တဖၣ်မၢပှၤလဲၤစံးဘၣ်အီၤ,ပှၤပုၢ်သ့ၣ်ဝဲၢ်သ့ၣ်ဧၢ,တၢ်ကတိၤသဆၣ်ထီၣ်ပှၤဂီၢ်မုၢ်အခံမ့ၢ်အိၣ်ဒီးသုဒီး,ကတိၤတၢ်တက့ၢ်.
16ဒီးစီၤပီလူးဂဲၤဆၢထၢၣ်ဒီးဝံၢ်ဝၢ်အစု,ဒီးစံးဝဲဒၣ်,ပှၤအံၣ်စရ့လးဖိ,ဒီးပှၤပျံၤယွၤသ့ၣ်ဧၢ,ဒိကနၣ်တက့ၢ်.
17ပှၤတကလုာ်အံၤအကစၢ်,ဃုထၢပပၢ်သ့ၣ်,ဒီးပာ်ထီၣ်ပာ်ထီပှၤဂီၢ်မုၢ်န့ၣ်ဖဲအအိၣ်တမှံၤလၢကီၢ်အဲၤကူပတူးအပူၤ,ဒီးစိာ်ထီၣ်ကွံာ်အီၤဖဲန့ၣ်,လၢအစုယူာ်ထီၣ်အသးလီၤ.
18ဒီးလုၢ်အီၣ်လုၢ်အီအီၤလၢပှၢ်မုၢ်ကနၢအနံၣ်လွံၢ်ဆံဃၣ်ဃၣ်လီၤ.
19ဒီးဟီထီၣ်ကွံာ်ပှၤနွံကလုာ်လၢကီၢ်ကနၤဧၣ်ဒီးဟ့ၣ်လီၤအထံအကီၢ်လၢတၢ်န့ၢ်သါအဂီၢ်လီၤ.
20ဒီးလၢခံက့ၤဟ့ၣ်လီၤအပှၤစံၣ်ညီၣ်ကွီၢ်တဖၣ်တုၤလီၤလၢဝံစီၤၡမူၤအ့လး,အနံၣ်လွံၢ်ကယၤယဲၢ်ဆံဃၣ်ဃၣ်လီၤ.
21ဒီးလၢခံက့ၤန့ၣ်အဝဲသ့ၣ်ဃ့စီၤပၤ,ဒီးယွၤဟ့ၣ်အီၤလၢပှၤဘံၣ်ယၤမံၣ်အဒူၣ်ဖိ,စီၤကံၣ်အဖိခွါ,စီၤစီလူးပှဲၤထီၣ်အနံၣ်လွံၢ်ဆံလီၤ.
22ဒီးပာ်ကွံာ်အီၤဒီး,ပာ်ထီၣ်စီၤဒၤဝံးလၢစီၤပၤ,ဒီးအုၣ်အသးလၢအဂီၢ်ဒီးစံးဝဲဒၣ်,ယထံၣ်န့ၢ်ပှၤလၢအဘၣ်ယသးတဂၤလၢအကမၤတၢ်ခဲလၢာ်ဖဲယသး,စီၤယံးၡဲအဖိခွါ,စီၤဒၤဝံးလီၤ.
23လၢအဝဲဒၣ်အချံအသၣ်,ဒ်အစံးပာ်ဝဲအသိး,ယွၤဒုးအိၣ်ထီၣ်ပှၤအုၣ်က့ၤခီၣ်က့ၤတၢ်,ယ့ၣ်ရှူးလၢအံၣ်စရ့လးအဂီၢ်လီၤ.
24လၢအဝဲဒၣ်န့ၣ်တချုးဟဲဒံးဘၣ်ဒီး,စီၤယိၤဟၣ်စံၣ်တဲၤတဲလီၤတၢ်ဘျၢဘၣ်ဃးဒီးတၢ်ပီၢ်ယၢ်လီၤက့ၤပသးလၢပှၤအံၣ်စရ့လးဖိခဲလၢာ်လီၤ.
