Acts 4
1အဝဲသ့ၣ်စံးဘၣ်တဲဘၣ်ပှၤဂီၢ်မုၢ်အဖၢမုၢ်ဒီး,ပှၤလုၢ်တၢ်အဒိၣ်တဖၣ်,ဒီးတၢ်လုၢ်ဟံၣ်အသုးဖိအခိၣ်တဂၤ,ဒီးပှၤစၤဒူးကဲတဖၣ်,ဟဲဃီၤဝဲဆူအအိၣ်လီၤ.
2အဂ့ၢ်ဒ်အံၤ,အသးကိၢ်ထီၣ်လၢအသိၣ်က့ၤသီက့ၤပှၤဂီၢ်မုၢ်,ဒီးမၤဖျါထီၣ်လၢယ့ၣ်ရှူးအပူၤ,တၢ်ဂဲၤဆၢထၢၣ်လၢတၢ်သံအဂ့ၢ်လီၤ.
3ဒီးပာ်အစုလၢအလိၤ,ဒီးဒၢနုာ်အီၤလၢဃိာ်ပူၤ,တုၤမုၢ်ဆ့ၣ်ထီၣ်တနံၤလီၤ.အဂ့ၢ်ဒ်အံၤ,မ့ၢ်မုၢ်ဟါတ့ၢ်လီၤ.
4ဘၣ်ဆၣ်ဒီးပှၤလၢအနၢ်ဟူတၢ်အကလုၢ်အကထါန့ၣ်စူၢ်က့ၤနာ်က့ၤဝဲအါဂၤ,ဒီးပိာ်ခွါအတၢ်ဂံၢ်အိၣ်ယဲၢ်ကထိဃၣ်ဃၣ်လီၤ.
5ဒီးလၢမုၢ်ဆ့ၣ်ထီၣ်တနံၤတၢ်မၤအသးလၢအပဒိၣ်ပပှၢ်,ဒီးပှၤသူၣ်က့သးပှၢ်,ဒီးပှၤကွဲးလံာ်,
6ဒီးပှၤလုၢ်တၢ်အခိၣ်,စီၤအၣ်နၣ်,ဒီးစီၤကၤယါဖၤ,ဒီးစီၤယိၤဟၣ်,ဒီးစီၤအလ့းစၣ်ဒြူး,ဒီးကယဲၢ်ပှၤလုၢ်တၢ်အခိၣ်အဘူးအတံၢ်,အိၣ်ဖှိၣ်ရိဖှိၣ်လၢယရူၤၡလ့ၣ်အပူၤလီၤ.
7ဒီးပာ်လီၤအီၤလၢတၢ်သးကံၢ်ပူၤ,ဒီးသံကွၢ်အီၤ,သုမၤတၢ်အံၤလၢမနုၤအစိအကမီၤဒီးလၢမတၤတဂၤအမံၤအသၣ်လဲၣ်.
8တုၤနုၤတစု,စီၤပ့းတရူးလၢထီၣ်ပှဲၤထီၣ်ဒီးသးစီဆှံဒီးစံးဘၣ်အီၤ,ပှၤဂီၢ်မုၢ်အပဒိၣ်ပပှၢ်,ဒီးသူၣ်က့သးပှၢ်သ့ၣ်ဧၢ,
9တၢ်မၤအဂ့ၤတမံၤလၢအဘၣ်ပှၤအက့အကွဲၣ်တဂၤ,လၢအဘျါက့ၤဝဲဒ်လဲၣ်ဒ်လဲၣ်အဂ့ၢ်န့ၣ်,ပမ့ၢ်ဘၣ်တၢ်သမံသမိးလၢမုၢ်မဆါတနံၤအံၤဒီး,
10သ့ၣ်ညါသုဝဲခဲလၢာ်,ဒီးကယဲၢ်အံၣ်စရ့လးအပှၤဂီၢ်မုၢ်ခဲလၢာ်တက့ၢ်.ပှၤနစၤရ့းဖိယ့ၣ်ရှူးလၢသုပျၤထီအီၤလၢထူၣ်စုညါအလိၤ,ဒီးယွၤဒုးဂဲၤဆၢထၢၣ်က့ၤအီၤလၢတၢ်သံတဂၤအမံၤသတးဒီး,အဝဲတဂၤအံၤအိၣ်ဆူၣ်အိၣ်ချ့,ဒီးဆၢထၢၣ်လၢသုမဲာ်ညါအံၤလီၤ.
