Psalms 69
1အုၣ်က့ၤခီၣ်က့ၤယၤတက့ၢ်,ယွၤဧၢ,အဂ့ၢ်ဒ်အံၤ,ထံတဖၣ်န့ၣ်ဟဲနုာ်ပၢၢ်လၢယသးလီၤ.
2ယလီၤဘျၢလၢကပံာ်ယိာ်အကျါ,ဒီးဆၢထၢၣ်အလီၢ်တအိၣ်ဘၣ်.ယဟဲနုာ်လၢထံယိာ်အကျါ,ဒီးထံလုၣ်ဘၢယၤလီၤ.
3တၢ်ဘှံးယသးလၢယကိးထီၣ်အဃိ,ယကိာ်ပူၤဃ့ထီ,ယမဲာ်လၢာ်လၢယကွၢ်လၢ်ယကစၢ်အကျဲအဃိလီၤ.
4ပှၤလၢအသးဟ့ယၤကလီကလီန့ၣ်အိၣ်ဝဲအါန့ၢ်ယခိၣ်သူအဘိတက့ၢ်လီၤ.ပှၤလၢအကမၤဟးဂီၤယၤ,ယဒုၣ်ယဒါတတီဘၣ်တဖၣ်န့ၣ်အိၣ်ဆူၣ်မးလီၤ.တၢ်လၢယတဟံးန့ၢ်န့ၣ်ယဟ့ၣ်ကၣ်လီၤ.
5ယွၤဧၢ,နသ့ၣ်ညါယတၢ်ကလီကလီ,ဒီးယတၢ်ဒဲးဘးတအိၣ်တဒၢဘၣ်လၢနၤဘၣ်.
6ပှၤလၢအအိၣ်ခိးနၤတဖၣ်န့ၣ်,ယွၤ,တၢ်သုးမုၢ်ဂီၢ်မုၢ်အယွၤဧၢ,မ်အသုတမဲာ်ဆှးလၢယဃိတဂ့ၤ.ပှၤလၢအဃုနၤတဖၣ်န့ၣ်မ်အသုတဘၣ်တၢ်ပာ်မဲာ်ဆှးအီၤလၢယဃိတဂ့ၤ,အံၣ်စရ့လးအကစၢ်ဧၢ,
7အဂ့ၢ်ဒ်အံၤ,ယဘၣ်တၢ်ဒုၣ်ဒွဲၣ်လၢနဃိလီၤ.တၢ်မဲာ်ဆှးလုၣ်ဘၢယမဲာ်လီၤ.
8ယကဲထီၣ်ပှၤတမှံၤလၢယဒီပုၢ်ဝဲၢ်အမဲာ်ညါ,ဒီးပှၤတခီဘီမုၢ်ဖိလၢယမိၢ်အဖိအမဲာ်ညါလီၤ.
9အဂ့ၢ်ဒ်အံၤ,ယသးဆူၣ်လၢနဟံၣ်အဂီၢ်န့ၣ်အီၣ်ကွံာ်ယၤလံ,ဒီးပှၤအတၢ်ဒုၣ်ဒွဲၣ်နၤန့ၣ်လီၤဘၣ်လၢယလိၤလီၤ.
10ဖဲယမဲာ်ထံလီၤ,ဒီးယသးဒုၣ်တၢ်အီၣ်ဒီး,အဝဲန့ၣ်ကဲထီၣ်ဝဲလၢတၢ်ဒုၣ်ဒွဲၣ်ယၤလီၤ.
11ယပာ်ထၢၣ်အတၢ်ကံးညာ်လၢယကူယသိး,ဒီးယကဲထီၣ်တၢ်ကတိၤဒိလၢပှၤအမဲာ်ညါလီၤ.
12ပှၤလၢအဆ့ၣ်နီၤလၢပဲတရီအပူၤန့ၣ်ကတိၤတၢ်ထီဒါယၤလီၤ.ဒီးယကဲထီၣ်ပှၤအီမူၤသံးအအုၣ်တၢ်အလီၢ်လီၤ.
