Llyfr Job 17
1Fy anadl a lygrwyd, fy nyddiau a ddiffoddwyd, beddau sydd barod i mi.
2Onid oes watwarwyr gyda mi? ac onid yw fy llygad yn aros yn eu chwerwedd hwynt?
3Dyro i lawr yn awr, dyro i mi feichiau gyda thi: pwy ydyw efe a dery ei law ya fy llaw i?
4Canys cuddiaist eu calon hwynt oddi wrth ddeall: am hynny ni ddyrchefi di hwynt.
5Yr hwn a ddywed weniaith i’w gyfeillion, llygaid ei feibion ef a ballant.
6Yn ddiau efe a’m gosododd yn ddihareb i’r bobl,ac o’r blaen yr oeddwn megis tympan iddynt.
7Am hynny y tywyllodd fy llygad gan ddicllonedd, ac y mae fy aelodau oll fel cysgod.
8Y rhai uniawn a synnant am hyn; a’r diniwed a ymgyfyd yn erbyn y rhagrithiwr.
9Y cyfiawn hefyd a ddeil ei ffordd; a’r glân ei ddwylo a chwanega gryfder.
10Ond chwi oll, dychwelwch, a deuwch yn awr: am na chaf fi ŵr doeth yn eich plith chwi.
11Fy nyddiau a aeth heibio, fy amcanion a dynned ymaith; sef meddyliau fy nghalon.
12Gwnant y nos yn ddydd: byr yw y goleuni, oherwydd tywyllwch.
13Os disgwyliaf, y bedd sydd dy i mi: mewn tywyllwch y cyweiriais fy ngwely.
14Gelwais ar y pwll, Tydi yw fy nhad: ar y pryf, Fy mam a’m chwaer wyt.
15A pha le yn awr y mae fy ngobaith? pwy hefyd a genfydd fy ngobaith?
16Disgynnant i farrau y pwll, pan fyddo ein cydorffwysfa yn y llwch.