11အဝဲဒၣ်မ့ၢ်လၢၢ်တဖျၢၣ်လၢပှၤသူၣ်ဟံၣ်,သုဝဲသ့ၣ်အံၤ,သုပာ်အီၤလၢတၢ်နီတမံၤဘၣ်,ဘၣ်ဆၣ်ဒီးကဲထီၣ်လၢဟံၣ်အသနၢၣ်အခိၣ်လီၤ.
12ဒီးတၢ်အုၣ်က့ၤခီၣ်က့ၤလၢပှၤဂၤအပူၤန့ၣ်,တအိၣ်ဘၣ်နီတဂၤဘၣ်.အဂ့ၢ်ဒ်အံၤ,မံၤအဂုၤအဂၤလၢပှၤကညီအကျါ,လၢမူခိၣ်အဖီလာ်,တၢ်တဟ့ၣ်ဘၣ်ပဝဲလၢပဘၣ်တုၤလၢတၢ်အုၣ်က့ၤခီၣ်က့ၤလၢအပူၤနီတမံၤဘၣ်.
13ဒီးတုၤအဝဲသ့ၣ်ထံၣ်လၢစီၤပ့းတရူးဒီးစီၤယိၤဟၣ်အသးခူတလ့ၢ်,ဒီးသ့ၣ်ညါလၢအမ့ၢ်ပှၤတသ့ဘၣ်လံာ်,ဒီးပှၤတမၤလိဘၣ်တၢ်ဘၣ်ဒီး,ကမၢကမၣ်ဝဲလီၤ.ဒီးသ့ၣ်ညါထံလၢအဝဲသ့ၣ်မ့ၢ်ပှၤအိၣ်တ့ၢ်ဒီးယ့ၣ်ရှူးလီၤ.
14ဒီးထံၣ်ပှၤလၢအဘျါက့ၤဝဲတဂၤ,အိၣ်ဆၢထၢၣ်ဒီးအီၤသတးဒီး,ကတိၤတြီတၢ်အလီၢ်တအိၣ်ဘၣ်.
15ဘၣ်ဆၣ်ဒီးမၤလိာ်ဝဲလၢအကဟးထီၣ်လၢပှၤကူၣ်လိာ်တၢ်အအိၣ်ဆူခိဝံၤဒီး,ကတိၤလိာ်အသး,
16ဒီးစံးဝဲဒၣ်,ပှၤတဖၣ်အံၤပကမၤအီၤဒ်လဲၣ်.အဂ့ၢ်ဒ်အံၤ,လၢတၢ်လီၤလးနီၢ်နီၢ်တမံၤမၤလံအသးလၢအီၤန့ၣ်,အိၣ်ဖျါဝဲလၢပှၤအိၣ်ဝဲဆိးဝဲလၢယရူၤၡလ့ၣ်အပူၤခဲလၢာ်အမဲာ်ညါ,ဒီးပသမၢတသ့ဘၣ်လီၤ.
17ဘၣ်ဆၣ်ဒီးဒ်သိးတၢ်န့ၣ်သုတဟူထီသါလီၤဒံးလၢပှၤဂီၢ်မုၢ်အကျါတဂ့ၤဒီး,ပကမၤလိာ်အီၤလၢတၢ်ကတိၤမၤပျံၤန့ၣ်,ဒ်သိးအသုတကတိၤဘၣ်တၢ်လၢပှၤတဂၤအံၤအမံၤ,လၢပှၤနီတဂၤတဂ့ၤလီၤ.
18ဒီးကိးက့ၤအီၤ,ဒီးဒ်သိးအသုတစံၣ်တဲၤတဲလီၤဒီးသိၣ်က့ၤသီက့ၤတၢ်လၢယ့ၣ်ရှူးအမံၤလ့ၤတက့ၤတဂ့ၤဒီး,မၤလိာ်ဝဲလီၤ.
19ဒီးစီၤပ့းတရူးဒီးစီၤယိၤဟၣ်ကတိၤဆၢတၢ်,ဒီးစံးဘၣ်အီၤ,ပဒိကနၣ်သုကလုၢ်အါန့ၢ်ပဒိကနၣ်ယွၤအကလုၢ်လၢယွၤအမဲာ်ညါ,မ့ၢ်အတီတတီလဲၣ်န့ၣ်,စံၣ်ညီၣ်သုဝဲတက့ၢ်.
