Psalms 19
1မူခိၣ်လီၣ်ဖျါထီၣ်ယွၤအလၤကပီၤ,ဒီးတၢ်လၢအမၤဝဲလၢအစုန့ၣ်မူကပိာ်လိၤဒုးနဲၣ်ဝဲလီၤ.
2တနံၤစံးဘၣ်တၢ်လၢတနံၤဒၣ်,ဒီးတနၤဒုးနဲၣ်တၢ်သ့ၣ်ညါလၢတနၤဒၣ်လီၤ.
3အကလုၢ်တအိၣ်ဘၣ်,တၢ်ကတိၤတအိၣ်ဘၣ်,အတၢ်သီၣ်ပတနၢ်ဟူဘၣ်.
4လၢဟီၣ်ခိၣ်ဒီဘ့ၣ်ညါန့ၣ်အနီၣ်ထိၣ်ပျံၤလဲၤထီၣ်ဝဲ,ဒီးအတၢ်ကတိၤန့ၣ်ဆူဟီၣ်ခိၣ်အကတၢၢ်လီၤ.ပာ်ဝဲဒီးဒဲတဖျၢၣ်လၢမုၢ်အဂီၢ်လၢအပူၤလီၤ.
5အဝဲန့ၣ်မၤသးဒ်တလးမူးပိာ်ခွါလၢအဟဲထီၣ်လၢအဒၢးပူၤအသိးန့ၣ်,အသူၣ်ဖှံအသးညီဒ်ပှၤအဒူလၢအသါကဃ့ၢ်သတြီၤတၢ်အသိးန့ၣ်လီၤ.
6ဟဲထီၣ်ဝဲလၢမူထံး,ဒီးအတၢ်လဲၤတရံးမ့ၢ်ဆူမူထံးန့ၣ်လီၤ.ဒီးလၢအတၢ်ကိၢ်အမဲာ်ညါန့ၣ်တၢ်တဘံၣ်ဘၣ်နီတမံၤဘၣ်.
7ယွၤအတၢ်သိၣ်အတၢ်သီလၢဝဲပှဲၤဝဲ,ဒီးမၤကျၢၤထီၣ်က့ၤပသးလီၤ.ယွၤအတၢ်အုၣ်အသးန့ၣ်မ့ၢ်ဝဲတီဝဲ,ဒီးဒုးကူၣ်သ့ပှၤလၢအတမၤလိဘၣ်တၢ်ဘၣ်လီၤ.
8ယွၤအကလုၢ်အကထါန့ၣ်တီဝဲလိၤဝဲ,ဒီးမၤခုထီၣ်က့ၤပသးလီၤ.ယွၤအတၢ်မၤလိာ်န့ၣ်ကဆှီဝဲ,ဒီးမၤကပီၤထီၣ်က့ၤပမဲာ်လီၤ.
9တၢ်ပျံၤယွၤန့ၣ်စီဝဲဆှံဝဲ,ဒီးအိၣ်ဝဲအစိၤစိၤအဃၣ်ဃၣ်လီၤ.ယွၤအတၢ်စံၣ်ညီၣ်တဖၣ်န့ၣ်မ့ၢ်အမ့ၢ်အတီဒီးလိၤဝဲတီဝဲခဲလၢာ်လီၤ.
10ပသးကွံအီၤအလီၢ်အိၣ်ဒိၣ်န့ၢ်ထူ,ဒီးဒိၣ်န့ၢ်ထူအစီထံလၢအအါန့ၣ်တက့ၢ်လီၤ.မ့ၢ်အဆၢန့ၢ်ကနဲစီ,ဒီးကနဲစီလၢအလီၤစီၤလၢကနဲအခိၣ်ထံအလိၤန့ၣ်တက့ၢ်လီၤ.
11နခ့နပှၤဒိးတၢ်ဒုးပလီၢ်အသးစ့ၢ်ကီးလၢအီၤ,ပှၤလၢအတိၢ်န့ၢ်အီၤန့ၣ်ဒိးန့ၢ်အဘျုးဖးဒိၣ်လီၤ.
12တၢ်လီၤကမၣ်တဖၣ်န့ၣ်မ့ၢ်မတၤသ့ၣ်ညါသ့တဂၤလဲၣ်.မၤကဆှီယၤလၢတၢ်ကမၣ်ခူသူၣ်န့ၣ်တက့ၢ်.
13တြီဃာ်စ့ၢ်ကီးနခ့နပှၤလၢတၢ်ကမၣ်အဒူတက့ၢ်.မ်အသုတပၢယၤတဂ့ၤ,မ့မ့ၢ်ဒ်န့ၣ်ဒီးယကလၢထီၣ်ပှဲၤထီၣ်,ဒီးယတၢ်ကမၣ်အဒိၣ်အယိာ်တအိၣ်ဘၣ်လီၤ.
14မ်ယထးခိၣ်အတၢ်ကတိၤ,ဒီးယသးအတၢ်ဆိကမိၣ်န့ၣ်,ဘၣ်နသးတက့ၢ်.ယလၢၢ်,ဒီးတၢ်ပှ့ၤက့ၤယၤ,ယွၤဧၢ.