Psalms 111
1စံးထီၣ်ပတြၢၤယွၤတက့ၢ်.ပှၤလၢအပျံၤယွၤ,လၢအသးခုဒိၣ်ဒိၣ်ကလဲာ်လၢအတၢ်မၤလိာ်န့ၣ်ဘၣ်ဆိၣ်ဂ့ၤဝဲလီၤ.
2အချံအသၣ်ကဆူၣ်ထီၣ်လၢဟီၣ်ခိၣ်ချၢ,ပှၤအတီအလိၤတစိၤန့ၣ်ကဘၣ်တၢ်ဆိၣ်ဂ့ၤဝဲလီၤ.
3တၢ်ဖိတၢ်လံၤ,ဒီးတၢ်အစုလီၢ်အခီၣ်ခိၣ်အိၣ်ဝဲလၢအဟံၣ်ပူၤ,ဒီးအတၢ်တီတၢ်လိၤအိၣ်ဂၢၢ်ဆိးကျၢၤလီၤထူလီၤယိာ်လီၤ.
4တၢ်ကပီၤထီၣ်လၢတၢ်ခံးကျါလၢပှၤအတီအလိၤအဂီၢ်လီၤ.သးကညီၤတၢ်,ဒီးသးအိၣ်တၢ်,ဒီးတီဝဲလိၤဝဲလီၤ.
5ပှၤကညီအဂ့ၤတဂၤန့ၣ်သးကညီၤတၢ်,ဒီးဒုးလိၢ်တၢ်လီၤ.မၤနၢၤတၢ်လၢတၢ်စံၣ်ညီၣ်လီၤ.
6အဂ့ၢ်ဒ်အံၤ,တဟူးတဝးဘၣ်လီၤထူလီၤယိာ်ဘၣ်.ပှၤအတီအလိၤကဘၣ်တၢ်သ့ၣ်နီၣ်ထီၣ်က့ၤအီၤလီၤထူလီၤယိာ်လီၤ.
7တဘၣ်ယိၣ်ဘၣ်တၢ်အကစီၣ်အအၢဘၣ်.အသးအိၣ်ဂၢၢ်ဆိးကျၢၤဒီးသန့ၤအသးလၢယွၤလီၤ.
8အသးအိၣ်ဂၢၢ်ဆိးကျၢၤဝဲ,တပျံၤဘၣ်တၢ်တုၤလီၤလၢအထံၣ်ဘၣ်တၢ်ဘၣ်အသးလၢအဒုၣ်အဒါအလိၤလီၤ.
9မၤလီၤပြံလီၤပြါတၢ်,ဟ့ၣ်နီၤတၢ်လၢပှၤဖှီၣ်ဖိယာ်ဖိလီၤ.အတၢ်တီတၢ်လိၤအိၣ်ဂၢၢ်ဆိးကျၢၤလီၤထူလီၤယိာ်လီၤ.အနၢၤအိၣ်ထီၣ်ထီလၢတၢ်လၤတၢ်ကပီၤအပူၤလီၤ.
10ပှၤတတီတလိၤန့ၣ်ကထံၣ်ဘၣ်ဝဲဒီးအသူၣ်ကကိၢ်အသးကဂီၤလီၤ.ကအ့ၣ်သဃံးအမဲ,ဒီးကပှံၢ်ကွံာ်ဝဲလီၤ.ပှၤတတီတလိၤအသးကွံတၢ်န့ၣ်ကတုၤဝဲလၢတၢ်ဟးဂီၤလီၤ.