20အဂ့ၢ်ဒ်အံၤ,တၢ်လၢပထံၣ်,ဒီးတၢ်လၢပနၢ်ဟူန့ၣ်,ပတကတိၤဘၣ်ဒီး,ပအိၣ်တသ့ဘၣ်.
21ဒီးသိၣ်ဃီၣ်အီၤအလီၢ်တထံၣ်ဘၣ်ဝဲလၢပှၤဂီၢ်မုၢ်အဃိဒီး,ကတိၤအါထီၣ်တၢ်မၤပျံၤအီၤဝံၤဒီး,ပျၢ်အီၤလီၤ.အဂ့ၢ်ဒ်အံၤ,လၢတၢ်မၤသးအဃိန့ၣ်,ပှၤဂီၢ်မုၢ်စံးထီၣ်ပတြၢၤယွၤခဲလၢာ်လီၤ.
22အဂ့ၢ်ဒ်အံၤ,ပှၤလၢအဘၣ်တၢ်မၤဘျါက့ၤလီၤလးတဂၤန့ၣ်,အသးပှၢ်တ့ၢ်ဝဲအနံၣ်လွံၢ်ဆံအဘျဲၣ်လီၤ.
23ဒီးအဝဲသ့ၣ်ထူၣ်ဖျဲးဝဲဝံၤဒီး,က့ၤဆူအပှၤဒၣ်ဝဲအအိၣ်,ဒီးဖဲဒၣ်ပှၤလုၢ်တၢ်အခိၣ်,ဒီးပှၤသူၣ်က့သးပှၢ်တဖၣ်စံးဝဲန့ၣ်,အဝဲသ့ၣ်စံၣ်တဲၤတဲလီၤက့ၤလၢအီၤလီၤ.
24ဒီးတုၤအဝဲသ့ၣ်နၢ်ဟူဒီး,ဘါထုကဖၣ်ယွၤလၢအသးတဖျၢၣ်ဃီဒီးစံးဝဲဒၣ်,ကစၢ်ဧၢ,နဲဒၣ်အံၤနမ့ၢ်ယွၤလၢအတ့မူခိၣ်,ဟီၣ်ခိၣ်,ဒီးပီၣ်လဲၣ်,ဒီးတၢ်အိၣ်လၢအပူၤခဲလၢာ်လီၤ.
25နစံးလၢနခ့နပှၤစီၤဒၤဝံးအထးခိၣ်. ဘၣ်မနုၤလၢပှၤအကလုာ်တဖၣ်ကလာ်ထီၣ်, ဒီးပှၤဂီၢ်မုၢ်ကူၣ်ထီၣ်ဖးလီၤတၢ်ကလီကလီလဲၣ်.
26ဟီၣ်ခိၣ်အစီၤပၤတဖၣ်ပာ်ဆၢထၢၣ်အသး, ဒီးပဒိၣ်ပပှၢ်တဖၣ်အိၣ်ဖှိၣ်ရိဖှိၣ်တပူၤဃီထီဒါယွၤ, ဒီးအခရံာ်န့ၣ်လီၤ.
27အဂ့ၢ်ဒ်အံၤ,စီၤဟ့ၤရိာ်,ဒီးစီၤပီၣ်တံၤပံၤလး,ဒီးပှၤကလုာ်တဖၣ်,ဒီးပှၤအံၣ်စရ့လးဖိသ့ၣ်တဖၣ်န့ၣ်အိၣ်ဖှိၣ်ရိဖှိၣ်ဝဲနီၢ်နီၢ်လၢဝ့ၢ်တဖျၢၣ်အံၤအပူၤ,ထီဒါပှၤလၢနဖှူအီၤ,နခ့နပှၤစီဆှံယ့ၣ်ရှူး,
28ဒ်သိးအကမၤအီၤဖဲဒၣ်နစု,ဒီးနတၢ်ကူၣ်စံၣ်ညီၣ်ပာ်လၢအကမၤဝဲတဖၣ်န့ၣ်လီၤ.
