Llyfr Deuteronomium 29
1I Dduw y perthyn pethau dirgel. Dyma eiriau y cyfammod a orchymynodd yr Arglwydd wrth Moses ei wneuthur â meibion Israel, yn nhir Moab, heb law y cyfammod a ammododd efe â hwynt yn Horeb.
2¶ A Moses a alwodd ar holl Israel, ac a ddywedodd wrthynt, Chwi a welsoch yr hyn oll a wnaeth yr Arglwydd o flaen eich llygaid chwi yn nhir yr Aipht, i Pharaoh, ac i’w holl weision, ac i’w holl dir;
3Y profedigaethau mawrion a welodd eich llygaid, yr arwyddion a’r rhyfeddodau mawrion hynny:
4Ond ni roddodd yr Arglwydd i chwi galon i wybod, na llygaid i weled, na chlustiau i glywed, hyd y dydd hwn.
5Arweiniais chwi hefyd yn yr anialwch ddeugain mlynedd: ni heneiddiodd eich dillad am danoch, ac ni heneiddiodd dy esgid am dy droed.
6Bara ni fwyttasoch, a gwin neu ddïod gref nid yfasoch: fel y gwybyddech mai myfi yw yr Arglwydd eich Duw chwi.
7A daethoch hyd y lle hwn: yna daeth allan Sehon brenhin Hesbon, ac Og brenhin Basan, i’n cyfarfod mewn rhyfel; a ni a'u lladdasom hwynt:
8Ac a ddygasom eu tir hwynt, ac a’i rhoisom yn etifeddiaeth i’r Reubeniaid, ac i’r Gadiaid, ac i hanner llwyth Manasseh.
9Cedwch gan hynny eiriau y cyfammod hwn, a gwnewch hwynt: fel y llwyddoch ym mhob peth a wneloch.
10¶ Yr ydych chwi oll yn sefyll heddyw ger bron yr Arglwydd eich Duw; pennaethiaid eich llwythau, eich henuriaid, a’ch swyddogion, a holl wŷr Israel,
11Eich plant, eich gwragedd, a’th dïeithr- ddyn yr hwn sydd o fewn dy wersyll, o gymmynydd dy goed hyd wchynnydd dy ddwfr:
12I fyned o honot dan gyfammod yr Arglwydd dy Dduw, a than ei gynghrair ef, yr hwn y mae yr Arglwydd dy Dduw yn ei wneuthur â thi heddyw:
13I’th sicrhâu heddyw yn bobl iddo ei hun, ac i fod o hono yntau yn Dduw i ti, megis y llefarodd wrthyt, ac fel y tyngodd wrth dy dadau, wrth Abraham, wrth Isaac, ac wrth Jacob.
14Ac nid â chwi yn unig yr ydwyf fi yn gwneuthur y cyfammod hwn, a’r cynghrair yma;
15Ond â’r hwn sydd yma gyd â ni yn sefyll heddyw ger bron yr Arglwydd ein Duw, ac â’r hwn nid yw yma gyd â ni heddyw:
16(Canys chwi a wyddoch y modd y trigasom ni yn nhir yr Aipht, a’r modd y daethom trwy ganol y cenhedloedd y rhai y daethoch trwyddynt;
17A chwi a welsoch eu ffieidd-dra hwynt a’u heilun-dduwiau, pren a maen, arian ac aur, y rhai oedd yn eu mysg hwynt:)
18Rhag bod yn eich mysg wr, neu wraig, neu deulu, neu lwyth, yr hwn y try ei galon heddyw oddi wrth yr Arglwydd ein Duw, i fyned i wasanaethu duwiau y cenhedloedd hyn; rhag bod yn eich mysg wreiddyn yn dwyn gwenwyn a wermod:
19A bod, pan glywo efe eiriau y felldith hon, ymfendithio o hono yn ei galon ei hun, gan ddywedyd, Heddwch fydd i mi, er i mi rodio y’nghyndynrwydd fy nghalon, i chwanegu meddwdod at syched:
20Ni fyn yr Arglwydd faddeu iddo; canys yna y myga digllonedd yr Arglwydd a’i eiddigedd yn erbyn y gwr hwnnw, a’r holl felldithion sydd ysgrifenedig yn y llyfr hwn a orwedd arno ef, a’r Arglwydd a ddilea ei enw ef oddi tan y nefoedd.
21A’r Arglwydd a’i neilldua ef oddi wrth holl lwythau Israel, i gael drwg, yn ol holl felldithion y cyfammod a ysgrifenwyd yn llyfr y gyfraith hon.
22A dywed y genhedlaeth a ddaw ar ol, sef eich plant chwi, y rhai a godant ar eich ol chwi, a’r dïeithr yr hwn a ddaw o wlad bell, pan welont bläau y wlad hon, a’i chlefydau, trwy y rhai y mae yr Arglwydd yn ei chlwyfo hi;
23A’i thir wedi ei losgi oll gan frwmstan a halen, na heuir ef, ac na flaen-dardda, ac na ddaw i fynu un llysieuyn ynddo, fel dinystr Sodom a Gomorrah, Admah a Seboim, y rhai a ddinystriodd yr Arglwydd yn ei lid a’i ddigofaint:
24Ië, yr holl genhedloedd a ddywedant, Paham y gwnaeth yr Arglwydd fel hyn i’r tir hwn? pa ddigter yw y digofaint mawr hwn?
25Yna y dywedir, Am wrthod o honynt gyfammod Arglwydd Dduw eu tadau, yr hwn a ammododd efe â hwynt pan ddug efe hwynt allan o dir yr Aipht.
26Canys aethant a gwasanaethasant dduwiau dïeithr, ac ymgrymmasant iddynt; sef duwiau nid adwaenent hwy, ac ni roddasai efe iddynt.
27Am hynny yr ennynodd digllonedd yr Arglwydd yn erbyn y wlad hon, i ddwyn arni bob melldith a’r y sydd ysgrifenedig yn y llyfr hwn.
28A’r Arglwydd a’u dinystriodd hwynt o’u tir mewn digofaint, ac mewn digter, ac mewn llid mawr, ac a’u gyrrodd hwynt i wlad arall, megis y gwelir heddyw.
29Y dirgeledigaethau sydd eiddo yr Arglwydd ein Duw, a’r pethau amlwg a roddwyd i ni, ac i’n plant hyd byth, fel y gwnelom holl eiriau y gyfraith hon.