Llyfr y Salmau 67
1I'r Pencerdd, Cân neu Salm. Llawenfloeddiwch i DDUW, yr holl ddaear:
2Datgenwch ogoniant ei enw: gwnewch ei foliant yn ogoneddus.
3Dywedwch wrth DDUW, Mor ofnadwy wyt yn dy weithredoedd! oherwydd maint dy nerth, y cymer dy elynion arnynt fod yn ddarostyngedig i ti.
4Yr holl ddaear a’th addolant di, ac a ganant i ti; ie, canant i’th enw. Sela.
5Deuwch, a gwelwch weithredoedd DUW: ofnadwy yw yn ei weithred tuag at feibion dynion.
6Trodd efe y môr yn sychdir: aethant trwy yr afon ar draed: yna y llawenychasom ynddo.
7Efe a lywodraetha trwy ei gadernid byth; ei lygaid a edrychant at y cenhedloedd: nac ymddyrchafed y rhai anufudd. Sela.
8O bobloedd, bendithiwch ein DUW, a pherwch glywed llais ei fawl ef.
9Yr hwn sydd yn gosod ein henaid mewn bywyd, ac ni ad i'n troed lithro.
10Canys profaist ni, O DDUW: coethaist, fel coethi arian.
11Dygaist ni i’r rhwyd: gosodaist wasgfa at ein llwynau.
12Peraist i ddynion farchogaeth ar ein pennau; aethom trwy y tân a'r dwfr: a thi a'n dygaist allan i le diwall.
13Deuaf i'th dŷ ag offrymau poeth: talaf i ti fy addunedau,
14Y rhai a adroddodd fy ngwefusau, ac a ddywedodd fy ngenau yn fy nghyfyngder.
15Offrymaf i ti boethoffrymau breision, ynghyd ag arogl-darth hyrddod; aberthaf ychen a bychod. Sela.
16Deuwch, gwrandewch, y rhai oll a ofnwch DDUW; a mynegaf yr hyn a wnaeth efe i'm henaid.
17Llefais arno â’m genau, ac efe a ddyrchafwyd â’m tafod.
18Pe edrychaswn ar anwiredd yn fy nghalon, ni wrandawsai yr Arglwydd.
19DUW yn ddiau a glybu, ac a wrandawodd ar lais fy ngweddi
20Bendigedig fyddo DUW, yr hwn ni throdd fy ngweddi oddi wrtho, na’i drugaredd ef oddi wrthyf finnau.