Psalms 50
1ကစၢ်တဖၣ်အကစၢ်,ယွၤကတိၤတၢ်,ဒီးကိးပှၤဟီၣ်ခိၣ်ဖိလၢမုၢ်ထီၣ်ပၢၢ်လၢမုၢ်နုာ်လီၤ.
2လၢစံယိၣ်တၢ်ဃံတုာ်လၤတုာ်အပူၤန့ၣ်ယွၤကပီၤထီၣ်ဝဲလီၤ.
3ပကစၢ်ကဟဲ,ဒီးတအိၣ်ဘှီၣ်ဘၣ်.မ့ၣ်အူအီၣ်တၢ်လၢအမဲာ်ညါ,ဒီးကလံၤမုၢ်တွၤဟဲဝးတရံးအီၤဆူၣ်ဆူၣ်ကလဲာ်လီၤ.
4ကကိးဝဲဆူမူခိၣ်လၢထးခီ,ဒီးလၢဟီၣ်ခိၣ်န့ၣ်လၢအကစံၣ်ညီၣ်န့ၢ်အပှၤဂီၢ်မုၢ်အကွီၢ်လီၤ.
5ဒုးအိၣ်ဖှိၣ်ရိဖှိၣ်ယပှၤစီဆှံလၢအအၢၣ်လီၤအီလီၤတၢ်ဒီးယၤလၢတၢ်လုၢ်တဖၣ်န့ၣ်ဆူယအိၣ်တက့ၢ်.
6ဒီးမူခိၣ်ကဒုးနဲၣ်အတၢ်တီတၢ်လိၤလီၤ.အဂ့ၢ်ဒ်အံၤ,ယွၤအကစၢ်ဒၣ်ဝဲန့ၣ်မ့ၢ်ပှၤစံၣ်ညီၣ်ကွီၢ်တဂၤလီၤ. စ့လၤ.
7ဒိကနၣ်,ယပှၤဂီၢ်မုၢ်သ့ၣ်ဧၢ,ဒီးယကကတိၤတၢ်,အံၣ်စရ့လးဧၢ,ဒီးယကအုၣ်ယသးလၢနဂ့ၢ်နကျိၤလီၤ.ယဲဒၣ်အံၤယမ့ၢ်ကစၢ်,နကစၢ်လီၤ.
8ယတသိၣ်ဃီၣ်ဘၣ်နၤလၢနတၢ်လုၢ်အဂ့ၢ်အကျိၤဘၣ်.ဒီးနတၢ်လုၢ်မ့ၣ်အူအိၣ်ဝဲလၢယမဲာ်ညါတထံၣ်ဃီလီၤ.
9ယတဟံးန့ၢ်ဘၣ်ဂီၤဖံးဖါလၢနဟံၣ်ပူၤ,မဲာ်တဲးလဲးဖါလၢနကရၢပူၤဘၣ်.
10အဂ့ၢ်ဒ်အံၤ,ဆၣ်ဖိကီၢ်ဖိအမံၤလၢပှၢ်လၢ်ကျါန့ၣ်မ့ၢ်ယတၢ်ကိးအဒုဒဲး,ဒီးဆၣ်ဖိကီၢ်ဖိအဒၢလၢကစၢၢ်တဖၣ်အလိၤဖဲအအိၣ်အကထိကထိန့ၣ်လီၤ.
11ယသ့ၣ်ညါထိၣ်ဧိၤလံၣ်ဧိၤလၢကစၢၢ်ကလိခဲလၢာ်,ဒီးတၢ်ဒူတၢ်ဃိၤလၢပျီပူၤန့ၣ်မ့ၢ်ယတၢ်လီၤ.
12တၢ်မ့ၢ်သၣ်ဝံၤယသးဒီး,ယတစံးဘၣ်နၤဘၣ်.အဂ့ၢ်ဒ်အံၤ,ဟီၣ်ခိၣ်,ဒီးအတၢ်ပှဲၤန့ၣ်မ့ၢ်ယတၢ်လီၤ.
13ယကအီၣ်ဂီၤဖံးအညၣ်,ဒီးယကအီမဲာ်တဲးလဲးအသွံၣ်စ့ၢ်ကီးဧါ.
14မၤဘူၣ်ယွၤလၢတၢ်စံးထီၣ်ပတြၢၤ,ဒီးမၤဘူၣ်တၢ်ထီကတၢၢ်တဂၤလၢတၢ်ဘၣ်ဃးဒီးနဆိၣ်တၢ်ဒ်န့ၣ်တက့ၢ်.
15ဒီးလၢတၢ်ကိၢ်တၢ်ဂီၤအမုၢ်တနံၤန့ၣ်ကိးထီၣ်ယၤတက့ၢ်,ဒီးယကမၤပူၤမၤဖျဲးနၤ,ဒီးနကမၤလၤမၤကပီၤယၤလီၤ.
16မ့မ့ၢ်ပှၤတတီတလိၤန့ၣ်ယွၤစံးဘၣ်အီၤ,နစံၣ်တဲၤတဲလီၤယတၢ်မၤလိာ်ဒီးစိာ်ထီၣ်ယတၢ်အၢၣ်လီၤအီလီၤလၢနထးခိၣ်န့ၣ်ဘၣ်ဃးဒီးနလိၤဒ်လဲၣ်.
17မ့ၢ်နသးဟ့တၢ်သိၣ်တၢ်သီဒီးနကွံာ်တ့ၢ်ကွံာ်ယကလုၢ်ကထါလၢနလီၢ်ခံန့ၣ်လီၤ.
18နမ့ၢ်ထံၣ်ဘၣ်ပှၤဟုၣ်တၢ်ဒီး,ဘၣ်နသးလၢအီၤလီၤ.ဒီးနဂီၢ်အိၣ်ဒီးပှၤအဲၣ်ဘၢတၢ်တဖၣ်လီၤ.
19နဟ့ၣ်နထးခိၣ်ဆူတၢ်အၢ,ဒီးနပျ့ၤတ့လီၤတၢ်လီၤ.
20နဆ့ၣ်နီၤကတိၤတၢ်ထီဒါနဒီပုၢ်ဝဲၢ်,နဒုၣ်ဒွဲၣ်နမိၢ်အဖိခွါလီၤ.
21တၢ်န့ၣ်တဖၣ်နမၤတၢ်,ဒီးယအိၣ်ဃိကလာ်လီၤ.နဆိကမိၣ်လၢယဒ်သိးဒီးနကစၢ်ဒၣ်နဲလီၤ.ယကသိၣ်ဃီၣ်နၤ,ယကပာ်ဖျါထီၣ်တၢ်လၢနမဲာ်ညါလီၤ.
22ကွၢ်ဆိကမိၣ်တၢ်အံၤ,ပှၤလၢအသးပ့ၤနီၣ်ယွၤသ့ၣ်ဧၢ,ယကအ့ၣ်ဖှီဘၣ်ဖုးသု,ဒီးပှၤမၤပူၤမၤဖျဲးတၢ်တအိၣ်ဘၣ်.
23ပှၤလၢအမၤဘူၣ်တၢ်စံးထီၣ်ပတြၢၤန့ၣ်မၤလၤကပီၤယၤလီၤ,ဒီးပှၤလၢအကတဲာ်ကတီၤအကျဲန့ၣ်ယကဒုးနဲၣ်အီၤလၢယွၤအတၢ်အုၣ်က့ၤခီၣ်က့ၤလီၤ.