Levr ar Salmoù 9
1Da veûli a rinn, Aotrou, gan̄t va holl galoun: da holl vurzudou a zanévellinn.
2En em laouénaad a rinn hag é tridinn enn-od; kana a rinn d’as hanô, ô Uc’hel-meûrbéd.
3Pa likii va énébour da zistrei war hé giz; hî a fallai, hag a vézô dispennet dira-z-oud.
4Râk té éc’h eûz gréat éz ounn bét barnet éz-léal hag em eûz gounézet (M): azézet oud bét war da drôn, té péhini a varn hervez ar reiz.
5Krôzet éc’h eûz ar brôadou, hag ar ré fallagr a zô éat-da-gét: roudennet eo gan-éz eûz a levr ar vuez hô hanô da-vikenn, hag é amzeriou ann amzeriou.
6Armou ann énébour hô deûz kollet hô ners da-vikenn; ha diskaret eo hô c’heriou gan-éz. Ar c’houn anézhô a zô bét kollet gan̄t trouz.
7Hôgen ann Aotrou a bâd da-vikenn. Aozet en deûz hé drôn évid hé varn.
8Hag hén̄ a varnô ar béd holl gan̄d éeunder, hén̄ a varnô ar boblou gan̄t reizded.
9Hag ann Aotrou a zô deûet da warez d’ar paour; ha da skoazel d’ézhan̄ enn hé ézommou, hag enn hé c’hlac’har.
10Lakaen̄t hô géd enn-od ar ré a anavez da hanô; râk n’éc’h eûz két dilézet, Aotrou, ar ré az klask.
11Kanit d’ann Aotrou péhini a choum é Sion: rôit da anaout hé labouriou é-touez ar boblou.
12Koun en deûz bét eûz a c’hoad hé zervicherien a glaské; n’en deûz két an̄kounac’héet garm ar béorien.
13Az péz truez ouz-in, Aotrou: gwél ar vuelded é péhini ounn bét lékéat gan̄t va énébourien;
14Té péhini a zâv ac’hanoun eûz a zôriou ar marô; évit ma rôinn da anaout da holl veûleûdiou é-harz dôriou merc’h Sion.
15Trida a rinn gan̄d ar zilvidigez a rôi d’in; ar brôadou a zô kouézet enn toull hô dôa gréat évit va laza. Paket eo bét hô zroad el lindâg hô dôa steñet é-kûz.
16Ann Aotrou a vézô anavézet diouc’h ar varn a rai; ar péc’her a zô bét paket é labouriou hé zaouarn.
17Bézet taolet ar béc’herien enn ifern, hag ann holl vrôadou péré a an̄kounac’ha Doué.
18Râk na vézô két an̄kounac’héet ar paour da-vikenn; habaskded ar béorien na vézô két kollet da-vikenn.
19Sâv, Aotrou, évit n’en em stardô két ann dén; bézet barnet ar brôadou dira-z-ôd.
20Laka, Aotrou, eur reizer war-n-ézhô, évit ma wézô ar brôadou pénaoz in̄t tûd. ———— X. PSALM. Hervez ann Hébréd.