Psalmen 9
1ICk sal v belijden Heere met alle mijn herte, ick sal vertellen allen v wonderen.
2Ick sal my verblijden ende verhueghen in v, ick sal uwen name singhen o ghy alderhoochste.
3Als ghy mijnen viant achterwaerts ommekeeren sult, dan sullen sij cranck worden, ende verghaen van uwen aensicht.
4Want ghy hebt mijn ordeel, ende mijn sake ghedaen, ghy hebt opden throon gheseten die daer oordeelt die rechtuerdicheyt.
5Ghy hebt die Heydenen ghestraft, ende die ongoddelijcke is verghaen, haren naem hebdy wtgheuaecht inder eewicheyt, ende in die eewe der eewen.
6Des viants sweerden sijn vergaen ten eynde, ende hen steden hebdi bedoruen. Hen ghedenckenisse is vergaen metten gheluydt,
7ende die Heere blijft inder eewicheyt. Hy heeft int ordeel sijnen throon bereydt,
8ende hy sal den omganc der eerden ordeelen in gherechticheyt, hy sal die volcken ordeelen in die rechtuerdicheyt.
9Ende die Heere is gheworden een toevlucht den armen, een helper in die bequame tijden in die tribulacie.
10Ende laetse in v hopen die uwen naem kennen, want ghi en hebt niet verlaten die ghene die v soecken Heere.
11Singt den Heere die in Sion woont, vercondicht onder die Heydenen sijn naersticheden.
12Want soeckende hen bloet is hy des ghedachtich gheweest, hy en heeft niet vergheten den roep vanden armen.
13Ontfermt v mijnder Heere, siet mijn vernederinghe van mijnen vianden.
14Ghy die my verheft van die poorten der doot, dat ick soude vercondighen allen v louinghen in die poorten der dochter van Sion.
15Ick sal my verhueghen in uwe salicheyt, die Heydenen sijn vast ghesteken in die verderffenisse die sij ghemaect hebben. In desen strick die sij gheberghen hebben, is haren voet gheuanghen.
16Die Heere sal ghekent worden rechte ordeelen doende, in die wercken sijnder handen is die sondaer beuanghen.
17Die sondaeren moeten tsamen ghekeert werden ter hellen, alle die Heydenen die Godt vergheten.
18Want totten eynde en sal die arme niet vergheten worden, die lijdtsaemheyt der armen en sal niet vergaen totten eynde.
19Staet op Heere, en laet den mensch niet versterct worden, laet die Heydenen gheordeelt worden in v aenscouwen.
20Stelt Heere eenen wetgheuer op henlieden, laet die Heydenen weten dat sij menschen sijn.
21Waerom sijdi Heere verre wech ghegaen, ende versmaet ons in die bequame tijden in die tribulacie?
22Als die ongoddelijcke hem verhoouerdicht so wort die arme ontsteken, sij worden beuanghen in die raden die sij dencken.
23Want die sondaer wort ghepresen in die begheerten sijnder zielen, ende die boose wort ghebenedijt.
24Die sondaer heeft den Heere vergramt, nae die menichfuldicheyt sijnder gramschappen en sal hy dat niet versoecken.
25Daer en is gheen Godt in sijn aenschouwen, sijn weghen sijn besmedt tot allen tijden. V ordeelen worden wech ghenomen van sijnen aensicht, ouer alle sijn vianden sal hi heerscappie hebben.
26Want hy heeft gheseyt in sijn herte. Ick en sal niet verroert worden van gheslachte tot gheslachte, sonder quaet.
27Wiens mont is vol maledictien, ende bitterheden, ende bedroch, onder sijn tonghe is arbeidt ende pijne.
28Hy sidt in die laghen metten rijcken, int heymelijc dat hy dooden soude den onnooselen.
29Sijn ooghen aensien den armen, hy leydt laghen int verborghen als eenen leeuw in sijn speluncke. Hy leydt laghen om te grijpen den armen, te grijpen den armen als hy hem aenhaelt.
30In sijnen strick sal hy dien vernederen, hy sal sij seluen buyghen, ende vallen als hy heerscappie ghecreghen heeft ouer die arme.
31Want hy heeft in sijn herte gheseydt. Godt heuet vergheten, hy heeft sijn aensicht afghekeert dat hijs niet sien en soude ten eynde.
32Staet op Heere Godt, laet v hant verhauen worden, en vergheet den armen niet.
33Waerom heeft die ongoddelijcke Godt tot gramscap verwect? want hy heeft in sijn herte gheseyt, hy en sals niet versuecken.
34Ghy sieghet want ghy den arbeyt ende die smerte aenmerct, dat ghy die soudt leueren in v handen. V is die arme ghelaten, der weesen suldy een helper wesen.
35Breect in stucken den arm vanden sondaer, ende boosen, sijn sonde sal ghesocht worden, ende niet gheuonden.
36Die Heere sal regneren eewichlijck, ende in die eewe der eewen, ghy Heydenen sult verghaen van sijnder eerden.
37Die begheerte der armen heeft die Heere verhoort, die bereydinghe van haren herten heeft v oore verhoort.
38Om recht te doen den weesen ende den ootmoedi-ghen, dat die mensch daer voorts niet meer toe en doe om sij seluen groot te maken opder eerden.