Psalmen 19
1DIe Heere verhoore v inden dach der tribulacien, den naem van Iacob bescerme v.
2Hy sende helpe van die heylighe plaetse, ende bescerme v van Sion.
3Hy sij ghedachtich allen uwe sacrificien, ende uwen brantoffer wort vet.
4Hy gheue v nae v herte, ende hy vestighe allen uwen raet.
5Wij sullen ons verblijden in uwer salicheyt, ende inden naem ons Godts sullen wij groot ghemaect worden.
6Die Heere veruulle alle uwe begheerten, nv heb ick ghekent dat die Heere sijnen ghesalfden behouden heeft. Hy verhoore hem van sijnen heylighen hemel, in die machtighe is die salicheyt van sijnder rechter hant.
7Dese in waghenen, ende dese in peerden, maer wij sullen inden naem des Heeren ons Gods aenroepen.
8Sij sijn verbonden ende gheuallen, maer wij sijn opghestaen ende opghericht.
9Heere behoudt den coninck, ende verhoort ons inden dach als wij v aenroepen.