29ဒီးခဲကနံၣ်အံၤ,ကစၢ်ဧၢ,အဝဲသ့ၣ်အတၢ်ကတိၤမၤပျံၤတၢ်န့ၣ်,ကွၢ်တက့ၢ်.မ့ၢ်နယူာ်ထီၣ်နစုဒ်သိးနကမၤဘျါက့ၤတၢ်ဆူးတၢ်ဆါ,ဒီးဒုးမၤတၢ်ပနီၣ်လီၤလး,
30ဒီးတၢ်လီၤလိၢ်လီၤလးလၢနခ့နပှၤစီဆှံ,ယ့ၣ်ရှူးအမံၤသတးဒီး,ဒုးစံၣ်တဲၤတဲလီၤနခ့နပှၤလၢနကလုၢ်နကထါ,အိၣ်ဒီးအသးခူတလ့ၢ်တက့ၢ်.
31ဒီးဘါထုကဖၣ်တၢ်အဖၢမုၢ်ဒီး,အအိၣ်ဖှိၣ်ရိဖှိၣ်အလီၢ်န့ၣ်ဟူးဝးဝဲ,ဒီးပှၤခဲလၢာ်လၢထီၣ်ပှဲၤထီၣ်ဒီးသးစီဆှံဒီးစံၣ်တဲၤတဲလီၤယွၤအကလုၢ်အကထါလၢအသးခူတလ့ၢ်လီၤ.
32ဒီးပှၤဂီၢ်မုၢ်လၢအစူၢ်က့ၤနာ်က့ၤတဖၣ်န့ၣ်,အိၣ်ဒီးအသူၣ်တဖျၢၣ်ဃီအသးတဖျၢၣ်ဃီ,ဒီးတစံးဘၣ်လၢအစုလီၢ်အခီၣ်ခိၣ်မ့ၢ်အတၢ်ဒၣ်ဝဲနီတဂၤဘၣ်.မ့မ့ၢ်အတၢ်ခဲလၢာ်န့ၣ်ပာ်ဃုာ်ဝဲတပူၤဃီလီၤ.
33ဒီးပှၤတၢ်မၢဖိအိၣ်ဒီးအစိဒိၣ်အကမီၤဒိၣ်ဒီးအုၣ်အသးလၢကစၢ်ယ့ၣ်ရှူးဂဲၤဆၢထၢၣ်က့ၤအဂ့ၢ်,ဒီးတၢ်ဘျုးတၢ်ဖှိၣ်ဒိၣ်မးအိၣ်လၢအဝဲသ့ၣ်ခဲလၢာ်အလိၤလီၤ.
34အဂ့ၢ်ဒ်အံၤ,ပှၤဘၣ်ဖှီၣ်ဘၣ်ယာ်တအိၣ်ဘၣ်လၢအကျါနီတဂၤဘၣ်.အဂ့ၢ်ဒ်အံၤ,ဖဲဒၣ်ပှၤအိၣ်ဒီးဟီၣ်ခိၣ်အကဝီၤမ့ၢ်ဂ့ၤ,ဟံၣ်ဧိၤဃီဧိၤမ့ၢ်ဂ့ၤ,ဆါကွံာ်ဝဲ,ဒီးဟဲစိာ်တၢ်လၢအဆါကွံာ်ဝဲအပှ့ၤ,
35ဒီးပာ်လီၤဝဲလၢပှၤတၢ်မၢဖိတဖၣ်အခီၣ်ထံးလီၤ.ဒီးဒ်ပှၤဂ့ၤန့ၢ်ဘၣ်တၢ်အလီၢ်အိၣ်ဝဲအသိးန့ၣ်,တၢ်နီၤဟ့ၣ်ဝဲစုာ်စုာ်လီၤ.
36ဒီးစီၤယိၤစ့ၣ်,လၢပှၤမၢတၢ်ဖိတဖၣ်ကိးက့ၤအမံၤသီလၢစီၤဘၢ်နါဘၤ(အခီပညီမ့ၢ်ပှၤမၤမုာ်တၢ်ဖိ),ပှၤလ့ၤဝံဖိ,ပှၤကူပြူးဖိတဂၤန့ၣ်,
37အိၣ်ဒီးစံၣ်ဧိၤပှဲၤဧိၤ,ဒီးဆါကွံာ်ဝဲ,ဒီးဟဲစိာ်အပှ့ၤ,ဒီးပာ်လီၤလၢပှၤတၢ်မၢဖိတဖၣ်အခီၣ်ထံးလီၤ.