Psalmen 7
1HEere mijn Godt in v heb ick ghehoopt, behoudt my wt allen die my vervolghen, ende verlost my.
2Dat hy tot eenighen tijt niet en grijpe als eenen leeuw mijn ziele, alsser niemant en is die verlossen mach, oft salich maken.
3Heere mijn Godt, heb ick dit ghedaen, ende isser boosheyt in mijn handen.
4Heb ick met quaet gheloont, die my met quaet betaelden, soo moet ick te recht ydel afvallen van mijnen vianden.
5Soo moet die viant mijn ziele vervolghen ende grijpen, ende vertreden in deerde mijn leuen, ende mijn glorie tot stof brenghen.
6Staet op Heere in v gramschap, ende wort verheuen in die palen van mijnen vianden. Ende staet op Heere mijn Godt int ghebodt dat ghy beuolen hebt,
7ende die vergaderinghe der volcken sal v omringhen. Ende om dese coemt wederom int hooghe,
8die Heere ordeelt die luyden. Ordeelt my Heere nae mijn rechtuerdicheyt, ende nae mijn onnooselheyt ouer my.
9Die archeyt der sondaren sal vernielt worden, ende ghy sult den rechtuerdighen bescicken, ghy Godt ondersueckende die herten ende nieren.
10Mijn rechtuerdighe helpe is vanden Heere die salich maect die oprechtighe van herten.
11Godt is een rechtuerdich richter, sterck, ende lijdtsamich, sal hy tot allen daghen gram worden?
12Ten sij dat ghy bekeert wordt, hy heeft sijn sweert opgheheuen te slaen, sijnen boghe heeft hy ghespannen, ende dien bereydt.
13Ende in dien heeft hy bereyt ghescutten des doots, sijn pijlen heeft hy om te verbernen ghemaect.
14Siet hy brengt voort onrechtuerdicheyt, hy heeft rouwe ontfanghen ende ghebaert boosheyt.
15Eenen put heeft hy open ghedaen ende dien ontgrauen, ende hy is in die gracht gheuallen die hy ghemaect heeft.
16Sijn smerte sal wederom keeren op sijn hooft, en-de opden tsop van sijnen hoofde sal sijn boosheyt nederdalen.
17Ick sal den Heere belijden nae sijn rechtuerdicheyt, ende ick sal singhen den naem van den alderhoochsten Heere.