1 Samuel 1
1ဒီးမတၤတဂၤအိၣ်ဝဲလၢရၤမါသဲၣ်စိဖံၣ်အပူၤလၢကစၢၢ်အ့ဖရဲၣ်အလိၤ,ဒီးအမံၤမ့ၢ်စီၤအ့လကါနၤ,စီၤယဟိရၣ်အဖိခွါ,စီၤအလံဟူၤအဖိခွါ,စီၤတိဟူၤအဖိခွါ,စီၤစူာ်အဖိခွါပှၤအ့ဖရးသးဖိတဂၤလီၤ.
2ဒီးအဝဲဒၣ်န့ၣ်အိၣ်ဒီးအမါခံဂၤလီၤ.အဝဲတဂၤအမံၤမ့ၢ်နီၢ်ဃးနၤ,ဒီးအဝဲတဂၤအမံၤမ့ၢ်နီၢ်ပနံးနၤလီၤ.ဒီးနီၢ်ပနံးနၤအိၣ်ဒီးအဖိတဖၣ်လီၤ.မ့မ့ၢ်နီၢ်ဃးနၤအဖိတအိၣ်ဘၣ်.
3ဒီးပှၤတဂၤန့ၣ်လဲၤထီၣ်လၢအဝ့ၢ်ပူၤတနံၣ်ဘၣ်တနံၣ်,ဒ်သိးအကဘါတၢ်ဒီးလုၢ်တၢ်လၢတၢ်သုးမုၢ်ဂီၢ်မုၢ်အယွၤ,လၢၡံလိၤအပူၤန့ၣ်လီၤ.ဒီးစီၤဧ့လံၤအဖိခွါခံဂၤ,ဒီးစီၤဃၤဖနံၤ,ဒီးစီၤဖံၤနဃၣ်,ယွၤအပှၤလုၢ်တၢ်အဒိၣ်,အိၣ်ဝဲဖဲန့ၣ်လီၤ.
4ဒီးလၢမုၢ်တနံၤလၢစီၤအ့လကါနၤလုၢ်တၢ်န့ၣ်အဝဲဒၣ်ဟ့ၣ်လီၤအမါနီၢ်ပနံးနၤ,ဒီးအဖိခွါ,ဒီးအဖိမုၢ်ခဲလၢာ်န့ၣ်လၢတၢ်အဂီၢ်တဖၣ်လီၤ.
5မ့မ့ၢ်နီၢ်ဃးနၤန့ၣ်ဟ့ၣ်လီၤအီၤလၢတၢ်အဂီၢ်လီၤဆီဒၣ်တၢ်လီၤ.ဘၣ်ဆၣ်ဒီးယွၤကးတံာ်ဃာ်အဒၢလီၢ်လီၤ.
6ဒီးအဒုၣ်အဒါမၤကိၢ်မၤဂီၤအီၤ,ဒီးမၤဆါအသးနးနးကလဲာ်လၢယွၤကးတံာ်ဃာ်အဒၢလီၢ်အဃိလီၤ.
7ဒီးအဝဲဒၣ်မၤဒ်န့ၣ်တနံၣ်ဘၣ်တနံၣ်လီၤ.တုၤအလဲၤထီၣ်ဆူယွၤအဟံၣ်ဒီး,မၤကိၢ်မၤဂီၤအသးဒ်န့ၣ်လီၤ.ဒီးအမဲာ်ထံလီၤ,ဒီးတအီၣ်ဘၣ်တၢ်ဘၣ်.
8ဒီးအဝၤစီၤအ့လကါနၤစံးဘၣ်အီၤ,နီၢ်ဃးနၤဧၢ,နမဲာ်ထံလီၤဘၣ်မနုၤလဲၣ်.ဒီးနတအီၣ်ဘၣ်တၢ်ဘၣ်မ့ၢ်အဘၣ်မနုၤလဲၣ်.ဒီးနသးကိၢ်ထီၣ်ဘၣ်မနုၤလဲၣ်.ယဂ့ၤန့ၢ်ဖိခွါဆံဆဲၣ်ဂၤလၢနဂီၢ်တမ့ၢ်ဘၣ်ဧါ.
9ဒီးလၢအအီၣ်တၢ်ဒီးအီတၢ်လၢၡံလိၤအလီၢ်ခံန့ၢ်နီၢ်ဃးနၤဂဲၤဆၢထၢၣ်,ဒီးစီၤဧ့လံၤပှၤလုၢ်တၢ်အဒိၣ်တဂၤဆ့ၣ်နီၤဝဲလၢလီၢ်ဆ့ၣ်နီၤလၢယွၤအနူၢ်ဧိၤစီၤဧိၤအထူၣ်တထူၣ်အဃၢၤန့ၣ်,
10ဒီးအဝဲဒၣ်အသူၣ်ကိၢ်သးဂီၤဒီးဘါထုကဖၣ်ယွၤ,ဒီးအမဲာ်ထံလီၤနးမးလီၤ.
