Niveroù 30
1Moizez a zisklériaz da vugalé Israel kémen̄d en dôa gourc’hémennet ann Aotrou d’ézhan̄:
2Hag é lavaraz da brin̄sed breûriézou bugalé Israel: Chétu pétrâ en deûz gourchémennet ann Aotrou: 3 Ma en deûz eur goaz gréat eur gwéstl d’ann Aotrou, pé mar d-eo en em éréet dré lé, na dorrô két hé c’hér; hôgen sévéni a rai kémen̄d eo en em wéstlet da ôber.
4Ma é deûz eur vaouez gréat eur gwéstl, ha mar d-eo en em éréet dré lé; mar d-eo plac’h-iaouan̄k, ha mar d-éma c’hoaz é-tî hé zâd: ma anavez ann tâd ar gwéstl é deûz gréat, hag al lé dré béhini é deûz éréet hé éné, ha mar tâv-hén̄, é vézô hî dalc’het d’hé gwéstl;
5Hag é sévénô hag é rai kémen̄d é dévézô gwéstlet ha touet.
6Hôgen mar d-eo bét énébet ann tâd oud hé gwéstl, kerken̄t ha m’en deûz klevet méneg anézhan̄, hé gwéstlou hag hé léou a vézô didalvez, ha na vézô két dalc’het-hi d’ar péz é dévézô gwéstlet, dré ma en deûz énébet ann tâd.
7Ma é deûz eunn ozac’h, ha ma é deûz gwéstlet eunn dra, pé ma é deuz eur wéach laosket eur gér eûz hé génou dré béhini eo bét éréet hé ené dré lé;
8Ma na éneb két ann ozac’h, enn hévélep deiz ma en deûz hé glevet, é vézô hî dalc’het d’hé gwéstl, hag é sévénô kémen̄d é vézô en em wéstlet da ôber;
9Hôgen pa en dévézô-hén̄ hé glevet, ma éneb out-hî, ha ma laka da véza didalvez hé gwéstlou hag ar geriou dré béré é dévézô hî éréet hé éné, ann Aotrou a vézô trugarézuz enn hé c’hén̄ver-hi.
10Ar c’hrég in̄tan̄vez, hag ar c’hrég kaset-kuît gan̄d hé ozac’h, a zévénô kémen̄t gwéstl hô dévézô gréat.
11Ma é deûz eur c’hrég, hag hî é-tî hé ozac’h, en em éréet gan̄d eur gwéstl ha gan̄d eul lé;
12Mar klev ann ozac’h, ha mar tâv, ha ma na énéb két oud ar gwéstl, é sevénô-hî kémen̄d é dévézô gwéstlet;
13Hôgen ma éneb ann ozac’h râk-tâl, na vézô két dalc’het hî d’hé gwéstl, dré ma en deûz énébet hé ozac’h, hag ann Aotrou a vézô trugarézuz enn hé c’hén̄ver-hî.
14Ma é deûz gréat eur gwéstl ha mar d-eo en em éréet gan̄d eul lé évit gwana hé éné dré ar iûn pé dré eunn diouer-bennâg all, é ioul hé ozac’h é vézô pé é rai, pé né rai két.
15Mar tâv ann ozac’h goudé béza klevet, ha ma na rô da anaout hé vénoz néméd an̄trônôz, é sévénô-hî kémen̄t gwéstl ha kémen̄t lé é dévézô gréat, dré ma en deûz klevet ann ozac’h, hag eo tavet kerken̄t.
16Hôgen goudé béza gwézet ar gwéstl, mar teû da énébi, é tougô-hén̄ hé fallagriez.
17Chétu al lézennou en deûz rôet ann Aotrou da Voizez, étré ann ozac’h hag ar c’hrég, étré ann tâd hag ar verc’h a zô c’hoaz plac’h-iaouan̄k, pé a choum é-tî hé zâd. ———— XXXI. PENNAD. Drouzivez ar Vadianited. Rann ann diwisk.