25ဒီးဖဲစီၤယိၤဟၣ်မၤအတၢ်ကလၢာ်တ့ၢ်ဒီး,စံးဝဲဒၣ်,သုဆိကမိၣ်လၢယမ့ၢ်မတၤတဂၤလဲၣ်.တမ့ၢ်ဘၣ်ယၤဘၣ်.ဘၣ်ဆၣ်ဒီးကွၢ်ကွၢ်,ပှၤဟဲလၢယလီၢ်ခံတဂၤ,လၢအခီၣ်အခီၣ်ဖံးန့ၣ်,ယဃ့ၣ်လီၤယတကြၢးဘၣ်ယဲဘၣ်.
26ပှၤပုၢ်သ့ၣ်ဝဲၢ်သ့ၣ်,စီၤအၤဘြၤဟၣ်အဖိခွါတဖၣ်,ဒီးပှၤပျံၤယွၤလၢသုကျါသ့ၣ်ဧၢ,တၢ်အုၣ်က့ၤခီၣ်က့ၤအကလုၢ်ကထါအံၤ,တၢ်ဟ့ၣ်ယုၢ်သုလီၤ.
27အဂ့ၢ်ဒ်အံၤ,ပှၤအိၣ်ဝဲဆိးဝဲလၢယရူၤၡလ့ၣ်အပူၤ,အပဒိၣ်ပပှၢ်တသ့ၣ်ညါဘၣ်အီၤဒီးဝံတဖၣ်အကလုၢ်အကထါလၢပှၤဖးကိးမုၢ်အိၣ်ဘှံးအနံၤဒဲးန့ၣ်သတးဒီး,မၤလၢထီၣ်ပှဲၤထီၣ်ဝဲဒီး,စံၣ်ညီၣ်ဃၣ်အီၤလီၤ.
28ဒီးဂ့ၤဘၣ်သံအတၢ်ကမၣ်တထံၣ်န့ၢ်ဘၣ်နာ်သက့ဒီး,ဃ့ကညးစီၤပံၤလး,ဒ်သိးအကမၤသံအီၤလီၤ.
29ဒီးတုၤအဝဲသ့ၣ်မၤလၢထီၣ်ပှဲၤထီၣ်ကယဲၢ်တၢ်ကွဲးအသးလၢအဂ့ၢ်အကျိၤ,စိာ်လီၤကွံာ်အီၤလၢထူၣ်အလိၤ,ဒီးပာ်နုာ်အီၤလၢတၢ်သွၣ်ခိၣ်အပူၤလီၤ.
30ဘၣ်ဆၣ်ဒီးယွၤဒုးဂဲၤဆၢထၢၣ်က့ၤအီၤလၢတၢ်သံလီၤ.
31ဒီးအိၣ်ဖျါထီၣ်လၢပှၤဟဲပိာ်အခံလၢကၤလံၤလါဆူယရူၤၡလ့ၣ်သ့ၣ်တဖၣ်အမဲာ်ညါအါနံၤအါသီလီၤ.အဝဲသ့ၣ်မ့ၢ်ပှၤအုၣ်အသးလၢပှၤဂီၢ်မုၢ်အမဲာ်ညါခဲကနံၣ်အံၤလီၤ.
32ဒီးပဝဲဒၣ်အံၤ,ပစံၣ်တဲၤတဲလီၤသုလၢတၢ်သးခုအကစီၣ်လၢတၢ်စံးပာ်အီၤလၢပပၢ်သ့ၣ်တဖၣ်လီၤ.
33ယွၤဒုးဂဲၤဆၢထၢၣ်က့ၤယ့ၣ်ရှူးသတးဒီး,မၤလၢထီၣ်ပှဲၤထီၣ်တၢ်အံၤလၢအဝဲသ့ၣ်အဖိပဝဲဒၣ်အဂီၢ်,ဒ်တၢ်ကွဲးအသးလၢလံာ်စံးထီၣ်ပတြၢၤခံတီၤတတီၤအသိး,နဲဒၣ်အံၤ,နမ့ၢ်ယဖိခွါလီၤ.ယမၤလိာ်ထီၣ်လံနၤလၢမုၢ်မဆါတနံၤအံၤလံ.
34လၢန့ၣ်အမဲာ်ညါဒုးဂဲၤဆၢထၢၣ်က့ၤအီၤလၢတၢ်သံ,ဒ်သိးအသုတက့ၤလၢၤဆူတၢ်အုၣ်တၢ်ကျၣ်တဂ့ၤ.ဒီးစံးဝဲဒ်အံၤ,ယကဟ့ၣ်သုလၢတၢ်စံးပာ်အစီအဆှံ,ဒီးအဂၢၢ်အကျၢၤ,ဘၣ်ဃးဒီးစီၤဒၤဝံးလီၤ.
