Psalmen 15
1BEhoudt my Heere, want ick heb in v ghehoopt,
2ic heb den Heere gheseyt, mijn Godt sijdi, want mijnder goeden en behoefdi niet.
3Inden heylighen die in sijnen lande sijn, heeft hy alle mijn willen wonderlijcken ghemaect.
4Hen crancheden sijn vermenichfuldicht, daer nae hebben sij ghehaest. Ick en sal hen versaminghen niet vergaderen van den bloeden, noch ic en sal niet ghedachtich sijn haerder namen door mijn lippen.
5Die Heere is tdeel mijnder eruen ende mijns kelcs ghy sijt die ghene die mijn erffelijcheyt my wederom gheuen sult.
6Die seelen sijn my gheuallen int costelijcke, want mijn erffenisse is my costelijck.
7Ick sal den Heere ghebenedijden die my verstant heeft ghegheuen, daer bouen oock totten nacht toe hebben my mijn nieren ghestraft.
8Ick voorsach den Heere in mijn aenscouwen altijt, want hy is my ter rechter sijden, dat ick niet beroert en worde.
9Daerom is mijn herte verblijdt, ende mijn tonghe heeft haer verhuecht, daer toe so sal mijn vleesch ooc rusten in die hope.
10Want ghy en sult mijn ziele niet laten in die helle, noch ghy en sult uwen heylighen niet gheuen te sien die verderffenisse. Ghy hebt mij kenlijck ghemaect die weghen des leuens, ghy sult my veruullen met blijscap met uwen aensicht, wellusticheden sijn in v rechte hant totten eynde.