Niveroù 22
1Ha bugalé Israel ô véza éat-kuît ac’hanô, a zisplégaz hô zeltou é kompézennou Moab, é-tâl ar Jourdan, enn tû all da béhini éma Jériko.
2Hôgen Balak, mâb Séfor, ô wélout pétrâ en dôa gréat Israel d’ann Amorréed,
3Ha pénaoz ar Voabited hô dôa aoun vrâz râg ar bobl-zé, ha na helljen̄t két stourmi out-hô (T),
4É lavaraz da hénaoured Madian: Ar bobl zé a gasô-da-gét ar ré holl a choum enn-drô d’é-omp, é-c’hiz ma teû ann éjenn da beûri ar iéot bétég ar grisiou. Balak a oa Roué é Moab enn amzer-sé.
5Kannaded a gasaz da Valaam, mâb Béor, ann diouganer, péhini a choumé é-harz ster douar bugalé Ammon, évid hé gerc’hout, ha lavarout d’ézhan̄: Chétu eur bobl a zô deûet eûz ann Éjipt, a c’hôlô gorré ann douar, hag en deûz displéget hé deltou rag-énep d’in.
6Deûz éta, ha taol da valloz war ar bobl-zé; rak kréoc’h égéd-oun eo; ma wélinn ha mé a hellô enn eunn doaré-bennâg hé ganna hag hé gas-kuît diwar va douar; rak mé a oar pénaoz ann hini a vennigi a vézô benniget, hag ann hini war béhini éz pézô taolet ar valloz a vézô milliget.
7Ar ré gôz eûz a Voab, hag hénaoured Madian a iéaz éta, hag enn hô daouarn gôbr ann diouganérez. Ha pa oen̄t éat da gaout Balaam, hag hô dôé lavaret d’ézhan̄ holl c’heriou Balak:
8É lavaras-hén̄: Choumid aman̄ hénôz, ha mé a rôi da anaoud d’é-hoc’h ar péz en dévézô lavaret ann Aotrou d’in. Ar ré-man̄ ô véza choumet é-tî Balaam, é teûaz Doué, hag é lavaraz d’ézhan̄:
9Pétrâ a fell d’ann dûd-zé a zô enn da dî?
10Ha Balaam a lavaraz da Zoué: Balak, mâb Séfor, roué ar Voabited, en deûz hô c’haset,
11Da lavarout d’in: Chétu eur bobl a zô deûet eûz ann Éjipt, a c’hôlô gorré ann douar; deûz ha taol da valloz war-n-ézhan̄, ma wélinn ha mé a héllô enn eunn doaré-bennâg hé ganna hag hé gas-kuît.
12Ha Doué a lavaraz da Valaam: N’az â két gan̄t-hô, ha na villig két ar bobl-zé; rak benniget eo.
13Balaam ô véza savet diouc’h ar min̄tin a lavaraz d’ar brin̄sed: Id d’hô prô; rag ann Aotrou en deûz miret ouz-in n’éz ajenn gan-é-hoc’h.
14Ar brin̄sed ô véza distrôet, a lavaraz da Valak: Né két fellet da Valaam don̄t gan-é-omp.
15Neûzé Balak a gasaz d’ézhan̄ a-névez kalz mui a gannaded, hag hî brudétoc’h égéd ar ré gen̄ta.
16Pa oé deûet ar ré-man̄ étrézé Balaam, é léverchon̄t d’ézhan̄: Chétu pétrâ a lavar Balak, mâb Séfor: Na zalé két da zon̄t d’am c’havout.
17Daré ounn d’as énori, ha kémen̄d a fellô d’id a rôinn d’id; deûz, ha taol da valloz war ar bobl-zé.
18Ha Balaam a lavaraz: Ha pa rôfé Balak d’in leiz hé di a arc’han̄t hag a aour, na helfenn két trei gér ann Aotrou va Doué, évit lavarout pé muioc’h, pé nébeûtoc’h.
19Mé hô péd da choum c’hoaz ann nôz-man̄ aman̄, ma hellinn gouzout pétrâ a lavarô adarré ann Aotrou d’in.
20Doué a zeûaz éta diouc’h ann nôz da gavout Balaam, hag a lavaraz d’ézhan̄: Mar d-eo deûet ann dûd-zé évid da gerc’hon̄t, saô, ha kéa gan̄t-hô; laka évez koulskoudé da ôber ar péz a c’hourc’hémenninn d’id.
21Balaam a zavaz diouc’h ar min̄tin, ha goudé béza dibret hé azénez, éz éaz enn hen̄t gan̄t ar gannaded.