35မ်ဒ်န့ၣ်ဒီးလၢတပူၤဒၣ်တၢ်စံးဝဲဒၣ်,နတဒုးထံၣ်ဘၣ်နပှၤစီဆှံလၢတၢ်အုၣ်သံဘၣ်.
36အဂ့ၢ်ဒ်အံၤ,စီၤဒၤဝံးမၤပှၤတစိၤဒီးအီၤအတၢ်ဒ်ယွၤအသးအသိးန့ၣ်ဝံၤဒီး,မံဝဲ,ဒီးပှၤပာ်ဖှိၣ်အီၤဒီးအပၢ်တဖၣ်ဒီး,ထံၣ်တၢ်အုၣ်သံလီၤ.
37မ့မ့ၢ်ပှၤလၢယွၤဒုးဂဲၤဆၢထၢၣ်က့ၤအီၤတဂၤအံၤ,တထံၣ်ဘၣ်တၢ်အုၣ်သံဘၣ်.
38မၤသးဒ်န့ၣ်ဒီး,ပှၤပုၢ်သ့ၣ်ဝဲၢ်သ့ၣ်ဧၢ,သ့ၣ်ညါသုဝဲလၢတၢ်စံၣ်တဲၤတဲလီၤသုလၢတၢ်ပူၤဖျဲးတၢ်ဒဲးဘး,လၢအဝဲဒၣ်အဃိတက့ၢ်.
39ဒီးပှၤခဲလၢာ်လၢအစူၢ်က့ၤနာ်က့ၤဝဲန့ၣ်,ပူၤဖျဲးဒီးကယဲၢ်တၢ်လၢစီၤမိၤရှ့အတၢ်သိၣ်တၢ်သီမၤပူၤမၤဖျဲးအီၤတသ့ဘၣ်န့ၣ်,လၢအဝဲဒၣ်အဃိလီၤ.
40မၤသးဒ်န့ၣ်ဒီးဒ်သိးတၢ်လၢဝံကတိၤတၢ်န့ၣ်,သုတဘၣ်လၢသုလိၤတဂ့ၤဒီး,ပလီၢ်သုသးတက့ၢ်.
41ပှၤလၢအမၤတရီတပါတၢ်သ့ၣ်ဧၢ,ကွၢ်, ဒီးကမၢကမၣ်,ဒီးဟါမၢ်တက့ၢ်. အဂ့ၢ်ဒ်အံၤ,ယမၤတၢ်မၤလၢသုနံၤသုသီ, တၢ်မၤလၢပှၤမ့ၢ်စံးဘၣ်သုဘၣ်ဆၣ်ဒီး, သုတနာ်ဘၣ်လ့ၤတက့ၤဘၣ်န့ၣ်လီၤ.
42ဒီးပှၤဟးထီၣ်ဝဲအဖၢမုၢ်ဒီး,ဒ်သိးအဝဲဒၣ်ကစံၣ်တဲၤတဲလီၤတၢ်အကလုၢ်အကထါအံၤလၢမုၢ်အိၣ်ဘှံးအနံၤခဲကိာ်တဘျီဒီး,ဃ့ကညးအီၤလီၤ.
43ဒီးတၢ်ပျၢ်ပှၤအိၣ်ဖှိၣ်ရိဖှိၣ်ဒီး,ပှၤယူဒၤဖိ,ဒီးပှၤယူးယီၣ်ယွၤလၢအနုာ်လၢပှၤယူဒၤဖိအလုၢ်အလၢ်အါဂၤ,ပိာ်ထီၣ်စီၤပီလူးဒီးစီၤဘၢ်နါဘၤအခံလီၤ.ဒီးအဝဲသ့ၣ်ကတိၤတၢ်ဒီးအီၤ,ဒီးသဆၣ်ထီၣ်အခံဒ်သိးအကအိၣ်ဝဲဆိးဝဲလၢယွၤအဘျုးအဖှိၣ်အပူၤလီၤ.
