Psalms 118
1စံးထီၣ်ပတြၢၤယွၤတက့ၢ်.အဂ့ၢ်ဒ်အံၤ,ဂ့ၤဝဲလီၤ.အဂ့ၢ်ဒ်အံၤ,အဘျုးအဖှိၣ်အိၣ်ဝဲလီၤထူလီၤယိာ်လီၤ.
2မ်အံၣ်စရ့လးစံးခဲကနံၣ်အံၤလၢအဘျုးအဖှိၣ်အိၣ်ဝဲလီၤထူလီၤယိာ်န့ၣ်တက့ၢ်.
3မ်အၤဟရိၣ်အပှၤဟံၣ်ဖိစံးခဲအံၤလၢအဘျုးအဖှိၣ်အိၣ်ဝဲလီၤထူလီၤယိာ်န့ၣ်တက့ၢ်.
4မ်ပှၤလၢအပျံၤယွၤစံးခဲအံၤလၢအဘျုးအဖှိၣ်အိၣ်ဝဲလီၤထူလီၤယိာ်န့ၣ်တက့ၢ်.
5လၢယဘၣ်တၢ်ကိၢ်တၢ်ဂီၤအပူၤန့ၣ်ယကိးထီၣ်ယွၤလီၤ.ယွၤစံးဆၢယၤဒီးပာ်ယၤလၢအလီၢ်ဖးလဲၢ်အပူၤလီၤ.
6ယွၤအိၣ်လၢယအိၣ်တခီလီၤ.ပှၤကညီကမၤယၤဒ်လဲၣ်ဒ်လဲၣ်န့ၣ်ယတဘၣ်ယိၣ်ဘၣ်.
7ယွၤအိၣ်လၢယအိၣ်တခီ,လၢပှၤမၤစၢၤယၤအကျါလီၤ.မၤသးဒ်န့ၣ်ဒီး,ယကထံၣ်ယတၢ်အဲၣ်ဒိးလၢပှၤလၢအသးဟ့ယၤတဖၣ်အလိၤန့ၣ်လီၤ.
8တၢ်ဃ့ၢ်ဆူယွၤအအိၣ်န့ၣ်ဂ့ၤန့ၢ်တၢ်သန့ၤပသးလၢပှၤကညီတက့ၢ်လီၤ.
9တၢ်ဃ့ၢ်ဆူယွၤအအိၣ်န့ၣ်ဂ့ၤန့ၢ်တၢ်သန့ၤပသးလၢပဒိၣ်ဖးဒိၣ်တက့ၢ်လီၤ.
10ပှၤကလုာ်ခဲလၢာ်အိၣ်ဝးတရံးယၤလီၤ.ယကဒီၣ်တဲာ်ကွံာ်အီၤလၢယွၤအမံၤသပှၢ်တၢၢ်လီၤ.
11အိၣ်ဝးတရံးယၤ,မ့ၢ်မးအိၣ်ဝးတရံးယၤလီၤ.ယကဒီၣ်တဲာ်ကွံာ်အီၤလၢယွၤအမံၤသပှၢ်တၢၢ်လီၤ.
12အိၣ်ဝးတရံးယၤဒ်ကွဲဧိၤကနဲဧိၤအသိးန့ၣ်လီၤ.လီၤပံာ်ဝဲဒ်တၤဆှုၣ်အမ့ၣ်အူအသိးန့ၣ်လီၤ.ယကဒီၣ်တဲာ်ကွံာ်အီၤလၢယွၤအမံၤသပှၢ်တၢၢ်လီၤ.
13နဆီၣ်လီၤယၤနးမးဒ်သိးယကလီၤဃံၤဘၣ်ဆၣ်ဒီးယွၤမၤစၢၤယၤလီၤ.
14ယွၤမ့ၢ်ယဂံၢ်ယဘါ,ဒီးယတၢ်သးဝံၣ်,ဒီးကဲထီၣ်ဝဲလၢတၢ်အုၣ်က့ၤခီၣ်က့ၤယၤလီၤ.
