Psalmen 33
1ICk sal den Heere ghebenedijden tot allen tijden, altijt is sijnen lof in mijnen mont.
2Inden Heere sal mijn ziele gheloeft worden, laet die saechtmoedighe hooren, ende laetse hen verblijden.
3Maect den Heere groot met my, ende laet ons sijnen naem verheffen met malcanderen.
4Ick heb den Heere versocht, ende hy heeft my ver-hoort, ende wt alle mijn verdructheyt heeft hy my verlost.
5Gaet tot hem ende wort verlicht, ende soo en sullen v aensichten niet bescaemt worden.
6Dese arme heeft gheroepen, ende die Heere heeft hem verhoort, ende van alle sijn tribulacien heeft hy hem verlost.
7Die engel des Heeren sal si seluen stellen rontsomme die ghene die hem vreesen, ende hy salse verlossen.
8Smaect ende siet want die Heere is suet, salich is die man die in hem hoept.
9Vreest den Heere alle sijn heylighen, want sij en hebben gheen ghebreck die hem vreesen.
10Die rijcke hebben ghebreck ghehadt ende hongher gheleden, maer die den Heere suecken, en sullen niet vermindert worden van alle goet.
11Coemt kinderen, hoort my, die vreese des Heeren sal ick v leeren.
12Wie is die mensche die dleuen begheert, ende bemint te sien goede daghen.
13Bedwinct v tonghe van quaet, ende v lippen dat sij gheen bedroch en spreken.
14Wijct af van tquaet, ende doet goet, versuect den vrede ende veruolcht dien.
15Die ooghen des Heeren sijn op die rechtuerdighe ende sijn ooren in hen ghebeden.
16Maer des Heeren aensicht is ouer die quaetdoenders, dat hy vander eerden hen ghedenckenisse soude te niet doen.
17Die rechtuerdighe hebben gheroepen ende die Heere heeftse verhoort, ende van allen haren tribulatien heeft hijse verlost.
18By is die Heere alle den ghenen die verdruct van herten sijn, ende die ootmoedighe van gheeste sal hy behouden.
19Veel sijn die quellinghen der rechtuerdigher, ende van alle dese salse die Heere verlossen.
20Die Heere bewaert allen hen ghebeenten, niet een van dien en sal ghebroken worden.
21Die doot der sondaren is dalder quaetste, ende die den rechtuerdighen haten, sullen misdoen.
22Die Heere sal verlossen die zielen van sijnen dienaren, ende sij en sullen niet misdoen alle die in hem hopen.