44ဒီးမုၢ်အိၣ်ဘှံးအနံၤလၢခံတစုဘၣ်ဒီး,ဒ်သိးအကနၢ်ဟူဘၣ်ယွၤအကလုၢ်ဒီး,ပှၤအိၣ်ဖှိၣ်ရိဖှိၣ်ဘူးထီၣ်အကလၢာ်တ့ၢ်ဒီဝ့ၢ်ညါလီၤ.
45ဘၣ်ဆၣ်ဒီး,တုၤပှၤယူဒၤဖိထံၣ်ပှၤဂီၢ်မုၢ်တဖၣ်န့ၣ်ဒီး,အသးထီၣ်ဆူၣ်ပှဲၤဆၢၣ်ကလာ်,ဒီးဂ့ၢ်လိာ်ဘှီလိာ်တၢ်ကတိၤလၢစီၤပီလူးစံၣ်တဲၤတဲလီၤန့ၣ်,ဒီးတဲးလိာ်ဃိလိာ်ဝဲဒီးဒုၣ်ဒွဲၣ်တၢ်လီၤ.
46ဒီးစီၤပီလူးဒီးစီၤဘၢ်နါဘၤပာ်အသးခူတလ့ၢ်ဒီးစံးဝဲဒၣ်,ပစံၣ်တဲၤတဲလီၤဆိသုလၢယွၤအကလုၢ်အကထါအလီၢ်အိၣ်လီၤ.ဘၣ်ဆၣ်ဒီးမ့ၢ်သုပာ်ကွံာ်အီၤ,ဒီးသုစံၣ်ညီၣ်လီၤသုသးလၢသုတကြၢးဒိးန့ၢ်ဘၣ်တၢ်မူအထူအယိာ်ဘၣ်သတးဒီး,ကွၢ်ကွၢ်,ပဃၣ်ဃီၤပသးဆူပှၤကလုာ်တဖၣ်အအိၣ်လီၤ.
47အဂ့ၢ်ဒ်အံၤ,ယွၤမၤလိာ်ပှၤဒ်အံၤ, ယပာ်နၤလၢပှၤကလုာ်တဖၣ်အတၢ်ကပီၤအဂီၢ်, ဒ်သိးနကကဲထီၣ်တၢ်အုၣ်က့ၤခီၣ်က့ၤတၢ်ပၢၢ်လၢဟီၣ်ခိၣ်အကတၢၢ်လီၤ.
48ဒီးတၢ်န့ၣ်တဖၣ်ပှၤကလုာ်တဖၣ်နၢ်ဟူဝဲဒီး,အသးခုထီၣ်,ဒီးစံးထီၣ်ပတြၢၤယွၤအကလုၢ်အကထါလီၤ.ဒီးဖဲဒၣ်ပှၤလၢတၢ်ပာ်အီၤလၢအကန့ၢ်ဘၣ်တၢ်မူလီၤထူလီၤယိာ်တဖၣ်န့ၣ်,စူၢ်က့ၤနာ်က့ၤဝဲလီၤ.
49ဒီးကစၢ်အကလုၢ်အကထါဟူထီသါလီၤဒီကီၢ်ညါန့ၣ်လီၤ.
50ဘၣ်ဆၣ်ဒီး,ပှၤယူဒၤဖိသဆၣ်ထီၣ်ပှၤယူးယီၣ်ယွၤ,အိၣ်ဒီးအလၤကပီၤ,ပိာ်မုၣ်တဖၣ်ဒီးဝ့ၢ်ပဒိၣ်ပပှၢ်တဖၣ်အခံ,ဒီးမၤအၢမၤသီစီၤပီလူးဒီးစီၤဘၢ်နါဘၤ,ဒီးဟီထီၣ်ကွံာ်အီၤလၢအကီၢ်ပူၤလီၤ.
51ဘၣ်ဆၣ်ဒီးအဝဲသ့ၣ်တြုၤလီၤကွံာ်ဟီၣ်ခိၣ်အကမူၣ်လၢအခီၣ်လၣ်ထီဒါအီၤ,ဒီးလဲၤဝဲဆူအံၤကနံၤလီၤ.
52ဒီးအပျဲၢ်အဘီၣ်လၢထီၣ်ပှဲၤထီၣ်ဒီးတၢ်သးခု,ဒီးသးစီဆှံန့ၣ်လီၤ.