13မ့မ့ၢ်ယဲဒၣ်အံၤလၢအဆၢအကတီၢ်ဘၣ်န့ၣ်ယဘါထုကဖၣ်နၤလီၤ.ယွၤဧၢ,ကနၣ်ယကလုၢ်လၢနဘျုးအါနဖှိၣ်ဒိၣ်အဃိ,လၢနတၢ်အုၣ်က့ၤခီၣ်က့ၤတၢ်အတၢ်မ့ၢ်တၢ်တီအဃိန့ၣ်တက့ၢ်.
14မၤပူၤမၤဖျဲးယၤလၢကပံာ်န့ၣ်တက့ၢ်,ဒီးမ်ယသုတလီၤဘျၢတဂ့ၤ.မ်တၢ်မၤပူၤမၤဖျဲးယၤလၢပှၤသးဟ့ယၤတဖၣ်,ဒီးလၢထံယိာ်န့ၣ်တက့ၢ်.
15မ်ထံသုတလုၣ်ဘၢယၤတဂ့ၤ.မ်ထံယိာ်ပူၤန့ၣ်အသုတယူၢ်လီၤကွံာ်ယၤတဂ့ၤ,မ်တၢ်ပူၤန့ၣ်အသုတကျၢၢ်ဘၢန့ၢ်ယၤလၢအကိာ်ပူၤတဂ့ၤ.
16ကနၣ်ယကလုၢ်တက့ၢ်,ယွၤဧၢ,အဂ့ၢ်ဒ်အံၤ,နဘျုးနဖှိၣ်မ့ၢ်တၢ်အဂ့ၤလီၤ.ဃၣ်နသးဆူယအိၣ်,ဒ်နသးကညီၤတၢ်အါအသိးန့ၣ်တက့ၢ်.
17ပာ်တဒၢနမဲာ်လၢနခ့နပှၤအအိၣ်န့ၣ်တဂ့ၤ.အဂ့ၢ်ဒ်အံၤ,ယဘၣ်တၢ်ကိၢ်တၢ်ဂီၤလီၤ.ဒိကနၣ်ယကလုၢ်လၢအဆိအချ့တက့ၢ်.
18သုးဘူးနသးဆူယသးအအိၣ်,ဒီးပှ့ၤက့ၤအီၤတက့ၢ်.မၤပူၤဖျဲးယၤလၢယဒုၣ်ယဒါအဃိန့ၣ်တက့ၢ်.
19နဲဒၣ်အံၤနသ့ၣ်ညါယတၢ်ဒုၣ်ဒွဲၣ်,ဒီးယတၢ်မဲာ်ဆှး,ဒီးတၢ်ပာ်ဆှးယမဲာ်လီၤ.ယဒုၣ်ယဒါအိၣ်ဝဲလၢနမဲာ်ညါခဲလၢာ်လီၤ.
20တၢ်ဒုၣ်ဒွဲၣ်ဒုးသူၣ်ကၢ်သးလီၤယၤ,ဒီးယသးဆါလီၤ.ဒီးယကွၢ်လၢ်ပှၤလၢအကသးကညီၤတၢ်,ဒီးတအိၣ်ဘၣ်.ဒီးလၢပှၤမၤမုာ်တၢ်အကျဲ,ဒီးယတထံၣ်န့ၢ်ဘၣ်လီၤ.
21ဒီးပှၤဟ့ၣ်လီၤယၤလၢတၢ်ခၣ်လၢယတၢ်အီၣ်အဂီၢ်,ဒီးတုၤတၢ်သူယသးလၢထံဒီး,ဒုးအီယၤလၢတၤဆံၣ်အထံလီၤ.
22မ်အစီၢ်နီၤခိၣ်ကဲထီၣ်ထုတဆိလၢအမဲာ်ညါတက့ၢ်.ဒီးတၢ်လၢအမၤမုာ်ထီၣ်က့ၤအလီၢ်န့ၣ်မ်အကဲထီၣ်တၢ်ပျံၤသကွီၤန့ၣ်တက့ၢ်.
23မ်အမဲာ်ခံးလီၤလၢအသုတထံၣ်ဘၣ်တၢ်တဂ့ၤ,ဒီးဒုးကနိးအယီၢ်ဒ့တထံၣ်ဃီတက့ၢ်.