11ဒီးဆိၣ်တၢ်ဆိၣ်,ဒီးစံးဝဲဒၣ်,တၢ်သုးမုၢ်ဂီၢ်မုၢ်အယွၤဧၢ,နမ့ၢ်ကွၢ်လီၤသပှၢ်တၢၢ်နကုၢ်ပိာ်မုၣ်အတၢ်နးတၢ်ဖှီၣ်,ဒီးသ့ၣ်နီၣ်ထီၣ်က့ၤယၤ,ဒီးတသးပ့ၤနီၣ်ဘၣ်နကုၢ်ပိာ်မုၣ်ဘၣ်,ဒီးဟ့ၣ်လီၤနကုၢ်ပိာ်မုၣ်လၢအဖိပိာ်ခွါဒီး,ယကဟ့ၣ်အီၤလၢယွၤတစိၤဒၣ်အီၤလီၤ.ဒီးဒီလူၤတဘၣ်အခိၣ်ဘၣ်.
12ဒီးဘါထုကဖၣ်အါအါကလဲာ်လၢယွၤအမဲာ်ညါ,ဒီးတၢ်မၤအသးလၢစီၤဧ့ၤလံၤကွၢ်နီၣ်အထးခိၣ်လီၤ.
13ဒီးနီၢ်ဃးနၤကတိၤတၢ်လၢအသးလီၤ.ဝးထဲအပျုၤဧိၤလီၤ.မ့မ့ၢ်အကလုၢ်န့ၣ်တဟူထီၣ်ဘၣ်.ဒီးစီၤဧ့လံၤဆိကမိၣ်ဝဲလၢအအီမူၤအသးလီၤ.
14ဒီးစီၤဧ့လံၤစံးဘၣ်အီၤ,နကအီမူၤနသးဆံးယံာ်လဲၣ်.သုးကွံာ်နစပံးထံလၢနအိၣ်တက့ၢ်.
15ဒီးနီၢ်ဃးနၤစံးဆၢတၢ်ဒီးစံးဝဲဒၣ်,တမ့ၢ်ဘၣ်,ယကစၢ်ဧၢ,ယမ့ၢ်ပိာ်မုၣ်တဂၤလၢအသးတမုာ်ဘၣ်.စပံးထံမ့ၢ်ဂ့ၤ,သံးဧိၤမ့ၤဧိၤမ့ၢ်ဂ့ၤ,ယတအီဘၣ်.မ့မ့ၢ်ယဂၢ်လီၤယသးလၢယွၤအမဲာ်ညါလီၤ.
16ပာ်နခ့နပှၤပိာ်မုၣ်လၢဘလးယဧၤလးအဖိမုၣ်န့ၣ်တဂ့ၤ.အဂ့ၢ်ဒ်အံၤ,လၢယဆိကမိၣ်တၢ်အအါဒီးယသးတမုာ်ဘၣ်နးမးအပူၤန့ၣ်ယကတိၤတၢ်တုၤခဲကနံၣ်အံၤလီၤ.
17ဒီးစီၤဧ့လံၤစံးဆၢတၢ်ဒီးစံးဝဲဒၣ်,လဲၤတၢ်မုာ်မုာ်တက့ၢ်.ဒီးမ်အံၣ်စရ့လးအကစၢ်ဟ့ၣ်လီၤနၤလၢတၢ်ဃ့လၢနဃ့တၢ်လၢအီၤန့ၣ်တက့ၢ်.
18ဒီးအဝဲဒၣ်စံး,မ်နခ့နပှၤပိာ်မုၣ်ထံၣ်န့ၢ်တၢ်ဘျုးတၢ်ဖှိၣ်လၢနမဲာ်ညါတက့ၢ်.ဒီးပိာ်မုၣ်န့ၢ်လဲၤတၢ်,ဒီးအီၣ်တၢ်,ဒီးအမဲာ်တအုၣ်သပှီၤလၢၤဘၣ်လီၤ.
19ဒီးမုၢ်ဆ့ၣ်ထီၣ်န့ၢ်ဂဲၤဆၢထၢၣ်ဂီၤဂီၤ,ဒီးဘူၣ်ထီၣ်ဘါထီၣ်တၢ်လၢယွၤအမဲာ်ညါ,ဒီးက့ၤကဒါက့ၤဆူအဟံၣ်,ဆူရၤမါလီၤ.ဒီးစီၤအ့လကါနၤသ့ၣ်ညါအမါနီၢ်ဃးနၤ,ဒီးယွၤသ့ၣ်နီၣ်ထီၣ်က့ၤအီၤလီၤ.
