Psalms 137
1ပဆ့ၣ်နီၤလၢဘၤဘူၤလိၣ်အထံကျိနံၤတဖၣ်,ဒီးတုၤပသ့ၣ်နီၣ်ထီၣ်စံယိၣ်ဒီး,ပမဲာ်ထံလီၤဖဲန့ၣ်လီၤ.
2ပဘျးထီၣ်ပတနၢ်တဖၣ်လၢပံၢ်သလီအဒ့လိၤလၢအကျါလီၤ.
3အဂ့ၢ်ဒ်အံၤ,ဖဲန့ၣ်ပှၤလၢအမၢကဲကုၢ်ပှၤတဖၣ်ဃ့ပသးဝံၣ်တၢ်လီၤ.ဒီးပှၤလၢအမၢန့ၢ်ဆူၣ်ပှၤတဖၣ်န့ၣ်ဃ့ပသးခုတၢ်လီၤ.စံးဝဲဒၣ်,သးဝံၣ်န့ၢ်ပှၤလၢစံယိၣ်အတၢ်သးဝံၣ်တယုၢ်ယုၢ်တက့ၢ်.
4ပကသးဝံၣ်ယွၤအတၢ်သးဝံၣ်လၢတခီဘီမုၢ်အပူၤန့ၣ်ဒ်လဲၣ်.
5ယရူၤၡလ့ၣ်ဧၢ,ယမ့ၢ်သးပ့ၤနီၣ်နၤဒီး,မ်ယစုထွဲသးပ့ၤနီၣ်တၢ်တက့ၢ်.
6ယမ့ၢ်တသ့ၣ်နီၣ်ထီၣ်က့ၤနၤဘၣ်ဒီး,ယမ့ၢ်တပးကဲယရူၤၡလ့ၣ်လၢယတၢ်သးခုအဒိၣ်ကတၢၢ်အဖီခိၣ်ဘၣ်ဒီး,မ်ယပျ့ၤစဲဘူးဒီးယခၣ်ခိၣ်တက့ၢ်.
7ယွၤဧၢ,ပှၤအဒိၣ်ဖိလၢအစံးဝဲ,မၤဟးဂီၤအီၤ,မၤဟးဂီၤအီၤပၢၢ်လၢအခီၣ်ထံးတက့ၢ်န့ၣ်သ့ၣ်နီၣ်ထီၣ်က့ၤအီၤလၢယရူၤၡလ့ၣ်အမုၢ်နံၤပူၤတက့ၢ်.
8ဘၤဘူၤလိၣ်ဖိမုၣ်လၢအကတုၤလၢတၢ်ဟးဂီၤဧၢ,ပှၤလၢအဟ့ၣ်ကၣ်နၤဒ်နမၤပှၤအသိးန့ၣ်မုာ်ဝဲလီၤ.
9ပှၤလၢအဟံးန့ၢ်နဖိဆံးတဖၣ်,ဒီးတ့ၢ်လီၤကွံာ်အီၤလၢလၢၢ်ခိၣ်န့ၣ်မုာ်ဝဲလီၤ.