24လူလီၤနသးထီၣ်လၢအလိၤတက့ၢ်.မ်နသးဒိၣ်ကဲၤထီၣ်ချုးန့ၢ်အီၤတက့ၢ်.
25မ်အအိၣ်အဆိးအလီၢ်အိၣ်သယုၢ်တက့ၢ်.မ်ပှၤအသုတအိၣ်တဆိးလၢအဒဲတဖၣ်အပူၤန့ၣ်တဂ့ၤ.
26အဂ့ၢ်ဒ်အံၤ,မၤအၢမၤသီပှၤလၢနကျီအီၤ,ဒီးဃဲၤတၢ်လၢပှၤလၢနဆဲးအီၤတဖၣ်အတၢ်နးတၢ်ဖှီၣ်အဂ့ၢ်လီၤ.
27ပာ်တၢ်အၢလၢအတၢ်အၢအဖီခိၣ်တက့ၢ်,ဒီးဒုးဟဲနုာ်အီၤဆူနတၢ်တီတၢ်လိၤအပူၤတဂ့ၤ.
28တြူာ်ကွံာ်အီၤလၢလံာ်မူအပူၤတက့ၢ်.ဒီးမ်အသုတအိၣ်ကွဲးအသးဒီးပှၤအတီအလိၤတဂ့ၤ.
29မ့မ့ၢ်ယဲဒၣ်အံၤယဘၣ်နးဘၣ်ဖှီၣ်,ဒီးယသူၣ်အုးသးအုးလီၤ.ယွၤဧၢ,မ်နတၢ်အုၣ်က့ၤခီၣ်က့ၤတၢ်န့ၣ်ပာ်ယၤလၢတၢ်ထီၣ်ထီတက့ၢ်.
30ယကစံးထီၣ်ပတြၢၤယွၤအမံၤလၢတၢ်သးဝံၣ်,ဒီးယကပာ်ဒိၣ်အီၤလၢတၢ်စံးထီၣ်ပတြၢၤလီၤ.
31ဒီးကဂ့ၤန့ၢ်ဂီၤဘုၣ်ဂီၤဖံး,ကျီၢ်ဧိၤကျၢ်ဧိၤလၢအအိၣ်ဒီးနၢၤဒီးခီၣ်မ့ၣ်တက့ၢ်န့ၣ်လၢယွၤအမဲာ်ညါလီၤ.
32ပှၤအသးစူၤန့ၣ်ကထံၣ်ဘၣ်ဝဲဒီးသးခုဝဲလီၤ,ပှၤလၢအဃုယွၤသ့ၣ်ဧၢ,သုသးကမူလီၤ.
33အဂ့ၢ်ဒ်အံၤ,ယွၤဒိကနၣ်ပှၤဖှီၣ်ဖိယာ်ဖိအကလုၢ်,ဒီးပှၤဘၣ်တၢ်စၢဃာ်တဖၣ်န့ၣ်တမၤတရီတပါဘၣ်အီၤဘၣ်.
34မ်မူခိၣ်ဒီးဟီၣ်ခိၣ်,ပီၣ်လဲၣ်ဒီးကယဲၢ်တၢ်လၢအဂဲၤလၢအပူၤခဲလၢာ်န့ၣ်စံးထီၣ်ပတြၢၤအီၤတက့ၢ်.
35အဂ့ၢ်ဒ်အံၤ,ယွၤကအုၣ်က့ၤခီၣ်က့ၤစံယိၣ်,ဒီးမၤထီၣ်က့ၤယူဒၤအဝ့ၢ်တဖၣ်,ဒီးအဝဲသ့ၣ်တဖၣ်ကအိၣ်ကဆိးလၢအပူၤ,ဒီးကန့ၢ်ဘၣ်အီၤလီၤ,
36ဒီးအခ့အပှၤအချံအသၣ်န့ၣ်ကန့ၢ်သါဝဲ,ဒီးပှၤလၢအအဲၣ်အမံၤတဖၣ်ကအိၣ်ကဆိးလၢအပူၤလီၤ.