20ဒီးတုၤမုၢ်နံၤတဖၣ်ပှဲၤထီၣ်ဒီး,တၢ်မၤအသးလၢနီၢ်ဃးနၤဒၢထီၣ်,ဒီးဆံးစၢ်န့ၢ်အဖိခွါ,ဒီးယုၢ်ဝဲအမံၤလၢစီၤၡမူၤအ့လး,ဒီးစံးဝဲဒၣ်,အဂ့ၢ်ဒ်အံၤ,မ့ၢ်လၢယဃ့အီၤလၢယွၤအဃိလီၤ.
21ဒီးပှၤကညီစီၤအ့လကါနၤ,ဒီးအပှၤဟံၣ်ဖိခဲလၢာ်လဲၤထီၣ်လုၢ်တၢ်လုၢ်လၢတနံၣ်ဘၣ်တနံၣ်အဂီၢ်,ဒီးအတၢ်မၤဘူၣ်ဘၣ်ဃးဒီးဆိၣ်တၢ်လီၤ.
22မ့မ့ၢ်နီၢ်ဃးနၤန့ၣ်တလဲၤထီၣ်ဘၣ်ဝဲဘၣ်.အဂ့ၢ်ဒ်အံၤ,စံးဘၣ်အဝၤ,ဖိသၣ်တချုးဖှၣ်ဒံးအမိၢ်နုၢ်ဘၣ်ဒီး,ယတလဲၤထီၣ်ဘၣ်,ယကလဲၤစိာ်အီၤဒ်သိးအကအိၣ်ဖျါလၢယွၤအမဲာ်ညါ,ဒီးအိၣ်ဖဲန့ၣ်လီၤထူလီၤယိာ်လီၤ.
23ဒီးအဝၤစီၤအ့လကါနၤစံးဘၣ်အီၤ,မၤတၢ်လၢအဂ့ၤလၢနမဲာ်တက့ၢ်.အိၣ်တုၤနထုးဖှၣ်အီၤလၢနုၢ်တက့ၢ်.မ်ထဲယွၤကမၤဂၢၢ်မၤကျၢၤအကလုၢ်န့ၣ်တက့ၢ်.ဒီးပိာ်မုၣ်န့ၣ်အိၣ်ဝဲဆိးဝဲ,ဒီးဒုးအီၣ်အဖိခွါလၢအနုၢ်တုၤလီၤလၢအထုးဖှၣ်အီၤလၢနုၢ်န့ၣ်လီၤ.
24ဒီးတုၤအထုးဖှၣ်အီၤလၢအနုၢ်ဝံၤဒီး,စိာ်ထီၣ်ဝဲဒီးအီၤ,အိၣ်ဒီးဂီၤဖံးဖါသၢဒု,ဒီးကိၣ်ကမူၣ်တအ့ဖး,ဒီးအစပံးထံအထၢၣ်တၢ်ဖံးတဖျၢၣ်,ဒီးဟဲစိာ်ဝဲဆူယွၤအအိၣ်လၢၡံလိၤအပူၤ,ဒီးဖိသၣ်န့ၣ်အသးစၢ်လီၤ.
25ဒီးမၤသံဂီၤဖံးဖါတဒု,ဒီးဟဲစိာ်ဖိသၣ်ဆူစီၤဧ့လံၤအအိၣ်လီၤ.
26ဒီးပိာ်မုၣ်န့ၣ်စံးဝဲဒၣ်,အိ,ယကစၢ်ဧၢ,နသးသမူဝဲ,ယကစၢ်ဧၢ,ယမ့ၢ်ပိာ်မုၣ်တဂၤလၢအဆၢထၢၣ်ဘါထုကဖၣ်တၢ်လၢနဃၢၤဖဲအံၤလီၤ.
27ယဘါထုကဖၣ်လၢဖိသၣ်တဂၤအံၤအဂ့ၢ်,ဒီးယွၤဟ့ၣ်လီၤတၢ်လၢယဃ့လၢအီၤလီၤ.
28ဒီးယဒုးလိၢ်စ့ၢ်ကီးအီၤလၢယွၤ,တစိၤဒၣ်အီၤကဘၣ်တၢ်ဒုးလိၢ်အီၤလၢယွၤလီၤ.ဒီးအဝဲဒၣ်ဘါထုကဖၣ်ယွၤဖဲန့ၣ်လီၤ.