Psalms 28
1ယကိးထီၣ်နၤ,ယွၤယလၢၢ်တဖျၢၣ်ဧၢ,အိၣ်ဘှီၣ်ဒီးယၤတဂ့ၤ.နမ့ၢ်အိၣ်ဘှီၣ်ဒီးယၤဒီး,ယကမၤဘၣ်ဖုးယသးဒ်ပှၤလၢအလဲၤလီၤဆူပျုၤပူၤအသိးန့ၣ်လီၤ.
2တုၤယဘါကညးနၤ,တုၤယယူာ်ထီၣ်ယစုဆူနဒၢးစီဆှံအအိၣ်ဒီး,ကနၣ်ကဃ့ကညးတၢ်အကလုၢ်တက့ၢ်.
3မ်နသုတထုးကွံာ်ယၤဒီးပှၤတတီတလိၤ,ဒီးပှၤမၤတၢ်အၢလၢအကတိၤတၢ်ဃူတၢ်ဖိးဒီးပှၤလၢအဃၢၤ,ဘၣ်ဆၣ်တၢ်အၢအိၣ်လၢအသးကံၢ်ပူၤတဖၣ်န့ၣ်တဂ့ၤ.
4ဟ့ၣ်လီၤတၢ်လၢအီၤဒ်အမၤတၢ်အသိး,ဒီးဒ်အမၤတၢ်အၢအသိးန့ၣ်တက့ၢ်.ဒ်အမၤတၢ်လၢအစုအသိးန့ၣ်ဟ့ၣ်လီၤအီၤလၢတၢ်တက့ၢ်.ဒုးန့ၢ်က့ၤအီၤလၢတၢ်အကြၢးဒီးအီၤတက့ၢ်.
5မ့ၢ်အတပးကဲဘၣ်ယွၤအမၤတၢ်,ဒီးအတၢ်လၢအကဲထီၣ်လၢအစုဘၣ်ဒီး,ကမၤဟးဂီၤကွံာ်အီၤ,ဒီးတမၤထီၣ်မၤထီဘၣ်အီၤဘၣ်.
6မ်ယွၤဘၣ်တၢ်စံးထီၣ်ပတြၢၤအီၤတက့ၢ်.အဂ့ၢ်ဒ်အံၤ,ကနၣ်လံယဃ့ကညးတၢ်အကလုၢ်လံ.
7ယွၤမ့ၢ်ယဂံၢ်ယဘါ,ဒီးယကတီၤတဘ့ၣ်လီၤ.ယသးသန့ၤအသးလၢအီၤ,ဒီးယဒိးတၢ်မၤစၢၤယၤ,မၤသးဒ်န့ၣ်ဒီး,ယသူၣ်ဖှံသးညီဒိၣ်မး,ဒီးယကစံးထီၣ်ပတြၢၤအီၤလၢယတၢ်သးဝံၣ်လီၤ.
8ယွၤမ့ၢ်ယဂံၢ်ယဘါဒီးအပှၤဒိးဖှူအသးအတၢ်အုၣ်က့ၤခီၣ်က့ၤအတိာ်လီၤ.
9အုၣ်က့ၤခီၣ်က့ၤနပှၤဂီၢ်မုၢ်,ဒီးဆိၣ်ဂ့ၤနတၢ်န့ၢ်သါ,ဒီးအံးလီၤကွၢ်လီၤအီၤ,ဒီးစိာ်ထီၣ်အီၤလီၤစိၤလီၤထီတက့ၢ်.