22Ha Doué a zavaz drouk enn-han̄ (T). Hag eunn éal d’ann Aotrou en em lékéaz enn hé zâ enn hen̄t râg-énep da Valaam a oa piñet war hé azénez, hag en doa daou vével gan̄t-han̄.
23Ann azénez ô wélout ann éal enn hé zâ enn hen̄t, hag hé glézé enn noaz enn hé zourn, a zistrôaz diwar ann hen̄t, hag a iéa a-dreûz ar mésiou. Ha pa skôé Balaam gan̄t-hi ô fellout d’ézhan̄ hé digas war ann hen̄t,
24Ann éal en em lékéaz enn hé zâ enn eul léac’h strîz étré diou vôger a oa war-drô d’ar gwiniennou.
25Pa her gwélaz ann azénez, en em stardaz oud ar vôger, hag é waskaz war droad ann hini a oa war hé c’hein. Hag hén̄ a skôaz gan̄t-hi eunn eil wéach.
26Hôgen ann éal ô tréménout enn eul léac’h strizoc’h, é péhini na helled distrei nag a zéou nag a gleiz, en em lékéaz enn hé zâ dirâg ann azénez.
27Pa wélaz ann azénez ann éal enn hé zâ dira-z-hi, é c’hourvézaz dindân treid Balaam; hag hé-man̄ ô von̄t drouk enn-han̄ mui-oc’h-vui, a skôé c’hoaz kréoc’h gan̄d hé vâz war hé gostésiou.
28Hôgen ann Aotrou a zigoraz génou ann azénez, hag hî a lavaraz: Pétrâ em eûz-mé gréat d’id? Pérâg éc’h eûz-té skôet gan-én̄ bété teir gwéach?
29Ha Balaam a lavaraz d’ézhi: O véza ma éc’h eûz hé zellézet, ha ma éc’h eûz gréat goab ac’hanoun. Pérâk n’am eûz-mé ket eur c’hlézé évid da laza!
30Hag ann azénez a lavaraz d’ézhan̄: Ha n’ounn-mé két da loen, war béhini oud bét boazet da biña bépréd bétég-henn? Lavar ma em eûz biskoaz gréat d’id nétrâ ével-henn? Biskoaz, émé-z-han̄.
31Râk-tâl ann Aotrou a zigoraz daoulagad Balaam, hag hén̄ a wélaz ann éal a oa enn hé zâ enn hen̄t, hag eur c’hlézé noaz enn hé zourn; hag ô véza en em strin̄ket d’ann douar, éc’h azeûlaz anézhan̄.
32Hag ann éal a lavaraz d’ézhan̄: Pérâg éc’h eûz-té skôet teir gwéach gan̄d da azénez? Mé a zô deûet évid énébi ouz-id, rak da hen̄t a zô fall, hag énep d’in;
33Ha ma na vijé két bét distrôet ann azénez diwar ann hen̄t, évit lézel al léac’h gan-én̄ pa énébenn out-hî, em bijé da lazet, hag hî a vijé choumet béô.
34Ha Balaam a lavaraz d’ann éal: Péc’het em eûz, ô véza na wienn két pénaoz édoz savet a-énep d’in; hôgen bréman̄ mar kavez droug ez ajenn dî, é tistrôinn war va c’hîz.
35Hag ann éal a lavaraz d’ézhan̄: Kéa gan̄t-hô, ha diwall na liviri nétrâ all néméd ar péz a c’hourc’hémenninn d’id. Mon̄d a reaz éta gan̄d ar brin̄sed.
36Pa glevaz Balak pénaoz é teûé Balaam, ez éaz war hé arbenn bétég eur géar eûz ar Voabited, a zô war harzou brô Arnon.
37Hag hén̄ a lavaraz da Valaam: Kannaded em eûz kaset évid da gerc’hout, pérâk n’oud két deûet râk-tâl d’am c’havout? Ha na hellann-mé két rei gôbr d’id ô véza maz oud deûet?
38Ha Balaam a lavaraz d’ézhan̄: Chétu mé a zô deûet; hôgen ha mé a hellô lavarout nétrâ kén néméd ar péz a lakai Doué em génou?
39Mon̄d a réjon̄t éta kévret, hag é teûjon̄t enn eur géar, a oa war harzou rouan̄télez Balak.
40Ha pa en dôé Balak lékéat da laza éjenned ha dén̄ved, é kasaz rôou da Valaam ha d’ar brin̄sed a oa gan̄t-han̄.
41Pa oé deûet ar min̄tin, Balak a gasaz Balaam war lec’hiou uc’hel Baal, hag a ziskouézaz d’ézhan̄ ac’hanô penn armé ar bobl a Israel. ———— XXIII. PENNAD. Balaam a vennig pobl Israel.