Psalmen 91
1TIs goet den Heere te belijden, ende lof te singhen uwen naem o ghy alderhoochste.
2Om des morghens vroech v bermherticheyt te vercondighen, ende v warachticheyt des nachts.
3In psalter spel van thien snaren, metten lofsauc op die herpe.
4Want ghi hebt mi veruruecht Heere door v maecsele, ende in die wercken uwer handen sal ick verhueghen.
5Hoe grootdadich sijn v wercken gheworden Heere, te veel diep sijn v ghedachten worden.
6Een onwijs mensch en salse niet kennen, ende een dwaes en sal dese niet verstaen.
7Als die sondaers sullen opghestaen sijn ghelijck gras, ende dat hem openbaren sullen alle die boosheyt doen, op dat sij verghaen souden inder eewicheyt der eewicheden
8(maer ghi alderhoochste Heere) blijft inder eewicheyt.
9Want siet v vianden Heere, want siet v vianden sullen vergaen, ende sij sullen alle verstroeyt worden die boosheyt doen.
10Ende mijnen horn sal verhauen worden als des eenhorens, ende mijn ouderdom in een vruchtbarighe ontfermherticheyt.
11Ende mijn ooghe heeft mijn vianden versmaet, ende vanden quaetwillighen die teghen my opstaen sal mijn oore hooren.
12Die rechtuerdighe sal ghelijck eenen palmboom bloeyen, ghelijck den cederboom van Libano sal hy vermenichfuldicht worden.
13Die gheplant sijn in des Heeren huys, sullen in die voorhouen van ons Godts huys bloeyen.
14Al noch sullen sij vermenichfuldicht worden in eenen vruchtbaren ouderdom, ende hen sal wel ghedaen worden,
15dat sijt vercondighen souden. Want recht is die Heere onse Godt, ende daer en is gheen ongherechticheyt in hem.