Psalms 9
1ယကစံးထီၣ်ပတြၢၤယွၤလၢယသးဒီဖျၢၣ်ညါ,ယကဒုးနဲၣ်နတၢ်မၤလီၤလးခဲလၢာ်လီၤ.
2ယကသူၣ်ခုသးခု,ဒီးသူၣ်ဖှံသးညီလၢနပူၤ,ယကသးဝံၣ်ထီၣ်နမံၤ,တၢ်ထီကတၢၢ်တဂၤဧၢ,
3တုၤယဒုၣ်ယဒါဃ့ၢ်ကဒါက့ၤဒီး,ကလီၤဃံၤ,ဒီးဟးဂီၤလၢနမဲာ်ညါလီၤ.
4အဂ့ၢ်ဒ်အံၤ,နမၤလံယတၢ်စံၣ်ညီၣ်,ဒီးယတၢ်လိာ်ကွီၢ်လံ.နဆ့ၣ်နီၤလၢနလီၢ်ပစိာ်,ဒီးစံၣ်ညီၣ်တၢ်တီတီလိၤလိၤလီၤ.
5နသိၣ်ဃီၣ်ပှၤကလုာ်တဖၣ်လံ.နမၤဟးဂီၤပှၤတတီတလိၤလံ.နတြူာ်ကွံာ်အမံၤလီၤစိၤလီၤထီလံ.
6တၢ်အဒုၣ်အဒါန့ၣ်တၢ်မၤဟးဂီၤအီၤလၢာ်လံလီၤထူလီၤယိာ်လံ.ဒီးနမၤဟးဂီၤဝ့ၢ်တဖၣ်လံ,အတၢ်သ့ၣ်နီၣ်ထီၣ်က့ၤအီၤဟးဂီၤလံဒီးအီၤလံ.
7ဘၣ်ဆၣ်ဒီးယွၤအိၣ်ဝဲဆိးဝဲလီၤထူလီၤယိာ်လီၤ.ကတဲာ်ကတီၤလံအလီၢ်ပစိာ်လၢစံၣ်ညီၣ်တၢ်အဂီၢ်လံ.
8ဒီးကစံၣ်ညီၣ်ပှၤဟီၣ်ခိၣ်ဖိလၢတၢ်တီ,ဒီးစံၣ်ညီၣ်ပှၤဂီၢ်မုၢ်အကွီၢ်လၢတၢ်တီတၢ်လိၤလီၤ.
9ယွၤမ့ၢ်တိာ်တဖျၢၣ်လၢပှၤဘၣ်တၢ်မၤအၢအဂီၢ်,တိာ်တဖျၢၣ်လၢတၢ်မၤကိၢ်မၤဂီၤအဆၢကတီၢ်အပူၤန့ၣ်လီၤ.
10န့ၣ်လီၤ.ဒီးပှၤလၢအသ့ၣ်ညါနမံၤတဖၣ်န့ၣ်ကသန့ၤအသးလၢနၤလီၤ.အဂ့ၢ်ဒ်အံၤ,နတလဲၤသဒၣ်ဘၣ်ပှၤလၢအဃုနၤဘၣ်,ယွၤဧၢ.
11သးဝံၣ်ထီၣ်ယွၤလၢအအိၣ်ဝဲဆိးဝဲလၢစံယိၣ်အပူၤ,ဒုးနဲၣ်အမၤတၢ်လၢပှၤဂီၢ်မုၢ်အကျါန့ၣ်တက့ၢ်.
12အဂ့ၢ်ဒ်အံၤ,တုၤအဃုန့ၢ်တၢ်သွံၣ်ဒီး,သ့ၣ်နီၣ်ထီၣ်ထီၣ်က့ၤအီၤလီၤ.တသးပ့ၤနီၣ်ဘၣ်ပှၤလၢအဘၣ်တၢ်နးတၢ်ဖှီၣ်အတၢ်ကိးပသူထီၣ်န့ၣ်ဘၣ်.
13သူၣ်ကညီၤသးကညီၤယၤယွၤဧၢ,ကွၢ်ယတၢ်နးတၢ်ဖှီၣ်လၢယဒုၣ်ယဒါအဃိန့ၣ်တက့ၢ်,ပှၤလၢအဝံၣ်ဆၢထၢၣ်ယၤလၢတၢ်သံအပဲတရီအပူၤတဂၤဧၢ,
14ဒ်သိးယကစံၣ်တဲၤတဲလီၤကယဲၢ်တၢ်စံးထီၣ်ပတြၢၤနၤလၢစံယိၣ်အဖိမုၣ်အပဲတရီအပူၤအဂ့ၢ်လီၤ.ယကသူၣ်ဖှံသးညီလၢနတၢ်အုၣ်က့ၤခီၣ်က့ၤအပူၤလီၤ.
15ပှၤကလုာ်တဖၣ်န့ၣ်လီၤဘျၢလၢတၢ်ပူၤလၢအမၤဝဲလီၤ.ပှာ်ဧိၤစၤဧိၤလၢအပာ်ခူသူၣ်ဝဲတဆိန့ၣ်ဘၣ်လံလၢအခီၣ်ဒၣ်ဝဲလီၤ.
16ပှၤသ့ၣ်ညါယွၤလၢတၢ်စံၣ်ညီၣ်လၢအမၤဝဲန့ၣ်လီၤ.ပှၤတတီတလိၤဘၣ်န့ၣ်ဘၣ်လံလၢပျံၤသကွီၤအပူၤလၢအမၤဝဲလၢအစုဒၣ်ဝဲလီၤ. ဟံၣ်ကယိၣ်စ့လၤ.
17ပှၤတတီတလိၤဘၣ်န့ၣ်ကဘၣ်က့ၤဆူပျုၤပူၤ,ကယဲၢ်ပှၤကလုာ်တဖၣ်လၢအသးပ့ၤနီၣ်ယွၤခဲလၢာ်လီၤ.
18အဂ့ၢ်ဒ်အံၤ,ပှၤဖှီၣ်ဖိယာ်ဖိန့ၣ်တၢ်တသးပ့ၤနီၣ်ဘၣ်အီၤလီၤထူလီၤယိာ်ဘၣ်,ပှၤဘၣ်နးဘၣ်ဖှီၣ်အတၢ်မုၢ်လၢ်တဟါမၢ်ဘၣ်လီၤစိၤလီၤထီဘၣ်.
19ဂဲၤဆၢထၢၣ်တက့ၢ်,ယွၤဧၢ,မ်ပှၤကညီအသုတမၤနၢၤတၢ်တဂ့ၤ.မ်ပှၤကလုာ်တဖၣ်ဘၣ်တၢ်စံၣ်ညီၣ်အီၤလၢနမဲာ်ညါတက့ၢ်.
20ပာ်တၢ်ပျံၤတၢ်ဖုးလၢအလိၤ,ယွၤဧၢ,မ်ပှၤကလုာ်တဖၣ်သ့ၣ်ညါလၢအမ့ၢ်ထဲပှၤသပျၢၤပှၤကညီဧိၤတက့ၢ်. စ့လၤ.