Psalms 62
1ယသးအိၣ်ခိးထဲယွၤတဂၤဧိၤလီၤ.တၢ်အုၣ်က့ၤခီၣ်က့ၤယၤန့ၣ်ဟဲလၢအအိၣ်လီၤ.
2ယလၢၢ်ဒီးတၢ်အုၣ်က့ၤခီၣ်က့ၤယၤ,ယတၢးထီၣ်ထီမ့ၢ်ထဲအဝဲဒၣ်ဧိၤလီၤ.ယတဟူးတဝးဘၣ်လၢအအါဘၣ်.
3သုသးကကဲၤထီၣ်ဘၣ်ပှၤတဂၤဆံးယံၣ်လဲၣ်.သုဝဲခဲလၢာ်သုမၤသံတၢ်,ဒ်တၢ်အဒူၣ်လၢအသကူး,တၢ်အကရၢလၢအဟူးဝးအသိးန့ၣ်လီၤ.
4ကူၣ်ထီၣ်ဖးလီၤဝဲထဲလၢအကတ့ၢ်လီၤကွံာ်အီၤလၢအလီၢ်ဂ့ၤ,ဘၣ်အသးလၢတၢ်ကတိၤကဘျံးကဘျၣ်လီၤ.ဆိၣ်ဂ့ၤဝဲလၢအထးခိၣ်ဒီးဆိၣ်အၢဝဲလၢအသးလီၤ. စ့လၤ.
5ယသးဧၢ,အိၣ်ခိးနဲဒၣ်ထဲယွၤတဂၤဧိၤန့ၣ်တက့ၢ်.အဂ့ၢ်ဒ်အံၤ,ယမုၢ်လၢ်တၢ်လၢအီၤလီၤ.
6ယလၢၢ်,ဒီးတၢ်အုၣ်က့ၤခီၣ်က့ၤယၤန့ၣ်မ့ၢ်ထဲအဝဲဒၣ်လီၤ.မ့ၢ်ယတၢးထီၣ်ထီလီၤ.ယတဟူးတဝးဘၣ်,
7တၢ်အုၣ်က့ၤခီၣ်က့ၤယၤ,ဒီးယလၤကပီၤအိၣ်ဝဲဒီးယွၤန့ၣ်လီၤ.ယဂံၢ်ယဘါအလၢၢ်,ယတၢ်ပူၤဖျဲးအလီၢ်န့ၣ်အိၣ်ဝဲလၢယွၤအပူၤန့ၣ်လီၤ.
8သန့ၤသုသးလၢအီၤကိးအကတီၢ်ဒဲး,ပှၤဂီၢ်မုၢ်သ့ၣ်ဧၢ,လူလီၤသုသးလၢအမဲာ်ညါတက့ၢ်.ယွၤမ့ၢ်တၢ်ပူၤဖျဲးအလီၢ်လၢပဂီၢ်လီၤ. စ့လၤ.
9ပှၤကညီအဖှီၣ်မ့ၢ်မးတၢ်ကလီကလီ,ဒီးပှၤကညီအဒိၣ်မ့ၢ်တၢ်ကဘျံးကဘျၣ်လီၤ.တၢ်မ့ၢ်ပာ်အီၤလၢစီၤပီၢ်အပူၤဒီး,ထီၣ်ဝဲဖှံန့ၢ်တၢ်ကလီကလီတက့ၢ်လီၤ.
10သန့ၤသုသးလၢတၢ်မၤအၢတၢ်တဂ့ၤ,ပာ်ကဖိသုသးလၢတၢ်မၤန့ၢ်ဆူၣ်ပှၤဂၤအတၢ်န့ၣ်တဂ့ၤ.တၢ်စုလီၢ်ခီၣ်ခိၣ်နၣ်မ့ၢ်အါထီၣ်ဒီး,ပာ်သုသးလၢအီၤတဂ့ၤ.
11ယွၤကတိၤတၢ်တဘျီလီၤ.ဒီးခံဘျီယနၢ်ဟူတၢ်အံၤ,တၢ်အစိအကမီၤအိၣ်ဒီးယွၤလီၤ.
12ဒီးတၢ်အဘျုးအဖှိၣ်အိၣ်ဝဲဒီးနၤ,ယွၤဧၢ,အဂ့ၢ်ဒ်အံၤ,နဟ့ၣ်ကၣ်ပှၤကညီဒ်အမၤတၢ်အသိးန့ၣ်ကိးဂၤဒဲးလီၤ.