Levr ar Salmoù 75
1Da veûli a raimp, ô Doué, da veûli a raimp, hag é c’halvimp da hanô. Lavarout a raimp da vurzudou.
2P’am bézô kéméret va amzer, é varninn gan̄t reizded.
3Teûzet eo ann douar, hag ar ré holl a choum enn-han̄; mé em eûz startéet hé beûliou.
4Lavaret em eûz d’ar ré fallagr: Na rît két a fallagriez; ha d’ar béc’herien: Na fougéit két gan̄d hô kalloud.
5Na zavit két uc’hel hô kalloud; na wall-gomzit két a-énep Doué.
6Râg nag eûz ar sâv-héol, nag eûz ar c’hûs-héol, nag eûz ar ménésiou na zeûiô skoazel d’é-hoc’h.
7Râk Doué eo ar barner; vuélaat a ra unan, ha sével a ra eunn all.
8Râg é dourn ann Aotrou éz eûz eur c’hôp gwîn pûr leûn a c’houervder. Hag hén̄ a skuḻ da hé-man̄ ha da hen-hon̄t; koulskoudé al lec’hid anézhan̄ né két c’hoaz deûet da hesk; ann holl béc’herien eûz ann douar a évô eûz anézhan̄.
9Hôgen mé a embannô hé veûleûdi da-vikenn, hag a ganô da Zoué Jakob.
10Ha mé a dorrô holl c’halloud ar béc’herien; ha galloud ann dén reiz a vézô uc’héléet. ———— LXXV. PSALM. Évid an divez, war ar meûleûdiou, Psalm Asaf, kanaouen diwar-benn ann Assiried.