15တၢ်သူၣ်ခုသးခုဒီးတၢ်အုၣ်က့ၤခီၣ်က့ၤအကလုၢ်န့ၣ်အိၣ်ဝဲလၢပှၤတီပှၤလိၤအဒဲပူၤလီၤ.ယွၤအစုထွဲမၤတၢ်ဒီးအစိအကမီၤလီၤ.
16ယွၤအစုထွဲထီၣ်ထီဝဲ,ယွၤအစုထွဲမၤတၢ်ဒီးအစိအကမီၤလီၤ.
17ယတသံဘၣ်,မ့ၢ်ယကမူဒီးစံၣ်တဲၤတဲလီၤယွၤအတၢ်မၤတဖၣ်လီၤ.
18ယွၤသိၣ်ဃီၣ်ယၤနးမးလီၤ.ဘၣ်ဆၣ်ဒီးတဟ့ၣ်လီၤကွံာ်ယၤဆူတၢ်သံဘၣ်.
19အိးထီၣ်န့ၢ်ယၤလၢတၢ်တီတၢ်လိၤအတြဲၤတဖၣ်တက့ၢ်.ယကလဲၤနုာ်လၢအပူၤ,ယကစံးထီၣ်ပတြၢၤယွၤလီၤ.
20အအံၤမ့ၢ်ယွၤအတြဲၤလၢပှၤတီပှၤလိၤတဖၣ်ကလဲၤနုာ်လၢအပူၤန့ၣ်လီၤ.
21ယကစံးထီၣ်ပတြၢၤနၤလီၤ.အဂ့ၢ်ဒ်အံၤ,နကနၣ်ယကလုၢ်လံဒီးကဲထီၣ်တၢ်အုၣ်က့ၤခီၣ်က့ၤယၤလီၤ.
22လၢၢ်လၢပှၤမၤတၢ်ဖိညိကွံာ်ဝဲတဖျၢၣ်န့ၣ်အိၣ်ကဲထီၣ်လၢတၢ်အသနၢၣ်အခိၣ်လံ.
23တၢ်မၤအသးအံၤမ့ၢ်လၢယွၤ,ဒီးမ့ၢ်တၢ်လီၤလးလၢပမဲာ်ညါလီၤ.
24တၢ်လၢမုၢ်တနံၤအံၤ,ယွၤတ့ဝဲလီၤ.ပကသူၣ်ဖှံသးညီ,ဒီးသူၣ်ခုသးခုလၢအပူၤလီၤ.
25အုၣ်က့ၤခီၣ်က့ၤတၢ်ခဲကနံၣ်အံၤတက့ၢ်,ယွၤဧၢ.ဒုးဘီၣ်ထီၣ်ညီထီၣ်လၢ်တၢ်ခဲကနံၣ်အံၤတက့ၢ်,ယွၤဧၢ.
26ပှၤလၢအဟဲဝဲလၢယွၤအမံၤန့ၣ်မ်အဘၣ်တၢ်ဆိၣ်ဂ့ၤတက့ၢ်,ပဆိၣ်ဂ့ၤသုလၢယွၤအဟံၣ်ပူၤလီၤ.
27ယွၤမ့ၢ်ကစၢ်ဒီးဒုးကပီၤထီၣ်ဘၣ်လံပှၤလံ.စၢဃာ်တၢ်လုၢ်လၢတၢ်လုၢ်လီၢ်အနၢၤလၢပျံၤတဖၣ်န့ၣ်တက့ၢ်.
28နမ့ၢ်ယကစၢ်,ဒီးယကစံးထီၣ်ပတြၢၤနၤ,နမ့ၢ်ယကစၢ်,ဒီးယကပာ်ထီၣ်ထီနၤလီၤ.
29စံးထီၣ်ပတြၢၤယွၤတက့ၢ်.အဂ့ၢ်ဒ်အံၤ,ဂ့ၤဝဲလီၤ.အဂ့ၢ်ဒ်အံၤ,အဘျုးအဖှိၣ်အိၣ်ဝဲလီၤထူလီၤယိာ်လီၤ.