Psalms 35
1ယွၤဧၢ,လိာ်ကွီၢ်ဒီးပှၤလၢအလိာ်ကွီၢ်ဒီးယၤ,ဒုးတၢ်ဒီးပှၤလၢအဒုးတၢ်ဒီးယၤတက့ၢ်.
2ဟံးဃာ်ကတီၤဖိ,ဒီးကတီၤဖးဒိၣ်,ဒီးဂဲၤဆၢထၢၣ်လၢတၢ်မၤစၢၤယၤအဂီၢ်န့ၣ်တက့ၢ်.
3ဒီးဘီၣ်ထီၣ်ဘီ,ဒီးနးဖိ,ဒ်သိးနကသဂၢၢ်ပှၤလၢအလူၤယၤန့ၣ်တက့ၢ်.စံးဘၣ်ယသး,ယမ့ၢ်နတၢ်အုၣ်က့ၤခီၣ်က့ၤန့ၣ်တက့ၢ်.
4ပှၤလၢအဃုယသးတဖၣ်မ်အမဲာ်ဆှး,ဒီးဘၣ်တၢ်ပာ်မဲာ်ဆှးအီၤတက့ၢ်.ဒီးပှၤလၢအဃုမၤအၢယၤန့ၣ်,မ်တၢ်ဒုးဃၣ်အီၤဆူအလီၢ်ခံန့ၣ်,ဒီးမ်အဘၣ်တၢ်မဲာ်ဆှးတက့ၢ်.
5မ်အမၤအသးဒ်ဖ့လၢကလံၤအမဲာ်ညါအသိး,ဒီးမ်ယွၤအကလူးလူၤအီၤတက့ၢ်.
6မ်အကျဲခံး,ဒီးဒုးလီၤတလံာ်တၢ်,ဒီးမ်ယွၤအကလူးလူၤအီၤတက့ၢ်.
7အဂ့ၢ်ဒ်အံၤ,အလီၢ်တအိၣ်ဘၣ်ဒီး,ပာ်ခူသူၣ်အပှာ်အစၤလၢတၢ်ပူၤလၢယဂီၢ်,အလီၢ်တအိၣ်ဘၣ်ဒီးခူၣ်လီၤတၢ်ပူၤလၢယသးအဂီၢ်လီၤ.
8ဖဲအတသ့ၣ်ညါဘၣ်န့ၣ်မ်တၢ်မၤဟးဂီၤအီၤ,ဒီးပှာ်လၢအပာ်ခူသူၣ်ဝဲန့ၣ်မ်အဘၣ်အကစၢ်ဒၣ်ဝဲတက့ၢ်.မ်အလီၤတဲာ်လၢတၢ်ဟးဂီၤအဝဲန့ၣ်အပူၤတက့ၢ်.
9ဒီးယသးကသူၣ်ခုသးခုလၢယွၤအပူၤ,ကသူၣ်ဖှံသးညီလၢအတၢ်အုၣ်က့ၤခီၣ်က့ၤအပူၤလီၤ.
10ယဃံခဲလၢာ်ကစံး,ယွၤဧၢ,မ့ၢ်မတၤလီၤဂာ်ဒီးနၤလၢအမၤပူၤမၤဖျဲးပှၤဘၣ်နးဘၣ်ဖှီၣ်လၢပှၤလၢအဆူၣ်န့ၢ်အီၤတဂၤအစုပူၤ,ဒီးပှၤဘၣ်နးဘၣ်ဖှီၣ်,ဒီးပှၤဖှီၣ်ဖိယာ်ဖိလၢပှၤလၢအဂုာ်န့ၢ်အတၢ်အစုပူၤန့ၣ်တဂၤလဲၣ်.
11ပှၤအုၣ်အသးကဘျံးကဘျၣ်ဂဲၤဆၢထၢၣ်,သံကွၢ်ယတၢ်လၢယတသ့ၣ်ညါဘၣ်လီၤ.
12ဟ့ၣ်ကၣ်ယၤလၢတၢ်အၢလၢတၢ်ဂ့ၤအဂီၢ်လီၤ.ယသးအိၣ်ကမဲဃဲကတူာ်လီၤ.
13ဒီးယဲဒၣ်အံၤဖဲအဝဲသ့ၣ်ဘၣ်ဆါန့ၣ်,ယဆ့မ့ၢ်ထၢၣ်တၢ်ကံးညာ်လီၤ.ယမၤဖှီၣ်ယသးလၢဒုၣ်တၢ်အီၣ်တၢ်အီ,ဒီးယဘါထုကဖၣ်တၢ်ဟဲက့ၤဆူယသးနါပှၢ်လီၤ.
14ယမၤယသးဒ်အမ့ၢ်ပှၤဒီတံၤဒီသကိး,ဒီပုၢ်ဒီဝဲၢ်ဒီးယၤအသိးန့ၣ်လီၤ.ဒ်ပှၤလၢအဟီၣ်လၢအမိၢ်အဃိအသိးန့ၣ်ယသးအုးဒီးယဆုးလီၤယခိၣ်လီၤ.
