Psalms 30
1ယကပာ်ထီၣ်ထီနၤ,ယွၤဧၢ,အဂ့ၢ်ဒ်အံၤ,နမၤပူၤမၤဖျဲးယၤ,ဒီးတဒုးသးခုဘၣ်ယဒုၣ်ယဒါလၢယဖီခိၣ်ဘၣ်.
2ယွၤယကစၢ်ဧၢ,ယဃ့ကညးတၢ်လၢနၤ,ဒီးနမၤဘျါက့ၤလံယၤလံ.
3ယွၤဧၢ,နဒုးဟဲထီၣ်ယသးလၢပျုၤပူၤ,နဒုးမူဒံးယၤလၢယသုတလဲၤလီၤဆူတၢ်ပူၤတဂ့ၤအဂ့ၢ်န့ၣ်လီၤ.
4သးဝံၣ်ထီၣ်ယွၤ,အပှၤစီဆှံသ့ၣ်ဧၢ,ဒီးစံးထီၣ်ပတြၢၤတၢ်လၢတၢ်သ့ၣ်နီၣ်ထီၣ်က့ၤအတၢ်စီဆှံန့ၣ်တက့ၢ်.
5အဂ့ၢ်ဒ်အံၤ,အတၢ်သးထီၣ်အံၤအိၣ်တစိၢ်ဖိ,မ့မ့ၢ်လၢတၢ်ဘၣ်အသးအပူၤန့ၣ်တၢ်မူအိၣ်ဝဲလီၤ.မဲာ်ထံမဲာ်နိကအိၣ်ကဆိးတနၤ,မ့မ့ၢ်လၢမုၢ်ဆ့ၣ်ထီၣ်န့ၣ်တၢ်သူၣ်ဖှံသးညီအိၣ်ထီၣ်ဝဲလီၤ.
6ဒီးဖဲယဘီၣ်ထီၣ်ညီထီၣ်န့ၣ်ယစံး,စိၤရီၤယတဟူးတဝးဘၣ်.
7ယွၤဧၢ,နဒုးဆူၣ်ထီၣ်ယကစၢၢ်အဂံၢ်အဘါလၢနဘျုးနဖှိၣ်လီၤ.နပာ်တဒၢနမဲာ်,ယသူၣ်ကိၢ်ယသးဂီၤလီၤ.
8ယကိးထီၣ်နၤ,ယွၤဧၢ,ဒီးယဃ့ကညးတၢ်လၢယွၤလီၤ.
9တုၤယလဲၤလီၤဆူတၢ်ပူၤန့ၣ်ယသွံၣ်ကဂိာ်မနုၤလဲၣ်.ဟီၣ်ခိၣ်အကမူၣ်ကစံးထီၣ်ပတြၢၤနၤဧါ.ကဒုးနဲၣ်နတၢ်မ့ၢ်တၢ်တီစ့ၢ်ကီးဧါ.
10ဒိကနၣ်လၢ်တက့ၢ်,ယွၤဧၢ,သူၣ်ကညီၤသးကညီၤယၤတက့ၢ်.ယွၤဧၢ,ကဲထီၣ်တၢ်မၤစၢၤယၤတက့ၢ်.
11ယဟီၣ်တၢ်ယၢၤတၢ်န့ၣ်နဒုးကဲထီၣ်လၢတၢ်ဂဲၤကလံၣ်လၢယဂီၢ်လီၤ.နဃ့ၣ်လီၤထၢၣ်တၢ်ကံးညာ်,ဒီးကံၢ်တူာ်ယယီၢ်ဒ့လၢတၢ်သးခု,
12ဒ်သိးယလၤကပီၤကသးဝံၣ်နၤ,ဒီးတအိၣ်ဘှီၣ်ဘၣ်,ယွၤ,ယကစၢ်ဧၢ,ယကစံးထီၣ်ပတြၢၤနၤလီၤထူလီၤယိာ်လီၤ.