Psalms 71
1ယသန့ၤယသးလၢနၤ,ယွၤဧၢ,မ်ယသုတဘၣ်တၢ်မဲာ်ဆှးနီတစုတဂ့ၤ,
2မၤပူၤမၤဖျဲးယၤလၢနတၢ်တီတၢ်လိၤအဃိ,ဒီးမၤထူၣ်ဖျဲးယၤတက့ၢ်.ဒိးနနၢ်လၢယၤ,ဒီးအုၣ်က့ၤခီၣ်က့ၤယၤတက့ၢ်.
3ကဲထီၣ်တၢ်အိၣ်တၢ်ဆိးအလ့တဖျၢၣ်လၢယဂီၢ်လၢယကလဲၤဆူအအိၣ်တထံၣ်ဃီန့ၣ်တက့ၢ်.နမၤလိာ်တၢ်လၢယကတုၤလၢတၢ်အုၣ်က့ၤခီၣ်က့ၤလီၤ.အဂ့ၢ်ဒ်အံၤ,နမ့ၢ်ယလ့,ဒီးယတိာ်န့ၣ်လီၤ.
4ယွၤဧၢ,မၤထူၣ်ဖျဲးယၤလၢပှၤတတီတလိၤအစုပူၤ,လၢပှၤမၤအၢ,ဒီးပှၤမၤနးမၤဖှီၣ်အစုပူၤန့ၣ်တက့ၢ်.
5အဂ့ၢ်ဒ်အံၤ,နမ့ၢ်ယတၢ်မုၢ်လၢ်လီၤ,ကစၢ်ယွၤဧၢ,လၢယဖိၣ်သၣ်ခွါလံၤလံၤန့ၣ်,နမ့ၢ်ယတၢ်သန့ၤယသးအလီၢ်လီၤ.
6ယဒိးတၢ်မၤစၢၤယၤလၢနၤလၢတၢ်အဒၢလီၢ်လံၤလံၤလီၤ.နမ့ၢ်ပှၤလၢအဟံးန့ၢ်ယၤလၢယမိၢ်အဟၢဖၢပူၤလီၤ.ယကစံးထီၣ်ပတြၢၤနၤတထံၣ်ဃီလီၤ.
7ယမ့ၢ်တၢ်ကမၢကမၣ်အလီၢ်လၢပှၤအါဂၤအမဲာ်ညါ,ဘၣ်ဆၣ်ဒီးနမ့ၢ်ယတၢ်ပူၤဖျဲးခၢၣ်သနၢၢ်လီၤ.
8ယထးခိၣ်ကပှဲၤဒီးတၢ်စံးထီၣ်ပတြၢၤနၤ,နလၤကပီၤကိးမုၢ်နံၤမုၢ်နၤဒဲးလီၤ.
9လၢယသးပှၢ်အဆၢအကတီၢ်န့ၣ်ကွံာ်တ့ၢ်ကွံာ်ယၤတဂ့ၤ.ဖဲယဂံၢ်ယဘါလၢာ်ဒီး,လဲၤသဒၣ်ယၤတဂ့ၤ.
10အဂ့ၢ်ဒ်အံၤ,ယဒုၣ်ယဒါကတိၤထီဒါယၤ,ဒီးပှၤလၢအကွၢ်ဟုၣ်ယသးန့ၣ်ကူၣ်ထီၣ်ဖးလီၤတပူၤဃီ,
11ဒီးစံးဝဲ,ယွၤလဲၤသဒၣ်လံအီၤလံ,လူၤဒီးမၤန့ၢ်အီၤတက့ၢ်.အဂ့ၢ်ဒ်အံၤ,တၢ်မၤပူၤမၤဖျဲးအီၤတအိၣ်ဘၣ်.
12ယွၤဧၢ,အိၣ်ယံၤဒီးယၤတဂ့ၤ,ယကစၢ်ဧၢ,မၤချ့ချ့လၢတၢ်မၤစၢၤယၤအဂီၢ်တက့ၢ်.
13ယသးအဒုၣ်အဒါတဖၣ်န့ၣ်မ်အဘၣ်တၢ်မဲာ်ဆှးဒီးလၢာ်ကွံာ်တက့ၢ်.ပှၤလၢအဃုယဘၣ်တၢ်အၢတဖၣ်န့ၣ်,မ်တၢ်ဒုၣ်ဒွဲၣ်,ဒီးတၢ်ပာ်မဲာ်ဆှးလုၣ်ဘၢအီၤတက့ၢ်.