15မ့မ့ၢ်တုၤယဘၣ်ယဲတၢ်ကိၢ်တၢ်ဂီၤန့ၣ်ဒီး,အဝဲသ့ၣ်တဖၣ်သးခုဝဲ,ဒီးအိၣ်ဖှိၣ်ရိဖှိၣ်ဝဲ,ပှၤအၢတဖၣ်အိၣ်ဖှိၣ်ရိဖှိၣ်ဝဲထီဒါယၤ,ပှၤလၢယတသ့ၣ်ညါဘၣ်န့ၣ်,ဖှီယၤ,ဒီးတဆိတ့ၢ်ဘၣ်.
16ဒီးဒ်ပှၤလၢအတယူးယီၣ်ဘၣ်တၢ်,လၢအကတိၤဒိးတၢ်လၢကိၣ်ဘ့ၣ်ဘၣ်တဘ့ၣ်အဂီၢ်အသိးန့ၣ်အ့ၣ်သဃံးအမဲလၢယလိၤလီၤ.
17ကစၢ်ဧၢ,နကကွၢ်ကီဆံးယံာ်လဲၣ်.ထုးကွံာ်ယသးလၢအတၢ်ဟးဂီၤအပူၤ,ယပှၤတဂၤဧိၤလၢခ့ယုၢ်န့ၣ်တက့ၢ်.
18အန့ၣ်ဒီးယကစံးထီၣ်ပတြၢၤနၤလၢတၢ်အိၣ်ဖှိၣ်ဖးဒိၣ်အပူၤ,လၢပှၤဂီၢ်မုၢ်အါဂၤအကျါန့ၣ်ယကသးဝံၣ်ထီၣ်နၤလီၤ.
19ပှၤလၢအမ့ၢ်ယဒုၣ်ယဒါကလီကလီတဖၣ်န့ၣ်မ်အသုတသးခုလၢယဖီခိၣ်တဂ့ၤ.ပှၤလၢအသးဟ့ယၤကလီကလီန့ၣ်မ်အသုတဖျးအမဲာ်တဂ့ၤ.
20အဂ့ၢ်ဒ်အံၤ,တကတိၤဘၣ်တၢ်ဃူတၢ်ဖိးဘၣ်.ဒီးကူၣ်ထီၣ်တၢ်ကတိၤလီတၢ်ထီဒါပှၤလၢအအိၣ်ဘှီၣ်ကလာ်လၢကီၢ်ပူၤန့ၣ်လီၤ.
21ဒီးအဲးထီၣ်အထးခိၣ်ဖးလဲၢ်လၢယလိၤ,ဒီးစံးဝဲ,အၣ်ဟါ,အၣ်ဟါ,ပမဲာ်ထံၣ်ဘၣ်လီၤ.
22နထံၣ်ဘၣ်လံ,ယွၤဧၢ,အိၣ်ဘှီၣ်ကလာ်တဂ့ၤ.ကစၢ်ဧၢ,အိၣ်ယံၤဒီးယၤတဂ့ၤ.
23ထိၣ်ဂဲၤနသး,ဖုသံနီၣ်လၢတၢ်စံၣ်ညီၣ်ယၤအဂီၢ်,လၢယကွီၢ်အဂီၢ်န့ၣ်တက့ၢ်,ယွၤဒီးယကစၢ်ဧၢ.
24စံၣ်ညီၣ်ယၤဒ်နတၢ်တီတၢ်လိၤအသိးန့ၣ်တက့ၢ်,ယွၤယကစၢ်ဧၢ,ဒီးဒုးသးခုအီၤလၢယဖီခိၣ်တဂ့ၤ.
25မ်အသုတစံးလၢအသးကံၢ်ပူၤန့ၣ်အၣ်ဟါ,ဖဲပသးလံန့ၣ်တဂ့ၤ,မ်အသုတစံး,ပယူၢ်လီၤကွံာ်လံအီၤလံန့ၣ်တဂ့ၤ.
26ပှၤလၢအသးခုလၢယဘၣ်တၢ်အၢအဃိန့ၣ်မ်အမဲာ်ဆှး,ဒီးဘၣ်တၢ်ပာ်မဲာ်ဆှးအီၤတပူၤဃီတက့ၢ်.ပှၤလၢအပာ်ဒိၣ်အသးလၢယဖီခိၣ်တဖၣ်န့ၣ်မ်အဘၣ်တၢ်ဒုးကူဒုးသိးအီၤဒီးတၢ်မဲာ်ဆှး,ဒီးတၢ်ပာ်မဲာ်ဆှးအီၤန့ၣ်တက့ၢ်.
27ပှၤလၢအဘၣ်အသးလၢယတၢ်တီတၢ်လိၤန့ၣ်မ်အသူၣ်ဖှံသးညီ,ဒီးသူၣ်ခုသးခု,ဒီးစံးတထံၣ်ဃီ,မ်ယွၤလၢအဘၣ်အသးလၢအခ့အပှၤအတၢ်ဃူတၢ်ဖိးန့ၣ်ဘၣ်တၢ်ပာ်ထီၣ်ထီအီၤန့ၣ်တက့ၢ်.
28ဒီးယပျ့ၤကဒုးနဲၣ်နတၢ်တီတၢ်လိၤ,ကစံးထီၣ်ပတြၢၤနၤသ့သ့တနံၤလီၤ.