Psalmen 55
1ONtfermt v mijnder Godt, want die mensch heeft my vertreden, den gheheelen dach beuechtende heeft hy my ghequelt.
2Mijn vianden hebben my vertreden alle den dach, want daer esser veel strijdende tegehen my.
3Van die hoocheyt des daechs sal ic vreesen, maer ick sal in v hopen.
4In Gode sal ick mijn redenen louen, in Gode heb ick ghehoept, ick en sal niet vreesen wat my tvleesch doet.
5Alle den dach hebben sij mijn woerden vervloect, teghen my sijn allen hen ghedachten int quade.
6Sij sullen inwoonen ende verberghen, sij sullen mijn versene gade slaen. Ghelijc sij mijn ziele ghewacht hebben,
7om niet suldise behouden, in die gramscap suldi die volcken in stucken breken. Godt
8ick heb mijn leuen v vercondicht, ghy hebt mijn tranen in v aensicht ghestelt. Ghelijck oock in uwer beloften,
9dan sullen mijn vianden achterwaerts ghekeert worden. In wat dach dat ick v aenroepe, siet soe heb ick bekent, dat ghy mijn Godt sijt.
10In Gode sal ick dwoert louen, inden Heere sal ick die redene prijsen, in Gode heb ick ghehoept ick en sal niet ontsien, wat my die mensch doet.
11In my sijn o Godt v beloften die ick v tot louinghen sal wedergheuen.
12Want ghy hebt mijn ziele vander doot verlost, ende mijn voeten vanden valle, op dat ick behaghen mach voer Gode int licht der leuender.