14မ့မ့ၢ်ယဲဒၣ်အံၤယကမုၢ်လၢ်တၢ်တထံၣ်ဃီ,ဒီးယကစံးထီၣ်ပတြၢၤနၤဒံးယံာ်ဒံးအါလီၤ.
15ယထးခိၣ်ကလီၣ်ဖျါထီၣ်နတၢ်တီတၢ်လိၤ,နတၢ်အုၣ်က့ၤခီၣ်က့ၤသ့သ့တနံၤလီၤ.အဂ့ၢ်ဒ်အံၤ,ယတသ့ၣ်ညါဘၣ်အတၢ်ဂံၢ်တဖၣ်ဘၣ်.
16ယကလဲၤတၢ်လၢကစၢ်ယွၤအဂံၢ်အဘါလီၤ.ယကစံးလၢနတၢ်တီတၢ်လိၤ,ထဲနဝဲဧိၤလီၤ.
17ကစၢ်ဧၢ,နသိၣ်လိယၤလၢယဖိၣ်သၣ်ခွါထီၣ်လံၤလံၤ,ဒီးယဒုးနဲၣ်နမၤတၢ်လီၤလးတဖၣ်တုၤခဲကနံၣ်အံၤလီၤ.
18ဒီးတုၤလီၤစ့ၢ်ကီးလၢယသးပှၢ်ဒီးခိၣ်ဝါန့ၣ်ယွၤဧၢ,ယတချုးဒုးနဲၣ်ဒံးဘၣ်နစုလၢပှၤလၢခံတစိၤ,နစိနကမီၤလၢကယဲၢ်ပှၤလၢအကဟဲတဖၣ်ဒီး,လဲၤသဒၣ်ယၤတဂ့ၤ.
19ဒီးနတၢ်တီတၢ်လိၤ,ယွၤဧၢ,အိၣ်ဝဲပၢၢ်လၢတၢ်ထီၣ်ထီန့ၣ်လီၤ.ပှၤလၢအမၤတၢ်အဒိၣ်တဖၣ်တဂၤဧၢ,မ့ၢ်မတၤမၤသးဒ်နၤအသိးန့ၣ်တဂၤလဲၣ်,ယွၤဧၢ,
20နဲဒၣ်,ပှၤလၢအဒုးထံၣ်ပှၤလၢတၢ်ကိၢ်တၢ်ဂီၤအဒိၣ်,ဒီးတၢ်အၢနးမးန့ၣ်,နကမၤမူထီၣ်က့ၤပှၤ,ဒီးနကဒုးဟဲက့ၤထီၣ်ပှၤလၢဟီၣ်ခိၣ်အတၢ်ယိာ်တဖၣ်အပူၤလီၤ.
21နကမၤအါထီၣ်ယတၢ်ကဲဒိၣ်,ဒီးဃၣ်နသး,ဒီးမၤမုာ်ထီၣ်က့ၤယၤလီၤ.
22ယကစံးထီၣ်ပတြၢၤစ့ၢ်ကီးနၤလၢသီတူၢ်,နတၢ်မ့ၢ်တၢ်တီ,ယကစၢ်ဧၢ,ယကသးဝံၣ်ထီၣ်နၤလၢတနၢ်,အံၣ်စရ့လးအတၢ်စီဆှံတဂၤဧၢ.
23ယပျုၤကသူၣ်ဖှံသးညီလီၤ.အဂ့ၢ်ဒ်အံၤ,ယကသးဝံၣ်ထီၣ်နၤ,ယသးလၢနပှ့ၤက့ၤအီၤလီၤ.
24ယပျုၤကဒုးနဲၣ်စ့ၢ်ကီးနတၢ်တီတၢ်လိၤသ့သ့တနံၤလီၤ.အဂ့ၢ်ဒ်အံၤ,ပှၤလၢအဃုယဘၣ်တၢ်အၢတဖၣ်န့ၣ်အမဲာ်ဆှး,ဒီးဘၣ်တၢ်ပာ်မဲာ်ဆှးအီၤလီၤ.