Levr Yehoshoua 7
1Hôgen bugalé Israel a dorraz ar gourc’hemenn a oa bet gréat d’ézhô, hag é kémerchon̄t évit-hô ar péz a oa bét anaouéet. Rag Akan, mâb Karmi, mâb Zabdi mâb Zaré, eûz a vreûriez Juda, a gémeraz eunn dra a ioa bét milliget: hag ann Aotrou a zavaz drouk enn-han̄ a-énep bugalé Israel. (T).
2Enn amzer-zé Jozué a gasaz tûd eûz a Jériko étrézé Hai, a zô tôst da Vétaven, war zû ar sâv-héol eûz a géar Bétel, hag a lavaraz d’ézhô: Id hag anavézid ar vrô. Ar ré-man̄ a réaz ar péz a oa bét gourc’hémennet d’ézhô, hag a anavézaz Hai.
3Ha pa oen̄t distrôet, é léverchon̄t d’ézhan̄: Na biñet két ann holl bobl, hôgen eat daou pé dri mil dén, évid disman̄tra ar géar-zé. Pérâk skuiza enn-aner ann holl bobl a-énep kenn néheûd a énébourien?
4Tri mil brézéliad a biñaz éta. Hôgen ar ré-man̄ ô trei hô c’hein râk-tâl,
5A oé kannet gan̄d ar ré eûz a géar Hai; ha c’houec’h dén ha trégon̄t anézhô a oé lazet. Ann enebourien a iéaz war hô lerc’h adaleg hô dôr bété Sabarim, hag a lazaz ar ré a dec’hé étrézé ann draon̄ien. Ha kaloun ar bobl a oé spoun̄tet, hag é teûzaz é-c’hîz dour.
6Hôgen Jozué a rogaz hé ziḻad, hag en em strin̄kaz war hé c’hénou d’ann douar dirâg arc’h ann Aotrou, hén̄ hag holl hénaoured Israel, bétég ar pardaez: hag hî a daolaz poultr war hô fennou;
7Ha Jozué a lavaraz: Allaz, Aotrou va Doué! pérâg eo bét fellet d’id lakaad ar bobl-man̄ da dreûzi ster ar Jourdan, évid hol lakaad étré daouarn ann Amorréed, hag évid hor c’holl? A-ioul é vemp choumet enn tû all d’ar Jourdan, ével ma oamp da gen̄ta.
8O Doué va Aotrou, pétrâ a livirinn-mé, ô wélout Israel ô trei hé gein d’hé énébourien?
9Ar C’hananéed a glevô kémen̄t-man̄, hag ar ré holl a choum er vrô-man̄; hag oc’h en em zastumi holl, é teûin̄t da gelc’hia ac’hanomp, hag é lamin̄t hon hanô diwar ann douar. Ha pétrâ a ri-dé neûzé évid da hanô brâz?
10Hag ann Aotrou a lavaraz da Jozué: Saô, pérâg oud-dé gourvézet war ann douar?
11Israel en deûz péc’het; ha torret eo bét gan̄t-han̄ va c’hévrédigez: kéméret hô deûz darn ann traou a ioa bét milliget (T), laéret hô deûz, gévier hô deûz lavaret, ha kuzet hô deûz hô laéron̄si é-touez hô diḻad.
12Israel na hellô mui derc’hel stard oud hé énébourien, hag é tec’hô dira-z-hô; ô véza ma eo en em zaotret gan̄d ann anaoué. Na vézinn mui gan-é-hoc’h ken n’hô pézô gwastet ann hini a zô kabluz eûz ann drouk-zé.
13Saô, santéla ar bobl, ha lavar dézhô: En em zan̄télit évit war-c’hoaz; râk chétu pétrâ a lavar ann Aotrou Doué Israel: Éma ann anaoué enn da greiz, ô Israel; na helli két derc’hel stard oud da énébourien, kén na vézô gwastet eûz hô touez ann hini a zô kabluz eûz ar gwall-zé.
14War-c’hoaz vin̄tin éz éot pép-hini enn hô preûriez: hag ar sort ô véza kouézet war eur vreûriez a dréménô d’ar c’héren̄tiézou, eûz ar c’héren̄tiézou d’ann tiez, eûz ann tiez d’ann dûd.
15Ha piou-bennâg a vézô kavet kabluz eûz ann drouk-zé, a vézô devet gan̄t kémen̄d a zô d’ézhan̄, ô véza ma en deûz torret kévrédigez ann Aotrou, ha ma en deûz gréat fallagriez é Israel.
16Jozué éta ô véza savet diouc’h ar min̄tin, a zastumaz Israel dré béb breûriez; hag é oé kavet breûriez Juda:
17Ha pa oé deûet di gan̄d hé holl diégésiou, é oé kavet tiégez Zaré: hag ann tiegez-man̄ ô véza deûet gan̄d hé holl diez, é oé kavet Zabdi:
18Hag ann tî-zé ô véza deûet gan̄d hé hoil dûd, é oé kavet Akan, mâb Karmi, mâb Zabdi, mâb Zare eûz a vreûriez Juda.
19Ha Jozué a lavaraz da Akan: Va mâb, rô gloar d’ann Aotrou doué Israel, hag an̄sav, ha diskuḻ d’in ar péz éc’h eûz gréat, hép kuza nétra.
20Hag Akan a lavaraz da Jozué: Gwir eo pénaoz em eûz péc’het a-éneb ann Aotrou Doué Israel, ha chétu pétra em eûz gréat:
21O véza gwélet é-touez ann diwisk eur van̄tel tané mâd-meûrbéd, ha daou c’han̄t sikl arc’han̄t, hag eur réolen aour eûz a han̄ter-kan̄t sikl, é teûaz c’hoan̄t d’in d’hô skrapa. Hag ô véza hô c’héméret, e kuziz anézhô é-kreiz va zelt, hag é lakiz ann arc’han̄t enn eunn toull enn douar.
22Neûzé Jozué a gasaz tûd, péré a rédaz da delt Akan, hag a gavaz kémen̄t a oa bét kuzet, el léac’h m’en dôa lavaret hag ann arc’han̄t ivé.
23Hag ô véza hô zennet holl eûz ann telt, é tigaschon̄t anézhô da Jozué, ha da holl vugalé Israel, hag hô zaolchon̄t dirâk ann Aotrou.
25Hôgen Jozué, hag Israel holl gan̄t-han̄, ô véza kéméret Akan, mâb Zaré, hag ann arc’han̄t, hag ar van̄tel, hag ar reolen aour, hag ive hé vipien, hag hé verc’hed, hag hé éjenned, hag hé ézen, hag hé zen̄ved, ha zô-kén hé delt ha kémen̄d a oa d’ézhan̄, hô c’hasaz da draon̄ien Akor; 25 É péléac’h Jozué a lavaraz d’ézhan̄: O véza ma éc’h eûz hor reûstlet, ra reûstlô ann Aotrou ac’hanod enn deiz-man̄. Hag Israel holl a labézaz anézhan̄; ha kémen̄d a oa d’ézhan̄ a oé bévézet gan̄d ann tân.
26Hag hî a zastumaz war-n-ézhan̄ eur bern brâz a vein, a zô choumet bétég hiriô. Ha frouden Zoué a zistrôaz diwar-n-ézhô. Hag al léac’h-zé a zô bét hanvet traon̄ien Akor, bétég-henn. ———— VIII. PENNAD. Ann Israélited a gémer ar géar a Hai. Jozué a zav eunn aoter.