Psalmen 35
1DIe onrechtuerdige heeft gheseyt dat hy misdoen soude in sij seluen, daer en is gheen vreese Godts voor sijn ooghen.
2Want hy heeft bedriechelijck ghedaen in sijn aensicht, dat sijn boosheyt gheuonden worde tot hate.
3Die woorden sijns monts sijn boosheyt ende bedroch, hy en heeft niet willen verstaen dat hy wel doen soude.
4Boosheyt heeft hy bedacht in sijn bedde, hy heeft ghestaen by alle weghen die niet goet en waren, maer die quaetheyt en heeft hy niet ghehaet.
5Heere inden hemel is uwe bermherticheyt, ende v waerheyt tot die wolcken toe.
6V rechtuerdicheyt is ghelijck Gods berghen, v ordeelen sijn groote diepten. Die menschen ende beesten suldi behouden Heere
7(ghelijc ghy God vermenichfuldicht hebt uwe bermherticheyt). Maer die kinderen der menschen, sullen in dat decsel uwer vloghelen hopen.
8Sij sullen droncken worden van die oueruloedicheyt ws huys, ende metten vloet uwer wellusticheyt suldise drencken.
9Want by v is die fonteyn des leuens, ende in v licht sullen wij dlicht sien.
10Reyct wt v bermherticheyt den ghenen die v kennen, ende v rechtverdicheyt den ghenen die oprecht van herten sijn.
11En laet den voet der hoouerdien my niet ouercomen ende die hant des sondaers en roere my niet.
12Daer sijn sij gheuallen die boosheyt doen, sij sijn wt ghedreuen ende sij en mochten niet staen.