Psalmen 48
1HOort dit alle Heydenen, vatet metten ooren alle die die werelt bewoont.
2Alle die wter eerden gheboren sijt ghy ende kinderen der menschen, tsamen met een rijck ende arm.
3Mijnen mont sal wijsheyt spreken, ende die aendachte mijns herten voersienicheyt.
4Ick sal tot die parabel mijn oore neyghen, ende metten psalterspel mijn reden open doen.
5Waer om sal ick vreesen opden quaden dach? die boosheyt mijnder versenen sal my omuanghen.
6Die betrouwen hebben in hen cracht, ende in die menichfuldicheyt van haren rijcdommen glorieren.
7Een broeder en verlost niet, sal een mensche verlossen? hy en sal Gode niet gheuen sijn versoeninghe.
8Ende den prijs van sijnder zielen verlossinghe, ende hy sal arbeyden inder eewicheyt,
9ende hy sal noch leuen totten eynde.
10Hy en sal die doot niet sien als hy die wijse sal sien steruen, te samen sullen die onwijse ende die dwase vergaen. Ende sij sullen den vreemden haer rijcdommen achterlaten,
11ende hen grauen sullen haer lieder huysen sijn tot inder eewicheyt. Hen tabernakelen blijuen van gheslachte tot gheslachten, sij hebben hen namen ghenoemt in hen landen.
12Ende die mensch als hy in eeren was, soe en heeft hy dat niet verstaen, hy is gheleken by die onuerstandighe beesten, ende dien ghelijck worden.
13Desen haren wech is hen een struycsel, ende daer nae sullen sij met haren mont behaghen.
14Ghelijck scapen sijn sij in die helle ghestelt, die doot salse aff eten. Ende die rechtuerdighe sullen heerscappie ouer hen hebben inden morghenstont, ende hen helpe sal verouderen in die helle van hen glorie.
15Maer nochtans sal Godt mijn ziele verlossen, van die hant der hellen als die my sal ontfanghen hebben.
16En vreest niet als die mensch rijck gheworden is, ende als die glorie sijns huys vermenichfuldich is.
17Want als hy sal vergaen soe en sal hy dat al niet met nemen, noch sijn glorie en sal met hem niet nederdalen.
18Want zijn ziele sal in sijn leuen ghebenedijt worden, hij sal v belijden als ghy hem sult wel ghedaen hebben.
19Hy sal ingaen tot in die gheslachten sijnder vaderen, ende tot inder eewicheyt en sal hy dlicht niet sien.
20Die mensch doen hy in eeren was soe en heeft hijt niet verstaen, hy is gheleken by die onuerstandighe beesten, ende dien ghelijck gheworden.