Psalmen 137
1ICk sal v belijden Heere in alle mijn herte, om dat ghi ghehoort hebt die woerden mijns monts. Int aenscouwen der enghelen sal ick v loff singhen,
2ick sal aenbidden tot uwen heyleghen tempel ende belijden uwen naem. Van uwer bermherticheyt ende waerheyt, want ghy hebt ouer al groot ghemaect uwen heyleghen naem.
3Op wat dach dat ick v aenroepen sal verhoort my, soe suldi in mijn ziele die cracht vermenichfuldighen.
4V moeten belijden Heere alle die coninghen der eerden, want sij hebben ghehoort alle die woerden ws monts.
5Ende laetse singhen in des Heeren weghen, want groot is die glorie des Heeren.
6Want die Heere is hooghe, ende hy aensiet die nedere, ende die hooghe kent hy van verre.
7Eest dat ick wandele int midden der tribulatien, soe suldi my leuende maken, ende ouer die gramschap van mijnen vianden hebdi v hant wt ghesteken, ende v rechte hant heeft my salich ghemaect.
8Die Heere sal betalen voer my, Heere v bermherticheyt is inder eewicheyt, die wercken van uwen handen en wilt niet versmaden.