Psalmen 84
1GHy hebt v lant ghebenedijt Heere, ghi hebt afghekeert Iacobs gheuanghenisse.
2Ghy hebt verheuen die boosheyt ws volcs ghy hebt bedect allen hen sonden.
3Ghy hebt saecht ghemaect allen v gramscappe, ghi hebt v afghekeert van die gramschap uwer verbolghentheyt.
4Bekeert ons Godt onse salichmakere, ende keert v gramscappe van ons.
5Suldi inder eewicheyt op ons gram sijn? oft suldy v gramscappe wtstrecken van gheslachte tot geslachte?
6Godt ghy sult omghekeert sijnde ons leuende maken, ende v volck sal hem in v verblijden.
7Vertoont ons Heere uwe bermherticheyt, ende v salicheyt gheeft ons.
8Ick sal hooren wat die Heere God in my spreect, want hy sal vrede spreken in sijn volck. Ende op sijn heylighen, ende op die ghene die ter herten bekeert worden.
9Maer nochtans by die ghene die hem vreesen is sijn salicheyt, op dat die glorie woone in ons lant.
10Die bermherticheyt ende waerheyt hebben malcanderen ontmoet, die rechtuerdicheyt ende den vrede hebben malcanderen ghecust.
11Die waerheyt is wter eerden ghesproten, ende die rechtuerdicheyt heeft vanden hemel wtghesien.
12Want die Heere sal goedertierenheyt gheuen, ende onse eerde sal haer vrucht gheuen.
13Die rechtuerdicheyt sal voor hem wandelen, ende inden wech sijn ganghen stellen.